Read Sangir SASĚBANG 15 Bible Online

SASĚBANG 15 - Sangir bible

SASĚBANG 15

¹ Bọu e i Musa ringangu tau Israel němpẹ̌kantarị u kantarị ini ipẹ̌dalo MAWU, ”Iạ mapulu mẹ̌kantarị baugu MAWU, batụu i Sie seng nakauntu masaria. Patikụ kawal᷊o ringangu sumasakene nirěmmẹʼE su ral᷊ungu laudẹ̌.

² MAWU e tumatatawangku matoghasẹ̌; seng i Sie napakasal᷊amatu iạ. I Sie Ruataku, iạ e mapulu mẹ̌dalo si Sie, Duata e rẹ̌daloěng i upung gaghurangku takụ bantugang i Sie.

³MAWU e kai mol᷊ensekẹ bahani, kụ kai MAWU e arengʼE.

⁴Těntarang Misirẹ̌ dingangu kal᷊awọu karetane nirěmmẹ su ral᷊ungu laudẹ̌. Manga pěrwira kụ limembong kahasane něngkawul᷊usẹ̌ su Laudu Lěntuwu.

⁵I sire niselohu laudẹ̌ maral᷊ung, kụ kere watu dimělusẹ̌ sol᷊ong běntane.

⁶Katoghasu e apạ e makạdal᷊inaụ MAWU! sekẹ e nasue pinẹ̌kal᷊iaesʼU.

⁷Dingangu kawawantugʼU masěllahẹ̌ pinakawihuanʼU kěbị apan dụdokạ si Kau. PědunʼU rụděllị kere putung, kụ mělẹ̌hengisẹ̌ si sire kere kalung ěmme mahěgu.

⁸Laudẹ̌ e tẹ̌tiukangʼU akẹ e mẹ̌tẹ̌těngkarul᷊ung marangẹ, dụdarisị matei kere meselẹ̌; hakịu wal᷊ahuangu l᷊audẹ̌ e botonge kal᷊iuang.

⁹Angkuěngu sědụ, ’I sire sarung takụ sahusuang dingangu takụ samekang, pedaku e takụ asaěng, mase i sire takụ ěnsueěng. Bọu e arětạ i sire takụ hampaseng, takụ ipẹ̌pahiạ dingangu takụ teěngang sarang pakasahe.’

¹⁰Arawe MAWU e ringangu sěngkasindạ botonge makakarěntang ěllon nahasẹ̌ baugu Misirẹ̌. I sire něngkawul᷊usẹ̌ kere timběha mawěhạ su ral᷊ungu ghal᷊ědụ u akẹ maihạ-ihạ.

¹¹Duata sude makaěpisẹ̌ si Kau, o MAWU Limembong Kawantugange ringangu susi e? Kai i sai makakoạ munara makạl᷊aherang dingangu masasaria kere ikẹ̌koạ u MAWU e?

¹²Nipẹ̌tarěpanʼU takiahʼU koaneng, kụ naupụ e sědụ niselohu wanua.

¹³NiahạʼU wansa kụ nipakasal᷊amatu ini e, u i Kau e satia su riandinʼU. Dingangu katoghasẹ̌ masaria niěllungʼU e i sire, dingangu niahạʼU sol᷊ong ěntananʼU susi.

¹⁴Manga wansa e nakaringihẹ̌ apidu kạkendene; tau Pilistin dingangu apan těmbonangu Edom e nẹ̌gěgahẹ̌. Tau Moab mal᷊ahasa e němpẹ̌gěgilẹ̌, tau Kanaan něngkadodọ naung i sire.

¹⁶I sire apạ e něngkatakụ marasai nẹ̌sahiding katoghasu MAWU. Piạ umatʼU e nasahe; sekẹ e tawe kawasa makasahaghe; nakal᷊ěsọ e wansa kụ nạung pinakal᷊iwirʼU e.

¹⁷Bọu e Israel niěntudʼU sol᷊ong tampạ nipilenʼU waugu katatanakengʼU. I sire němpẹ̌tanạ tatapẹ̌ su wul᷊udʼU susi e, su Wal᷊eku nipětịʼU hala e.

¹⁸Seng i Kau e MAWU, Ratu, kụ nẹ̌parenta sarang marěngụ-děngụ.”

¹⁹Su tempon tau Israel limiu laudẹ̌, i sire rimal᷊eng su mamarane. Arawe su tempong karetan tau Misirẹ̌ dingangu kawal᷊one, sarang sumasakene nasue nawunsal᷊ẹ̌ su ral᷊ungu laudẹ̌, kụ MAWU e napakaelehu akẹ e kapia hakịu i sire nawul᷊usẹ̌.

²⁰Bọu e i Miryam, sěngkatau nabi wawine, tuhang i Harun, něngal᷊ạ arabanạ e; kụ kěbị manga wawine timol᷊e lai něnengkelẹ̌ arabanạ apidu kapẹ̌sal᷊aine.

²¹I Miryam nẹ̌kantarị baugʼi sire, ”Pěmpẹ̌kantarị e waugu MAWU, batụu i Sie seng nakawatạ mapia-pia. Patikụ kawal᷊o ringangu sumasakene nirěmmẹ e sol᷊ong dal᷊ungu laudẹ̌.”

²²Bọu e i Musa nẹ̌bawa tau Israel wọu Laudu Lěntuwu mẹ̌tẹ̌timona wanuan Syur linggi e, gěnnangu těllu ěllo i sire rụdal᷊eng lụliu wanua l᷊inggi kụ tawe nakaěbạ akẹ.

²³Bọu e nahumpạ e i sire su tampạ isẹ̌sěbạ Mara,[14] arawe akẹ sene e mapaị-paị, hakịu tawe ikainung. Ual᷊ingu ene tampạ ene isẹ̌sěbạ Mara mangal᷊ene mapaị.

²⁴Tangú taumata sene měmpẹ̌sěsimbulung si Musa ringangu nakiwal᷊o, ”Apạ e inungang i kitẹ tangu?”

²⁵I Musa nẹ̌kal᷊iomaneng dingangu kasariang naung su MAWU, mase MAWU e napasilong kalu sěmpědi si sie. Kalu ene nirěmmẹ i Musa sarang dal᷊ungu akẹ, kụ bọu ene akẹ ene nalele, kụ ikainung. Sene MAWU e nẹ̌gěllịu tiahane si sire, kụ sene lai i Sie něnal᷊ukạ si sire.

²⁶Angkuěng u MAWU, ”Daringihewe pakapia-pia Iạ e, ringangu pěmpẹ̌koạbe apan Takụ ikasilo mapia; tuhuke wue kal᷊awọu tita-Ku. Kamagengu i kamene mẹ̌koạ kerene, i kamene tawe Takụ ihukungu haghin sakị kụ sen Takụ nipahombang su tau Misirẹ̌. Seng Iạ e MAWU e napakawalang kamene.”

²⁷Bọu ene i sire nahumpạ su tampạ isẹ̌sěbạ Elim. Sene piạ simbul᷊u akẹ mapul᷊o dua ringangu korma pitum pul᷊o su kalune. I sire němpẹ̌daseng su rěduhu akẹ ene.