Read Sangir SASĚBANG 1 Bible Online

SASĚBANG 1 - Sangir bible

SASĚBANG 1

¹ I Yakub nạung isẹ̌sěbạ lai si Israel nakoạ sol᷊ong Misirẹ̌ dingangu manga anạe dingangu manga ral᷊ohom balagi sire sěmbaụ-sěmbaụ. Manga anạ i Yakub ene ute kai:

²I Ruben Simeon Lewi Yehuda

³I Isakar Zebulon Benyamin

⁴Dan Naftali Gad Asyer.

⁵Pal᷊ahiten Yakub kěbị-kěbị e pitum pul᷊o su kataune. Nạung piạ i sire nakoạ sol᷊ong Misirẹ̌, i Yusup sen těbe paị sene kal᷊amona.

⁶Sarạeng i Yusup dingangu manga anạ u sěmbaụ e nate e dingangkeweng apang sěngkal᷊awạ dingange.

⁷ Arawe pal᷊ahěnton sire kụ kai tau Israelẹ̌ e něhanạ nẹ̌pulung mal᷊awọ-l᷊awọ, kụ dingangu masahawụ nahuntinambang kakěpal᷊e, hakịu wanuang Misirẹ̌ e napenẹ i sire.

⁸ Mase piạ sěngkatau ratu wuhu kụ běgawen Yusup nanětạ nẹ̌parenta su Misirẹ̌.

⁹I sie nẹ̌berạ e su kawanuane, ”Tau Israelẹ̌ ene e makasilakạ kahěngang si kitẹ e, ual᷊ingu i sire kai něngalembong kal᷊awọe ringangu něngalembong katoghase woʼi kitẹ e.

¹⁰ Manga andene piạ sekẹ mariadi ute kai piạ lěsabu i sire mẹ̌těngkal᷊aụ dingangu rokạ baugu rumokạ si kitẹ bọu ene tumal᷊ang maněntang u[1] wanua ini. I kitẹ e harusẹ̌ mẹ̌deạ dal᷊engu tadeạu i sire kumbahangbe lai makoạ něngalembong kal᷊awọe lai.”

¹¹Tangu tau Misirẹ̌ e něnduịeng měndariagạ tau Israel mědeạu mapakasigěsạ u pẹ̌bawiahʼi sire ringangu hal᷊ẹ̌ masasěgadẹ̌. I sire sẹ̌sihasaěng u pěmẹ̌mangung soang Pitom dingangu Raamses baugu ratum Misirẹ̌ mědeạu kapěndesokang u manga rarotong.

¹²Maning tau Israel sahuneng sẹ̌sigẹ̌sakengu tau Misirẹ̌, kai tau Israelẹ̌ e mang sahuneng kạpahuntinambane kal᷊awọe, dingangu mangkeng kapẹ̌sẹ̌sawuhe su kaguwạu wanua ene, hakịu tau Misirẹ̌ e měngkatakụ i sire.

¹³Bọu e i sire mangkeng měnẹ̌nědạ tau Israel marasai,

¹⁴mase makạdiadi pẹ̌bawiahʼi sire e masunsara. Tawẹ piruane i sire ipẹ̌munara masasěgadẹ̌ su manga kal᷊iandagu pamangunang dingangu su pělahěnsinuangeng.

¹⁵Bọu ene ratuʼm Misirẹ̌ e nẹ̌parenta si Sifra rẹ̌duam Pua, biang duang katau mẹ̌tatul᷊ung u manga wawinen tau Ibrani měmpẹ̌hěnding.

¹⁶Angkuěngu ratum Misirẹ̌ u, ”Su tempong i kamene mẹ̌tul᷊ung u wawinen tau Ibrani e měhěnding, pẹ̌tahěndungko ini: Kereu piněhěnding ene kawe rariọ esẹ, patẹ e i sie! Kereu rariọ piněhěnding ene kawe wawine ute walạekere wiahẹ̌.”

¹⁷Arawe biang darua ene kai mạtakụ u Mawu Ruata. I rẹ̌dua madiri tumuhụ parentan datu, mase manga rariọ esẹ kinawantelẹ̌ e niwala wiahẹ̌.

¹⁸Tangú ratu e nẹ̌kuị e biang darua ene kụ nakiwal᷊o, ”Kawe unụ e i rua napakawalan manga rariọ esẹ e wiahẹ̌?”

¹⁹Sasimbang i rẹ̌dua, ”Bawineng Ibrani e wal᷊inewe kere wawineng Misirẹ̌. I sire kai limembong mapia mamantelẹ̌. Tental᷊ang biang den tawe nạsongo, dariọ seng nawantelẹ̌.”

²⁰Tangú Mawu Kasěllahenge něngal᷊amate manga biang ene ore nẹ̌gěllịu pal᷊ahěnto si rẹ̌dua puhinengu i rẹ̌dua e něngadatẹ̌ Mawu. Mase tau Israelẹ̌ sahuneng kakạl᷊awọe ringangu kakạtoghase.

²² Mase ratu e saụewe nangonggọu parenta kapia su patikụ kawanuane, ”Apang manga anạ u tau Ibrani esẹ buhụ piněhěnding e harusẹ̌ děmmẹ su Sal᷊ụ u Nil, arawe kěbị anạ i sire kụ bawine ute walạ e kạtatanạ biahẹ̌.”