Read Sangir SASĚBANG 12 Bible Online

SASĚBANG 12 - Sangir bible

SASĚBANG 12

¹ MAWU e něhengetang si Musa rěduang Harun su ěntanang Misirẹ̌. AngkuěngʼE,

²”Bul᷊ang ini makoạ bul᷊ang kahumotongange su ral᷊ungu sěntaung.

³Apakasingkạko parenta ini su patikụ umatu Israel: Su tanggalẹ̌ kapul᷊one wul᷊ang ini, suapạeweng sěngkatau esẹ harusẹ̌ měmotọ anạ u domba sěmbaụ mědeạu kinaseng i sire sěmbalagheng.

⁴Kereu ral᷊ohon sěmbalagheng ene tumanịu mahal᷊i, baugu pěngěnsue anạ u domba sěmbaụ, tangu balagẹ̌ ene wotonge mẹ̌tatamba ringangu manga lampung karaniange kuminạ anạ u domba ene. Anạ u domba ene harusẹ̌ ipẹ̌pahiạ tumuhụ kal᷊awọu taumata mahungkinạ.

⁵I kamene wotonge měmile domba arau kambing, katewe harusẹ̌ esẹ, umbure sěntaung dingangu tawẹ kurange.

⁶I kamene harusẹ̌ měndesọ ene sarang tanggalẹ̌ kapul᷊o ěpạ e. Su ěllo ene, kụ nawawěllọ e, patikụ umatʼu Israel harusẹ̌ měmotọ anạ u domba ene.

⁷Pěngal᷊ạ dahane kadodọ kụ buha su rihine rarua su sasuěkang u wal᷊e su wowone rasị tampạ i sire mahungkaěng.

⁸Su hěbi ěndaị ene lai gěsine harusẹ̌ tapaěng kụ kinaseng ipěnděling borotẹ̌ tawe kabọ e dingangu rukụ mapaị.

⁹Anạ u domba ene harusẹ̌ tapaěng tiwatu ringangu těmbọ e, laede ringangu lohong tiange. Kinạ e ghẹ̌sine wọu tinapa ene, kụ kumbahangbe kinaseng tamatạ arau tuěngang.

¹⁰Kumbahangbe piạ u ilěmbe sarang kadidị bọu ghěsine sarang mal᷊ukadẹ̌; mạengu piạ lěmbene harusẹ̌be pakasue pakatutung.

¹¹Su tempong mahungkaěng i kamene harusẹ̌ seng bọu něluheng pakeang nasukụ baugu sadiang dumal᷊eng, dingangu sandalẹ̌ e su laedẹ̌ dingangu těking su l᷊ima. Kụ i kamene harusẹ̌ pakarol᷊ạ kumaěng. Kụ kai ene isẹ̌sẹ̌bạ pěmamantugu Paskah waugʼu ipěngadatẹ̌ si Siạ, MAWU.

¹²Batụu su hěbi ene, Iạ sarung měměpidẹ̌ kasěllahu ěntanang Misirẹ̌, dingangu měmate apang manga rariọ esẹ kaiakanenge, baewe taumata arau lai binatang. Iạ hědo měhukung kal᷊awọu ruata wal᷊ine su Misirẹ̌, u kai Iạ e MAWU.

¹³Daha su sasuěkangu wal᷊eng kamene, sarung mariadi tanda wọu kal᷊awọu wal᷊e pětẹ̌tanakeng i kamene. Kereu Iạ makasilo raha ene, i kamene Takụ lihiang dingangu tawe Takụ binasaěng su tempọeweng Iạ měhukungu tau Misirẹ̌.

¹⁴ Ěllo ene harusẹ̌ tahěndungeng kamene kere ěllo masaria waugu MAWU. Mase ěllo ene harusẹ̌be bantugeng kamene apan taung.”

¹⁵MAWU e něhengetang, ”Pitu ěllo karěngụ e i kamene tawe wotonge kumaěng borotẹ̌ piạ kabọ e. Su ěllo humotong kěbị kabọ harusẹ̌ isěbang bọu wal᷊eng kamene, u kereu karěngụ u pitu ěllo ene pẹ̌sěngkatau e kumaěng borotẹ̌ piạ kabọ e, i sie tawe wotonge lai ikoạ kere ral᷊ohong umatẹ̌-Ku.

¹⁶Su ěllo humotong, dingangu lai su ěllo kapitune i kamene harusẹ̌ pẹ̌tampung kụ pěmpẹ̌tahamawu. Su ěllo ene i kamene tawe wotonge měmpẹ̌koạ hal᷊ẹ̌ i kamene apa-apa tabeạu katewe apang hinong diahiang baugu kakaěng.

