Read Sangir SASĚBANG 16 Bible Online

SASĚBANG 16 - Sangir bible

SASĚBANG 16

¹Mase kal᷊awọu umatʼu Israel nẹ̌buạ bọu Elim, dingangu su tanggalẹ̌ kapul᷊o l᷊imane su wul᷊ang karuane samurin sire naněntangu Misirẹ̌, narěntạ e i sire su wanuan Sin kụ linggi e, su wěllạ u Elim dingangu Wul᷊udʼu Sinai.

²Su wanua l᷊inggi ene i sire kěbị němpẹ̌galumị si Musa rẹ̌duang Harun.

³Angkuěng i sire, ”Ěndokangbe nạung i kami e seng nate nipaten MAWU e su Misirẹ̌. Paịsene mẹ̌těngkahal᷊i i kami e seng botonge makakinạ gěsi ringangu makakaěng borotẹ̌ sarang mal᷊aedẹ̌. Arawe i kamene nẹ̌bawa si kami sini e tadeạu i kami kěbị maten lunusẹ̌.”

⁴ Angkuěngu MAWU e si Musa, ”Orasẹ̌ ini e Takụ pakatěntung kaěng pakaěnasẹ̌ kere tahiti, waugʼi kamene kěbị. Ěllo-ěllo i kamene harusẹ̌ pěngomol᷊ẹ̌ kaěng ene pakatimu waugu sěhěllo. Dingangu kakakoạ e kerene tangú Iạ mapulu mẹ̌manikạ umatẹ̌-Ku tadeạu Iạ masingkạ měnsang i sire mararingihẹ̌ bue su manga tita-Ku arau tala.

⁵Su ěllo kaěnnunge i sire harusẹ̌ měnampungu kaěng ene ruan sul᷊e limembong kal᷊awọe.”

⁶Tangú nẹ̌berạ e i Musa rẹ̌duang Harun su kěbị tau Israel, ”Bawěllo ini i kamene sarung masingkạ u kai MAWU e seng naněbang i kamene wọu Misirẹ̌.

⁷Diěllo mal᷊ukadẹ̌ i kamene sarung makasilo tualagu rarěntan MAWU. MAWU e nakaringihẹ̌ si kamene sụsimbulung si Sie, su MAWU arau ěng? batụu i kami ini tumbạeng mẹ̌kẹ̌koạ apang pẹ̌parentaěngʼE.

⁸MAWU e sarung měngonggọ u kinạ bawěllo, ringangu borotẹ̌ su tempong mal᷊ukadẹ̌ sarang i kamene mal᷊aedẹ̌, batụu MAWU e seng nakaringihẹ̌ si kamene sụsimbulung si Sie. Kụ mamben těngadẹ̌, kereu i kamene sụsimbulung si kami, ute i kamene kawe sụsimbulung su MAWU.”

⁹Bọu ene i Musa nẹ̌bera si Harun, ”Pěngoroko si sire kěbị apẹ̌těngon MAWU, batụu i Sie seng nakaringihẹ̌ simbulung i sire.”

¹⁰Deng i Harun kapẹ̌bisarane si sire kěbị, i sire němpẹ̌bihu sol᷊ong banua l᷊inggi, ute sěngkianu kinasilo tualagu MAWU su ral᷊ungu winawa.

¹¹Angkuěngu MAWU si Musa,

¹²”Iạ seng nakaringihẹ̌ simbulung u tau Israel. Paul᷊ịko si sire u mạeng bawěllo i sire wotonge kuminạ gěsi, arawe mạeng mal᷊ukadẹ̌ ute i sire wotonge kumaěng borotẹ̌ sarang mal᷊aedẹ̌. Tangú i sire sarung masingkạ u kai Iạ Mawu Ruatang sire.”

¹³Su tempong bawěllo narěntạe manụ mělle mal᷊awọ-l᷊awọ hakịu něnakạ kasěllahu pẹ̌darasengang, arawe namal᷊ukade tangu nitědokangken namuhẹ̌ nělikụewe pẹ̌darasengang.

¹⁴Ene namuhẹ̌ e namarạ e tangu kinasilọ e su wowom banua l᷊inggi piạ barang manipị kere onạ kụ al᷊usẹ̌ kere namuhẹ̌ nẹ̌kompelẹ̌.

¹⁵ Piạ e tau Israel nakasilo e, i sire wěgawue měnsang apa ene. Ené nakiwal᷊ọe i sire sěmbaụ su wal᷊ine, ”Kai a ene?” Bọu e i Musa nẹ̌bera si sire, ”Kai ene kaěng nionggọ u MAWU si kamene.

¹⁶MAWU e něngoro tadeạu sěngkatau-sěngkatau pěnampung kal᷊awọeweng gẹ̌gausang kụ pẹ̌tahạ dua literẹ̌ baugu sěngkatau ral᷊ohong bal᷊e.”

¹⁷Tau Israel mẹ̌kẹ̌koạ kerene; kaiso piạ u měngẹ̌ngomol᷊ẹ̌ limembo wọu rua literẹ̌ sěngkatau ringangu piạ u mahal᷊i.

