Read Sangir ESTER 7 Bible Online

ESTER 7 - Sangir bible

ESTER 7

¹Tangú su karua sul᷊ene datu ringang i Haman kimaěng dingangu něnginung dingang i Ester.

²Kạpěnginunge anggorẹ̌, datu saụewe nakiwal᷊o si Ester, ”Ho, ěng! Datu wawineku, kai a kapulunu? Pẹ̌berạ e! Nal᷊ahẹ u sarung takụ ionggọ manilaing sěmběka wọu kararatuangku.”

³Sasimbangu Ratu wawine i Ester, ”Kereu i Tuan Datu e mal᷊uasẹ̌, ěllangu e mẹ̌dorong tadeạu ěllangu e ringangu bansang ěllangu e wotonge mẹ̌biahẹ̌.

⁴Batụ u ěllangu e ringangu bansang ěllangu e seng niwal᷊ụ mědeạu pateěng. Manga andene i kami tumbạeng niwal᷊ụ baugu makoạ ěllang, batangengku e reng mẹ̌těngkarěmasẹ̌, dingangu tawe měnahaghe si Tuan Datu e.[6] Arawe ini i kami e sarung ipakawinasa ringangu ipakaupu!”

⁵Mase nakiwal᷊ọ e Ratu i Ahasyweros su Ratu wawine i Ester, ”I sai kụ bahani mẹ̌koạ kerene? Suapa taumatane?”

⁶I Ester simimbang, ”I Haman tau ral᷊akisẹ̌ ini e sědụ dingangu měngangaloaị si kami e!” I Haman měngkate apa natakụ-takụ němanda ratu ringangu ratu wawine.

⁷Datu e limangehẹ̌ tạ sihinge, kụ nẹ̌buạ něněntangu meda apidu siměbang sarang likude, sarang bimbaengu istana. I Haman masingkạ u ratu seng něngal᷊ạ putusangu měhukung i sie, ual᷊ingu ene i sie těbewe kạtatanạ dingangu Ratu wawine i Ester baugu kumahiorọ u tadeạu ambangeng.

⁸I Haman napěnsu kụ nẹ̌těngkawatangu watangenge su wowon dal᷊okaěng i Ester mẹ̌dorong ampung, kaiso nẹ̌kětạeweng su tempo ene e lai ratu e nawal᷊ị bọu wimbaengu istana. Nakasilo si Haman kerene, datu e nẹ̌bera maihạ, ”Apa? Bědang lai wahani i sie lumia ratu wawine sini e su těngoku ringangu su istanaku e hala?” Tawe nararěnnạ samuring kal᷊awọu wawera ene niwokạ u ratu, apam mapapangkatẹ̌ e narěntạ e apidu něnimbuhung těmbo i Haman.

⁹Mase angkuěng i Harbona, sěngkatau wọu apang mapapangkatẹ̌ ene, ”Tuang! su rěduhu wal᷊eng Haman piạ dihi pěmamitingang karangẹ e ruam pul᷊o dua su metere. I Haman seng napararisị u ene waugu pěmitingang si Mordekhai, taumata kụ něngambang niawan Tuan Datu e.” Mase angkuěng u ratu, ”Bitingke i Haman su rihi ene!”

¹⁰Kerene i Haman niwiting su rihi kụ nạung nirarisị e waugi Mordekhai. Nal᷊iung ene e wuhụewe nal᷊ěda ral᷊angehu ratu e.