¹⁷Su sěhěllo ene patikụ bansanu Takụ iapasěbang bọu Misirẹ̌. Ual᷊ingu ene wọu ene, apan taung ěllo ene harusẹ̌be tahěndungangbeng kamene kere ěllo masaria.

¹⁸Su ral᷊ungu wul᷊ang humotong, manětạ bọu tanggalẹ̌ kapul᷊o ěpạ e hěbi, i kamene sarang tanggalẹ̌ karuam pul᷊o ěsane hěbi, i kamene tawe wotonge kumaěng borotẹ̌ piạ kabọ e. Karěngụ u pitu ěllo ene kal᷊awọe kabọ harusẹ̌ isěbang bọu wal᷊eng kamene. Tau Israel arau tau raghị kụ karěngụ u pěmamantugẹ̌ ěllo e kụ kimaěng borotẹ̌ piạ kabọ e ute semben tawe nirekeng umatẹ̌-Ku.”

¹⁹

²⁰

²¹I Musa nẹ̌kui kěbị těmbonangu Israel kụ nẹ̌bera si sire, ”Dakọ e kụ pěngal᷊ạko waugu ral᷊ohom bal᷊enu anạ u domba sěmbaụ baugu sal᷊imbangu Paskah.

²²Pěngal᷊ạko rěmpugu ěhe sěngikị, kụ laehẹ̌ko su ral᷊ungu loyang piạ lohone[10] rahang domba ene, kụ buhako su sal᷊awakung pintu ringangu su walaku pintum bal᷊enu wowone rasị. Sarang mal᷊ukadẹ̌ e kumbahang piạ u sěngkatau wọu tal᷊oarang kamene měněntang u wal᷊e.

²³ Su tempong MAWU e měměpidẹ̌ banua ini kụ měmate tau Misirẹ̌ e, MAWU sarung makasilo raha su sal᷊awaku rarua ringangu su walaku pintum bal᷊enu wowone rasị; tangú i Sie sarung tatapẹ̌ lumihi kụ tawe mapakawalang Malaekatu Papate sumuẹ̌ su wal᷊enu kụ měmate si kamene.

²⁴I kamene ringangu manga anạ i kamene harusẹ̌be tuhụ parenta ene sarang marěngụ-děngụ.

²⁵Kamagengu i kamene seng makasuẹ̌ su wanua kụ nikědong MAWU si kamene, ute i kamene harusẹ̌be pẹ̌koạ pěmamantugẹ̌ Paskah ini.

²⁶Kamagengu manga anạ i kamene makiwal᷊o, ’Kai apa mangal᷊ene hal᷊ẹ̌ tamai ini e?’

²⁷I kamene harusẹ̌be simbang u, ’Ini e kai gaghěllị baugu Paskah ipěngadatẹ̌ MAWU, batụu wal᷊eng patikụ taumatang Israelẹ̌ su Misirẹ̌ e nilihiangʼE, piạ i Sie měmate manga rariọ esẹ i akang anạ u tau Misirẹ̌, arawe i kitẹ e nipakawalanʼE wiahẹ̌!’ ” Tangú nẹ̌tumpěkuhe tau Israel apidu němpẹ̌suba su Mawu.

²⁸Bọu e i sire kụ němpẹ̌koạ e apang kụ niorong MAWU si Musa rẹ̌duang Harun.

²⁹ Tangú su mal᷊oarang hěbi ene MAWU e napakapateng kěbị manga anạ u tau Misirẹ̌ esẹ i akang, nanětạ bọu anạ u ratu, sarang manga anạ u taumatan tahungkụ. Kěbị binatang pẹ̌piaraěng ipěhanạ humotong mal᷊aing pateěng.

³⁰Hebi ene ratu, mapapangkatẹ̌ dingangu kěbị tau Misirẹ̌ e nẹ̌kělạ e. Su kaguwạu wanuang Misirẹ̌ e kinaringihe sasangị masaria batụu tawẹ apa wal᷊e sarang sěmbaụ kụ tawẹ papaten sěngkatau anạ esẹ.

³¹Hěbi ene lai, ratu nẹ̌kui si Musa rẹ̌duang Harun kụ něhengetang, ”Pěngensọ e wọu ini i kamene kěbị! Těntangke wanuaku! Dakọ e pẹ̌tahamawu su Mawu Ruatanu kere rẹ̌dorongang i kamene.

³²Bawạ e kal᷊awọu sapi, domba ringangu kambing i kamene kụ dakọ e! Dorongeko l᷊ai al᷊amatẹ̌ baugu iạ.”

