Read Sangir SASĚBANG 14 Bible Online

SASĚBANG 14 - Sangir bible

SASĚBANG 14

¹Bọu e MAWU něhengetang si Musa,

²”Dolohẹ̌ko tau Israel pẹ̌bal᷊ị kụ pẹ̌daseng su těngon soang Pi-Hahirot, su wěllạu soang Migdol dingangu Laudu Lěntuwu, maraning soang Baal-Zefon.

³Datung Misirẹ̌ sarung měngiral᷊ing u tau Israel kai kạpẹ̌palilị e su wanua ini ringangu nipalidẹ̌ su wanua l᷊inggi.

⁴Iạ sarung mapakariadin sie naunge makětị hakịu i sie měnahusu si kamene. Arawe Iạ e sarung mělahẹ u kawasa-Ku su ratum Misirẹ̌ dingangu sordadone, kụ i sire sarung masingkạ u kai Iạ e MAWU.” Mase tau Israel nẹ̌koạ kerẹewe niorong MAWU si sire.

⁵Piạ e ratum Misirẹ̌ nakaringihẹ̌ u tau Israel seng timal᷊ang, i sie ringangu manga mapapangkate nẹ̌sasěsilẹ̌ dingangu nẹ̌bera, ”Apạe koateng i kitẹ e? Unụe ipakawalang kitẹ e tau Israelẹ̌ e aparal᷊eng kụ i kitẹ e kailangengkeng manga ěllang?”

⁶Mase ratu e něndiahing karetan sekẹ dingangu těntarane.

⁷I sie nẹ̌buạ dingangu kěbị karetane, narekeng lai kareta karal᷊ěnggihange arěgang 600 kal᷊awọe sasakene mangạewe pěrwirane.

⁸Těngadẹ̌ MAWU e napakakětị u naungu ratu, hakịu i sie něnahusu tau Israel kụ apang kạdal᷊enge naněntangu wanua ene su al᷊ungu pěngangěllungu MAWU.[12]

⁹Těntarang Misirẹ̌ dingangu kawal᷊o, kareta ringangu sumasakene měnẹ̌nahusu tau Israel, dingangu nakatol᷊e si sire su pẹ̌darasengang i sire su apeng maraning Pi-Hahirot.

¹⁰Piạ e tau Israel nakasilo ratum Misirẹ̌ e ringangu těntarane narěnta, i sire apạ e něngkatakụ dingangu ghụgahiorọ su MAWU makịtul᷊ung.

¹¹Angkuěng i sire si Musa, ”Unụe su Misirẹ̌ ta apa kubul᷊ẹ̌, hakịu i kau měngkai mẹ̌bawa si kami pakapate su tampạ ini? Kakěllạ e aị u kakanoạu e!

¹²Nạung kal᷊imona su Misirẹ̌ e seng niwerang kami u hal᷊ẹ̌ ini e sarung mariadi! I kami e seng měnẹ̌nahěsẹ tadeạu i kau e abe pěnal᷊ukạ si kami, katewe mạpakawalang kami těbe makoạ ěllang su Misirẹ̌. Ěndokangbe makoạ ěllang paịse sul᷊ungu mate su wanua l᷊inggi ini!”

¹³I Musa simimbang, ”Abe katakụ! Pẹ̌tingkědangke! I kamene sarung makasilo apa kinoạ u MAWU mědeạu makasal᷊amatẹ̌ si kamene. Tau Misirẹ̌ kụ nikasilong kamene orasẹ̌ ini, sarung tawe ikasilong kamene kạpia.

¹⁴MAWU e sarung mẹ̌tawakal᷊i waugʼi kamene, kụ i kamene tawe wahal᷊uasʼu mẹ̌koạ apa-apa.”

¹⁵Angkuěngu MAWU si Musa, ”Unụe i kau kụkiạ u makitul᷊ung? Dolohe tau Israel aparal᷊eng turusẹ̌!

¹⁶Běteko těkingu kụ kuawako su wowong laudẹ̌. Kụ akẹ sarung mapěta kụ tau Israelẹ̌ e makal᷊iu laudẹ̌ kụ dimal᷊eng su wowone mamara.

