Read Sangir ESTER 6 Bible Online

ESTER 6 - Sangir bible

ESTER 6

¹Su hěbi ene lai datu e tawe kinahuntikilang. Ual᷊ingu ene i sie nẹ̌dorong nakial᷊ạ u bukẹ̌ u pamamohekangu wěkeng kararatuang dingangu měngoro taumata e pẹ̌basa.

² Su ral᷊unge kinaěbakenge wohẹ u i Mordekhai seng naul᷊ị u piạ kapulu waugu měmate ratu kụ nikaraking Bigtan dẹ̌duang Teres, mapapangkatẹ̌ nitani waugu měndiagạ kamaru ratu.

³Datu e nakiwal᷊o, ”Kai pěngangadatẹ̌ dingangu wawal᷊ise apa kụ seng nionggọ si Mordekhai e?” Angkuěngu manga mẹ̌tatangkiang, ”I sie tawe nakatarimạ u manga apa.”

⁴Bọu e nẹ̌berạ e ratu, ”I sai wọu sawohịku kụ apang ene su istana orasẹ̌ ini e?” Nẹ̌sarětạu i Haman buhụe lai simuẹ̌ su rěllahu istana; kụ i sie mẹ̌dorong loahe su ratu waugu měmiting si Mordekhai su rihi nạung seng bọu nirarisị ene.

⁵Apang mẹ̌tatangkiang ene e simimbang su ratu, ”I Haman ene su istana ringangu i sie mapulu mẹ̌těngon Tuang.” ”Apasuẹ̌ko i sie,” angkuěngu ratu.

⁶Ene i Haman nasuẹ̌ e, ratu e nẹ̌bera si sie, ”Piạ taumata kụ hědon takụ pěgěllikangu adatẹ̌ kereng kasariane. Apa koatengu e waugʼi sie?” Su naung i Haman, ”I sai lai wědang sarung pěngadatengu ratu e kereng kasěllahe? Nal᷊ahẹ u mambeng iạ!”

⁷Ual᷊ingu ene i sie simimbang, ”Kěnangko tau ene al᷊ake pakeangu kawawantugẹ̌ e kụ tiasa e pẹ̌paketang u Ratu e hala. Bọu e kawal᷊on Datu nilẹ̌gahengu manga tatialang kararatuang.[5]

⁹Sěngkatau těmbonangu něgara wọu ghal᷊ipohong mapapangkatẹ̌ e harusẹ̌ mapěluheng pakeang ene e su taumata kụ hědong pěngadatengu Mawu ratu ene e, wọu ene ipasilo tau ene wọu wowong kawal᷊on Datu kụ iluhu wọu wimbaeng u soa. Těmbonange ene iparal᷊eng su těngone kạpěmansage, ’Kai kirini kakakoạ u ratu e měngarěgan taumata kụ adatenge!’ ”

¹⁰Mase něhengetangke ratu e si Haman, ”Lighạ e, al᷊ạko pakeang dingangu kawal᷊o ene, kụ pakasueko ghěllị kal᷊awọu haghin laadatẹ̌ ene si Mordekhai tau Yahudi ene. Pẹ̌koạko kere seng nipěhengetangu kanini, kụ tawe kạdiongeng maghaing sarang sěmbaụ. I sie e kaẹ̌bakengu kạkaiange su těngon tukadu pasěllangengu istana.”

¹¹Bọu e i Haman něngal᷊ạ pakeang dingangu kawal᷊o ene kụ napěluheng pakeang ene e si Mordekhai. Sarětạeng i Mordekhai e simake kawal᷊o ene, i Haman něngahạ napal᷊uhun sie limiu wimbaengu soa, kapěbẹ̌bansage, ”Kakěllạ e, kai kirini ratu e měngarěgan taumata kụ adatenge!”

¹²Bọu ene i Mordekhai nẹ̌sul᷊e kapia sarang tukadu pasěllangengu istana e. Arawe i Haman nẹ̌bawal᷊ikěkasẹ̌ napul᷊ẹ. I sie mạdiri ikasilon taumata watụ u i sie e kai namea-mea, kụ nitimbuhungange ghatine.

¹³I sie nẹ̌běke su kawinge ringangu manga hapị e apang kụ nikahombangenge. Mase kawinge ringangu manga hapị e kụ pelesa ene nẹ̌bera si sie, ”I kau e seng měnětạ ikawatạ katoghasu kahiang Mordekhai. I sie tau Yahudi ringangu i kau e tawe makarokạ. I sie nal᷊ahẹ u sarung měmatạ si kau.”

¹⁴Těntal᷊ang i sire e reng kapěbẹ̌bisarane ringangi Haman, apam mapapangkatu istana e riměnta masahawụ-sahawụ měnondang Haman sarang pẹ̌sasimokol᷊ang kinoạ i Ester.