³³Tau Misirẹ̌ měngẹngosạ tau Israel pakalighạ-lighạ apạněntangu wanua ene. Angkuěng i sire, ”I kami kěbị sarung mate kamagengu i kamene tawe mapul᷊e!”

³⁴Mase tau Israelẹ̌ e němpěngal᷊ạ e manga pantisʼi sire piạ lohone borotẹ̌ tawe kabọ e, nipikunge ringangu hekạ kụ nipasaěng.

³⁵ I sire mal᷊aing bọu němpẹ̌koạ apang niwerang Musa kụ mẹ̌dẹ̌dorong dal᷊ěgahẹ̌ bul᷊aeng dingangu sal᷊aka ore lai pakeang bọu tau Misirẹ̌.

³⁶MAWU e napakariadin tau Misirẹ̌ e mal᷊ondo su tau Israel, hakịu i sire dẹ̌dorongang u tau Israel. Kụ ual᷊ingkeng pẹ̌kakoạ kerene tangu tau Israelẹ̌ e nẹ̌bawạ e kakakalạ u tau Misirẹ̌ e pinakasěbang bọu wanua ene.

³⁷Tau Israelẹ̌ e rimal᷊engke kụ němpẹ̌lěngang bọu soang Raamses sol᷊ong soang Sukot. Kal᷊awọʼi sire 600.000 su kataune tawe narekeng manga wawine ringangu manga rariọ.

³⁸I sire nẹ̌bawa sapi, domba ringangu kambing mal᷊awọ. Piạ lai tau raghị mal᷊awọ natol᷊e si sire.

³⁹I sire němpẹ̌tongkạ borotẹ̌ tawe kabọ e bọu tapoěng nikaugʼi sire wọu Misirẹ̌. I sire nitokol᷊ẹ̌ bọu ene nipẹ̌sasahonsange hakịu tawe nakasadia sinasạ i sire.

⁴⁰ Tau Israel seng nẹ̌tanạ su Misirẹ̌ 430 su taunge karěngụ e.

⁴¹Su ěllo pěngěnsueěnge taung kaěpạ u hasụ těllum pul᷊one ene, kal᷊awọu wuntuangu umatʼu MAWU e naněntangu wanuang Misirẹ̌.

⁴²Hěbi ene lai MAWU e turusẹ̌ mẹ̌dẹ̌dal᷊ukadu měngěntudʼi sire pasěbang bọu Misirẹ̌. Kụ mal᷊aing hěbi ene waugu sarang karěngụ e isěmba su MAWU kere hěbing pẹ̌tatahěndungang. Su hěbi ene umatu Israel harusẹ̌ mẹ̌dẹ̌dariagạ.

⁴³MAWU e něhengetang si Musa rẹ̌duang Harun, ”Seng ini e atorangu pěmamantugẹ̌ Paskah. Tau raghị e tawe wotonge kuminạ ghěsin domba su tempong Paskah.

⁴⁴Arawe ěllang kụ niwělliang i kamene wotonge apakaěng dingang kereu seng bọu nisunatẹ̌.

⁴⁵Taumata raghị arau mantorosẹ̌ e tawe wotonge apakaěng dingang.

⁴⁶ Kěbị gěsin domba e harusẹ̌ kinạ su ral᷊ungu wal᷊e, tawe wotonge isěbang. Duhine kumbahangbe piạ u sěmbaụ pẹ̌papẹ̌diang.

⁴⁷Kal᷊awọu umatʼu Israel harusẹ̌ měmantugẹ̌ sal᷊iwang ene.

⁴⁸Taumata tawe nisunatẹ̌ tawe wotonge kumaěng kaěngu sal᷊iwang ene. Kereu sěngkatau raghị kụ seng marěngụ anung kamene kụ mapulu měmantugẹ̌ Paskah mědeạu měngadatẹ̌ si Siạ, MAWU, apang manga esẹ narekeng balage, harusẹ̌ kakal᷊imonaěnge isunatẹ̌. Bọu ene i sire ikoạ kere taumatan Israel tutune, kụ botonge makatol᷊e ringang su pěmamantugẹ̌ Paskah.

⁴⁹Atorange mẹ̌sul᷊ungu mariadi waugu taumatang Israel tutune ringangu tau raghị kụ marěngụ dingang i kamene.”

⁵⁰Kěbị taumatang Israel mararingihẹ̌ dingangu mẹ̌kẹ̌koạ kal᷊awọu apang niparentang MAWU si Musa rẹ̌duang Harun.

⁵¹Su ěllo ěndaị ene MAWU nẹ̌bawa kal᷊awọu umatʼu Israel niapasěbang bọu Misirẹ̌.