Read Sangir SASĚBANG 10 Bible Online

SASĚBANG 10 - Sangir bible

SASĚBANG 10

¹MAWU e něhengetang si Musa, ”Dakọko pẹ̌těngon datu. Iạ e seng napakariadin sie ringangu manga mapapangkatẹ̌ e matatul᷊ikětị, tadeạu Iạ makapẹ̌koạbe kal᷊awọu karal᷊inaụ sutal᷊oaran sire,

²dingangu tadeạu i kau makapẹ̌běke su manga anạ pulungu kereapa Iạ napẹ̌taghunalangu tau Misirẹ̌ e ringangu haghing karal᷊inaụ ene. Tangú i kamene kěbị sarung masingkạ u kai Iạ e MAWU.”

³Bọu e i Musa rẹ̌duang Harun tamai nẹ̌těngon datu kụ nẹ̌bera si sie, ”MAWU, Ruatang tau Ibrani e nẹ̌bera, ’Sarang kạděngụ e i kau tawe tumuhụ si Siạ? Apakawalạ e umatẹ̌-Ku e apasěbang, tadeạu i sire makapẹ̌kal᷊iomaneng si Siạ.

⁴Kereu i kau mang bědang lai tawe mapakawala e ute, tangu rịěllo sarung Takụ aparěnta kal᷊imbotong su wanuang kamene.

⁵Kěbị bowong ěntana e sarung mahěmbung u kal᷊imbotong kahiang kal᷊awọe ene. Patikụ lěmbeng sasuang sarang manga kakaluang kụ tawe nagholọ u tahiti watu e, sarung upuangu kal᷊imbotong ene.

⁶Istanang kamene, manga wal᷊eng mapapangkatẹ̌ dingangu wal᷊eng kawanua e sarung mapenẹ u kal᷊imbotong. Hombang ini e sarung něngalembong kasigěsạ e wọu apang kụ seng bọu nihombangu manga i upung i kamene.’ ” Bọu e i Musa něbihu kụ napul᷊ẹ.

⁷Něberạe mapapangkatẹ̌ e su ratu, ”Sarang kạděngụ e tau ěndaị e harusẹ̌ mapakasigěsạ i kitẹ? Dolohe kěbị tau Israelẹ̌ e apatamai apẹ̌tahamawu su Mawu Ruatan sire. Kakěllạ e wanuang kitẹ ini e seng naghagholang!”

⁸Tangú i Musa rẹ̌duang Harun kinuiang kapia pinẹ̌těngon datu. Angkuěngu ratu si sire, ”I kamene wotonge tamai mẹ̌kal᷊iomaneng su Mawu Ruatanu. Kaiso i sai-sai wọu tal᷊oarang kamene matamai?”

⁹I Musa simimbang, ”I kami kěbị baewe mangudạ arau lai maghurang. I kami sarung mẹ̌bawa anạ i kami kěbị, kěbị sapi, domba ringangu kambing i kami, batụu i kami harusẹ̌ mẹ̌koạ sěmbaụ pěmamantugẹ̌ masaria waugu měngadatẹ̌ MAWU.”

¹⁰Angkuěng u ratu, ”Tawe mariadi iạ mapakawalang kamene mẹ̌bawa manga wawine ringangu manga anạ i kamene! Rẹ̌dorongang i kamene ene měngkate mẹ̌sul᷊ungu mělẹ̌harapẹ̌ si siạ mẹ̌dorong tadeạu MAWU e měngal᷊amatẹ̌ si kamene. Seng nal᷊ahẹ si siạ u i kamene piạ karaking kamene ral᷊akisẹ̌.

¹¹Tala wue! Kětạeng manga esẹ botonge tamai mẹ̌kal᷊iomaneng su MAWU, kereu i kamene mambeng lụěnningu mẹ̌kal᷊iomaneng samatang!” Kụ kahiang bawera tamai tangu i Musa rẹ̌duang Harun nitokol᷊ẹ̌ bọu istana.

¹²Bọu e MAWU e něhengetang si Musa, ”Běteko takiahu pakal᷊antehẹ̌ su wowong banuang Misirẹ̌. Kụ kal᷊imbotong mal᷊awọe sarung duměnta mahungkinạ kal᷊awọu sasuang bědang nal᷊ěmbe samurin tahiti watu.”

