Read Sangir SASĚBANG 11 Bible Online

SASĚBANG 11 - Sangir bible

SASĚBANG 11

¹MAWU něhengetang si Musa, ”Iạ sarung saụ mapakanawon sěmbaụ papahang su ratung Misirẹ̌ dingangu kawanuane. Bọu ene i sie wuhụ e mamalang kamene apasěbang. Mase lai i kamene kěbị sarung itokol᷊ẹ̌ bọu ini.

²Ual᷊ingu ene pẹ̌bisarạ e ringangu tau Israelẹ̌; kụ dolohẹ̌ko i sire apẹ̌dorong dal᷊ěgahẹ̌ bọu wul᷊aeng, dingangu sal᷊aka wọu manga lampung i sire.”

³MAWU napakariadin tau Misirẹ̌ e mal᷊ondo su tau Israel. Kụ i Musa nakoạ taumata lẹ̌adateng mapia kahiang mapapangkatẹ̌ dingangu kal᷊awọu kawanuang Misirẹ̌.

⁴I Musa nẹ̌bera su ratu, ”U kai kere ini hengetangu MAWU, ’Mangạe kẹ̌kal᷊oarane Iạ sarung měměpidẹ̌ ěntanang Misirẹ̌.

⁵Apạeweng manga anạ esẹ i akang su Misirẹ̌ e sarung mate, manětạ bọu anạ u ratung Misirẹ̌ sarang manga anạ u ěllang bawine kụ měmpẹ̌gěnggiling gandung. Pěgol᷊eweng kal᷊awọu binatang pẹ̌piaraěng humotong ihanạ mal᷊aing mate.

⁶Su kạguwạu Misirẹ̌ e sarung ikaringihẹ̌ tingihu sasangị marehe, kere tabidạu ren tawe nạdiadi ringangu sarung tawe lai mariadi.

⁷Arawe su ghal᷊ipohong Israelẹ̌ e, baewe taumata araụewe lai manga binatang ute tawe lai sarung kasenggehang. Tangú i kamene sarung masingkạ u Iạ MAWU, mẹ̌koạ pẹ̌dal᷊ahaedẹ̌ bọu tal᷊oarang tau Misirẹ̌ dingangu tau Israelẹ̌.’ ”

⁸Pěngensueěnge i Musa nẹ̌bera, ”Kal᷊awọu mapapangkatʼi Tuangku sarung duměnta kụ mẹ̌tumpěkuhẹ̌ su těngoku kụ mẹ̌gausẹ̌ tadeạu iạ dingangu bansaku měněntangu wanua ini. Bọu ene iạ sarung suměbang.” Bọu e i Musa nẹ̌bawal᷊uang tạ sihinge kụ naněntangu ratu.

⁹MAWU e něhengetang si Musa, ”Datu e tawe mẹ̌tiahang baweranu, tadeạu Iạ makapẹ̌koạ kal᷊aherang su kasěllahu Misirẹ̌.”

¹⁰I Musa rẹ̌duang Harun nẹ̌koạ patikụ kal᷊aherang ene su těngon datu, kaiso MAWU napakakětị u naunge, hakịu i sie madiri mapakawalan tau Israel maněntangu wanuane.