¹⁷Tau Misirẹ̌ e sarung Takụ ipakakětị naunge hakịu i sire tawẹ ědone měnahusu tau Israel, kụ Iạ sarung měnodẹu kawasa-Ku waugu ratung Misirẹ̌, buntuange, manga karetane ringangu sasakene.

¹⁸Tangú tau Misirẹ̌ sarung masingkạ u kai Iạ e MAWU.”

¹⁹Tangú malạekatʼu Mawu, kụ su těngon buntuangu Israel, něngal᷊ing su watuhu l᷊ikude. Kụ něngal᷊ingke lai rihi winawa sarang naene.

²⁰Su tal᷊oarang buntuangu Misirẹ̌ dingangu wuntuangu Israel. Binawa ene mapạtimbul᷊u kararěndung,[13] hakịu kanandung hěbi buntuang darua ene e tawe makapẹ̌dararani.

²¹Bọu e i Musa němětẹeng limane sarang bowong laudẹ̌ kụ MAWU e napatiụ u angin daki maihạ hakịu laudẹ̌ e kimoho. Kanandung sěhěbi anging ene timiụ, kụ nakamara l᷊audẹ̌ e.

²² Akẹ napahiạ darua, dingangu su tempon tau Israel limiu l᷊audẹ̌, i sire rụdal᷊eng su wal᷊ahuange kụ mamara, ringangu akẹ su kaihi arau su koanenge mạngawẹ meselẹ̌.

²³Tau Misirẹ̌ dingangu kěbị kawal᷊o, kareta ringangu sumasakene měnẹ̌nahusu turusẹ̌ dingangu timol᷊e tau Israel sarang tal᷊oarang laudẹ̌.

²⁴Kakạdanineng běmbanaho MAWU e tụtingang bọu rihi putung dingangu rihi winawa si sire těntarang Misirẹ̌ kụ napẹ̌gonggạ i sire.

²⁵I Sie napakakětị u manga rodang karetan sire hakịu ringangu sunsara i sire makakatěnung. Angkuěngu tau Misirẹ̌, ”MAWU e mẹ̌kẹ̌karadiahang baugu tau Israel rumokạ si kitẹ. Bọete i kitẹ tumal᷊ang bọu ini!”

²⁶Angkuěngu MAWU e si Musa, ”Běteko limanu taraị sol᷊ong bowong laudẹ̌, kụ akẹ e sarung maul᷊ị kapia kụ makakawul᷊usẹ̌ tau Misirẹ̌, manga kareta ringangu manga sumasakene.”

²⁷Bọu e i Musa něměten limane taraị sol᷊ong bowong laudẹ̌ kụ su tempong mẹ̌běmbanaho, akẹ e saụ naul᷊ị kapia suěnnạ e. Tau Misirẹ̌ mẹ̌tẹ̌tawakal᷊i mapakaambang u watangeng, kaiso MAWU e napakawul᷊usʼi sire su ral᷊ungu laudẹ̌.

²⁸Sasị e němal᷊intuị kụ nělingkubẹ̌ manga kareta, sumasakene, ringangu kal᷊awọu těntarang Misirẹ̌ kụ něnahusu tau Israel sol᷊ong tal᷊oarang laudẹ̌, hakịu i sire nasue něngkapate.

²⁹Arawe piạ e tau Israel lụliun l᷊audẹ̌ e, i sire rụdal᷊eng su wal᷊ahuange kụ mamara, kụ akẹ e nakoạ kere meselẹ̌ su koaneng arau kaihin sire.

³⁰Su ěllo ěndaị ene, MAWU e něngambang tau Israel bọu pěngangalon tau Misirẹ̌, kụ i sire makạsilo manga maietu tau Misirẹ̌ e masampelẹ̌ su apeng.

³¹Piạ tau Israel nakasilo kereapa MAWU e ringangu kawasanʼE masaria e namatạ tau Misirẹ̌, i sire naherang tạ sihinge hakịu nangimang si Sie ringangu si Musa ěllangʼE ene.