Read Sangir SASĚBANG 13 Bible Online

SASĚBANG 13 - Sangir bible

SASĚBANG 13

¹MAWU e něhengetang si Musa,

² ”Koạko sasěmba patikụ anạ esẹ kaiakanenge si Siạ. Apang anạ u tau Israel esẹ kaiakanenge ringangu apang binatang piara esẹ piněhanạ kahumotongange ute kai tataghuaneng-Ku.”

³I Musa něhengetang su tau Israel, ”Su sěhěllo ini MAWU e napakal᷊iwirʼi kamene ringangu kawasa-Ne masaria, hakịu i kamene nakasěbang bọu Misirẹ̌, tampạ i kamene pinẹ̌tahuěllang. Ual᷊ingu ene tahěndungeko ěllo ini. Kumbahangbe kumaěng borotẹ̌ piạ kabọ e.

⁴Sěhěllo ini, tanggalẹ̌ humotong bul᷊angu Abib arau wul᷊ang humotong, i kamene naněntangu Misirẹ̌.

⁵Dingangu pẹ̌salu MAWU e nẹ̌diandi su manga i upung i kamene mědeạu měnarakangu wanuang Kanaan si kamene, wanuang Het, Amori, Hewi ringangu Yebus. Samuring MAWU e nẹ̌bawa si kamene sol᷊ong banua kalạ dingangu matawa ene, apan taung su wul᷊angu Abib, i kamene harusẹ̌ mẹ̌koạ sal᷊imbang ini.

⁶Karěngụ e pitu ěllo i kamene harusẹ̌ kumaěng borotẹ̌ tawe kabọ e dingangu su ěllo kapitune harusẹ̌ mẹ̌koạ pěmamantugẹ̌ baugu měngadatẹ̌ MAWU.

⁷Karěngụ u pitu ěllo i kamene tawe wotonge kumaěng borotẹ̌ piạ kabọ e, dingangu su kasěllahu wanuang kamene tawe wotonge piạ kabọ arau walạewe apa kụ piạ kabọ e.

⁸Su panẹ̌takengu pěmamantugẹ̌ ene i kamene harusẹ̌ mẹ̌běke su manga anạ i kamene esẹ u kěbị ene koạ i kamene ual᷊ingu kal᷊awọu apang kụ seng nikoạ MAWU waugʼi kamene su tempong i kamene naněntangu wanuang Misirẹ̌.

⁹Pěmamantugẹ̌ ini makoạ laingatẹ̌ baugʼi kamene mẹ̌sul᷊ungu tatiala kụ nilaikị su l᷊ima ringangu su rěhụ u. Pěmamantugẹ̌ ini mapẹ̌tahěndung i kamene mědeạu turusẹ̌ měnuturẹ̌ dingangu měngěndung manga titam MAWU, batụu MAWU e naněbang i kamene wọu Misirẹ̌ dingangu kawasanʼE masaria.

¹⁰Bantugeko sal᷊iwang ini e su apan taung su tempo kụ seng nitantu.”

¹¹Musa nẹ̌bera su tau Israel, ”MAWU e sarung měngěntudʼi kamene sarang Kanaan kụ niriandinʼE piạ salune si kamene ringangu su manga i upung i kamene. Samuring ěntana ene nakoạ tataghuanengu,

¹² i kamene harusẹ̌ měněmbang apang anạ esẹ i akang dingangu apam binatang piara esẹ piněhanạ kahumotongange. Kěbị ene tataghuanengu MAWU,

¹³arawe apang kalide esẹ kahumotongange pinẹ̌hanạ harusẹ̌ itubusẹ̌ bọu MAWU ringangu měnarakangu anạ u domba sěmbaụ kere awenge. Kereu i kamene mạdiri měnubusẹ̌ kalide ene, lehẹ e harusẹ̌be pědiang. Apang anạ u esẹ humotong piněhanạ harusẹ̌ i tubusẹ̌.

¹⁴Kereu su ěllo samuri anạu makiwal᷊o apa mangal᷊ene kěbị ene, i kamene harusẹ̌be sumimbahẹ̌ kere ini, ’Dingangu kawasa masěllahẹ̌ MAWU e nẹ̌bawa si kitẹ nipasěbang bọu wanuan Misirẹ̌, tampạ i kitẹ nipẹ̌tahuěllang.

¹⁵Piạ e ratung Misirẹ̌ nẹ̌tungkětị u naunge kụ mạdiri mamalang kitẹ pasěbang, MAWU e němate apan dariọ esẹ i akang su Misirẹ̌, baebe anạu taumata, arau anạ u binatang. Kai ene sěbapẹ̌ e hakịu i kitẹ měnarakangu apang anạ u binatang pẹ̌piaraěng esẹ humotong lahanạ su MAWU, arawe i kitẹ e kawe manubusẹ̌ manga anạ i kitẹ i akang.’

¹⁶Tundu ene makoạ tatahěndung baugʼi kitẹ kere tatiala kụ nilaikị su l᷊ima arau rěhụ i kitẹ e. Kụ ual᷊ingu kerene i kitẹ e sarung tatapẹ̌ ipẹ̌tẹ̌tahěndung u MAWU e seng naněbang i kitẹ bọu Misirẹ̌ dingangu kawasa masaria.”

¹⁷Samuring datum Misirẹ̌ e něměllọu tau Israelẹ̌ e nipasěbang, Duata e tawe nẹ̌bawa si sire bọu ral᷊eng sumaheng banuang Pilistin, manimbe ene ral᷊eng kanimbukange. Duata e mạngěnna, ”Kibasịu i sire ene mẹ̌sasěsilẹ̌ kereu makasilo u i sire harusẹ̌ mẹ̌sekẹ, kụ bọu ene mẹ̌sul᷊e sarang Misirẹ̌.”

¹⁸Ual᷊ingu ene Mawu nẹ̌bawa si sire limiu ral᷊eng mělikụ bọu wanua l᷊inggi sarang Laudu Lěntuwu.[11] Su tempong maněntangu Misirẹ̌, apan tau Israelẹ̌ e piạ aghide mẹ̌sul᷊ungu sarung mẹ̌sekẹ.

¹⁹ I Musa nẹ̌bawa kal᷊awọu ruhing Yusup, batụu karěngụ u pẹ̌bawiahe i Yusup něngoro tau Israel pinẹ̌salu mědeạu mẹ̌koạ kerene. Kere ini tatanatang Yusup, ”Su tempong Mawu mapakal᷊iwirʼi kamene, maietẹ̌ku e harusẹ̌be wawang kamene wọu tampạ ini.”

²⁰Tau Israel naněntangu Sukot kụ nẹ̌daseng su soang Etam, su wiwihu wanua l᷊inggi.

²¹Su tempong ěllo MAWU e rụdal᷊eng su těngon sire su ral᷊ungu rihi winawa ringangu su tempong hěbi i Sie mạngal᷊imona si sire su ral᷊ungu rihi putung baugu měnẹ̌bọu ral᷊eng. Kụ ual᷊ingu kerene i sire makakaral᷊eng baẹbe ěllo ringangu hěbi.

²²Kanandung ěllo rihi winawa ene su těngon bansa ene ringangu kanandung hěbi rihi putung mạněntanudẹ̌ si sire.