¹⁸ Ene i sire něngukure, kutẹu nạung i saing něngomol᷊ẹ̌ mal᷊awọ tawe něngalembo ringangu i saing něngomol᷊ẹ̌ mahal᷊i tawe kinakawusang. Sěngkatau-sěngkatau e němpěngomol᷊ewe kal᷊awọu ghẹ̌gausange.

¹⁹I Musa e nẹ̌bera si sire, ”Baewe i sai tawe wotonge měndesọ u kaěng ene sarang kạdodọ baugu sěngkarịěllone.”

²⁰Arawe pirang katau wọu tal᷊oaran sire tawe nẹ̌pandung baweran Musa. I sire mal᷊aing něndesọ sěmbahageang bọu kaěng ene. Sěngkarịěllone kutẹu nạung kaěng ene kawe něngul᷊idẹ̌ dingangu rimal᷊uru mawuhụ; kụ i Musa e limangehẹ̌ si sire.

²¹Apang mal᷊ukadẹ̌ i sire měnẹ̌nampung u kaěng ene kal᷊awọeweng apang gausang i sire, kụ kamageng u ěllo e manětạ e kakạtětị e, kaěng apang nal᷊ěmbe su ěntana e matuno.

²²Su ěllo kaěnnunge i sire němpěnampung kaěng ene rua sul᷊e kal᷊awọe kụ pẹ̌tahạ ěpạ u literẹ̌ sěngkatau. Kěbị pangahạ i sire riměnta kụ něhabaru hal᷊ẹ̌ ene si Musa.

²³ Angkuěng i Musa si sire, ”Seng ini e laorong MAWU: Diěllo e kai ěllo tani waugu pěngangirul᷊eěng, ěllong Sabatẹ̌, ěllọ e kụ isěmba su MAWU. Apang kụ samehang i kamene sahěllo ini, samehe, dingangu apang kụ tuěngang i kamene, tuěngke. Apang kụ něngalembo wọu ghẹ̌gausang sěhěllo ini, haeko ringangu resọko waugu riěllo.”

²⁴Kụ kaeng nẹ̌dal᷊embo ene niresọ i sire waugu sěngkarịěllone kerẹewe niorong Musa; kaěng ene tawe nawahi ringangu tawe něngul᷊idẹ̌.

²⁵I Musa nẹ̌bera, ”Seng ini e kaěng i kamene waugu sěhěllo ini, batụu ěllo ini e kai ěllon Sabatẹ̌, ěllong pěngangirul᷊eěng baugu mẹ̌suba MAWU, kụ i kamene tawe makaěbạ kaěng ene sarang kạdodọ su l᷊ikudʼu pẹ̌darasengang.

²⁶Ěnnungu ěllo karěngụ e i kamene harusẹ̌ měngomol᷊ẹ̌ kaěng, arawe ěllo kapitune ute kai ěllong pangirul᷊eěng kụ tawẹ apa kaěng matěntung su ěllo ene.”

²⁷Su ěllo kapitune pirang katau tau Israel mapulu měnampung u kaěng, kaiso i sire tawe nakěbạ apa-apa.

²⁸Bọu e MAWU něhengetang si Musa, ”Sarang kạděngụ e i kamene tawe mapulu rumaringihẹ̌ kal᷊awọu tita-Ku?

²⁹Pẹ̌tahěndungko watụ u Iạ nẹ̌gěllịu ěllo sěhěllo si kamene waugu pěngirul᷊eěng. Kai ene hakịu su ěllo kaěnnunge Iạ nẹ̌gěllị u kaěng pinakasukụ baugu rua ěllo. Su ěllo kapitune apan taumata harusẹ̌ matanạ su wal᷊e, kụ tawe wotonge suměbang.”

³⁰Ual᷊ingu ene su ěllo kapitune i sire tawe měhal᷊ẹ̌.

³¹ Kaěng ene isẹ̌sěbạ manna[15] kahian tau Israel. Awạ e kere wakị e rararodọ mawira ringangu temange kere temangu kukisẹ̌ nikoạ piạ madune.

³²I Musa nẹ̌bera, ”MAWU e něngoro si kitẹ pěngal᷊ạ manga rua literẹ̌ manna mědeạu resọ baugu pal᷊ahiteng kitẹ tadeạu i sire makasilo kaěng nionggọ u MAWU si kitẹ su wanua l᷊inggi, su tempong i kitẹ niwawa nipasěbang bọu Misirẹ̌.”

³³ I Musa nẹ̌bera si Harun, ”Al᷊ạko kuring sěmbaụ, pẹ̌tahongkon manna manga ruan literẹ̌ su ral᷊unge kụ pěllọko su těngom MAWU tadeạu iresọ baugu pal᷊ahiteng kitẹ.”

³⁴Tangú i Harun něměllọu kuring ene su těngon Petim Pẹ̌dariandi mědeạu iresọ kerẹewe parentan MAWU e si Musa.

³⁵ Manna ene nakoạ kaěngu tau Israel karěngụ u ěpạ u pul᷊o su taunge tuhụ e, sarang i sire nahumpạ su Kanaan, tampạ i sire nẹ̌tanạ. (

³⁶Laukurangu barang makakětị biasa ipẹ̌pakẹ u taumata su tempo ene, lohong duam pul᷊o su litere.)