¹³I Musa něhengkẹ tekinge kụ MAWU naparěntang angingu raki timiụ su wanua ene sěhěllo sěhěbi. Kụ maranịeng maěllo anging ene nakawawạ e kal᷊imbotong

¹⁴ kụ seng tawe ikawera kal᷊awọe hakịu kaguwạu wanua e měngkate apa napenẹ. Kụ taumata e nạungbe wědang tawe nakahombang kereng kal᷊awọe kere su sěhěllo ene, mase wọu ene tangu hal᷊ẹ̌ kerene semben tawe saụ mariadi.

¹⁵Kawěnahu wowon dunia ene měngkate natukusu kal᷊imbotong sarang pandaěng měngkate naitung. I sire mạhungkaěngkewe kal᷊awọe sạbarang apan tawe nagholọ u tahiti watu e, kerẹewe manga wuang kalu. Su kạguwạu ěntanang Misirẹ̌ tawẹ apa reng manga raukalu arau wuane kụ nal᷊ěmbe su manga kalu arau sasuang.

¹⁶Datu e měngkai lighạ nẹ̌kui si Musa rẹ̌duang Harun kụ nẹ̌bera, ”Iạ ini e kai seng nẹ̌dosa su těngon MAWU Ruatanu ringangu su těngong kamene.

¹⁷Ampungeko rosaku sěnsul᷊e ini, ringangu pẹ̌kal᷊iomanengko su MAWU Ruatanu, tadeạu i Sie mapakal᷊iung iạ bọu hukumang makapate ini.”

¹⁸I Musa naněntangu ratu kụ nẹ̌kal᷊iomaneng su MAWU.

¹⁹Tangu MAWU e němal᷊eohẹ̌ timonang anging kụ nakoạ angingu wahẹ maihạ-ihạ. Manga kal᷊imbotong ene nitiụ u anging kụ bọu ene niwawa sol᷊ong Laudu Lěntuwu.[9] Kadiongeng sarang sěmbaụ kai manga tawẹ u natěntang su kạguwạu ěntanang Misirẹ̌ e.

²⁰Kaiso MAWU e napakariadin datu e nẹ̌tungkětị u těmbọ e, kụ sie tawe napakawalan tau Israel mapul᷊ẹ.

²¹MAWU e něhengetang si Musa, ”Hengkẹko takiahʼu taraị, tangú ěntanang Misirẹ̌ e sarung mal᷊iwungu kararěndung nẹ̌kětung.”

²² I Musa něhengkẹ e takiahe taraị, kụ karěngụ u těllu ěllo kasěllahu ěntanang Misirẹ̌ e nal᷊iwungu kararěndung nẹ̌kětung.

²³Tau Misirẹ̌ e tawe makasilo apa-apa ringangu karěngụ u tempo ene tangu tawẹ u sarang sěngkatau makapẹ̌daral᷊eng. Kaiso su apạeweng bal᷊en tau Israelẹ̌ tatapẹ̌be matualagẹ̌.

²⁴Bọu ene ratu nẹ̌kui e si Musa kụ něbera, ”I kamene wotonge tamai pẹ̌kal᷊iomaneng su MAWU Ruatang kamene. Apang manga wawine ringangu manga rariọ, botonge mahuntol᷊e. Arawe sapi, domba ringangu kambing i kamene tawe wotonge wawaěng.”

²⁵I Musa simimbang, ”Kamageng kerene i Tuangku harusẹ̌ měngonggọ si kami binatang lẹ̌hikinang makoạ sasěmba ringangu waugu sasěmba tẹ̌tongkateng su MAWU, Ruatang kami.

²⁶Kěbị binatang pẹ̌piaraěng i kami e harusẹ̌ bawaěng i kami kụ tawẹ u sarang sěmbaụ itěntang i kami. Bọu binatang ene i kami němile měnsang sude koateng sasěmba su MAWU Ruatang kami. Buhụ e paị sene i kami makakasingkạ u binatang sude koateng sasěmba.”

²⁷MAWU e saụ napakakětị u naungu ratu hakịu i sie madiri mapakawalan tau Israel suměbang.

²⁸Angkuěngu ratu si Musa, ”Pěmensọ e wọu těngoku! Kumbahang iạ delaing makasilo si kau kapia! Mạeng kụ iạ delaing makasilo ghatinu, i kau sarung mate!”

²⁹”Kerẹewe niweran Tuangku,” angkuěng i Musa, ”I Tuangku nal᷊ahẹu semben tawe saụ makasilo si siạ.”