Read Sangir SASĚBANG 17 Bible Online

SASĚBANG 17 - Sangir bible

SASĚBANG 17

¹ Bọu ene kal᷊awọu umatʼu Israel něněntangu wanuan Sin linggi dingangu mẹ̌pẹ̌papangal᷊ing bọu tampạ sěmbaụ sarang tampạ bal᷊ine kerẹewe niorong MAWU. Su tempo sěnsul᷊e i sire němpẹ̌daseng su Rafidim, kaiso sene tawẹ apa akẹ lẹ̌inungang.

²Mase i sire němpẹ̌simbulung si Musa ringangu nẹ̌bera, ”Onggotengkon akẹ inumang.” I Musa simimbang, ”Unụe i kamene němpẹ̌simbulung dingangu měnal᷊ukạ MAWU?”

³Arawe i sire ene něngkaroụ e marasai kụ i sire měngkate němpẹ̌simbulung si Musa. Angkuěng i sire, ”Unụ e i kau e nẹ̌bawa si kami niapasěbang bọu Misirẹ̌ tangu? Tadeạu i kami, manga anạ i kami ringangu binatang i kami e maten dou?”

⁴Tangú kimahiorọ e i Musa su MAWU, angkuěnge, ”Apa e hinon takụ koateng baugu taumata tamai ini tangu? Kakěllạ e, i sire mapulu měmereng si siạ dingangu watu.”

⁵Angkuěngu MAWU e si Musa, ”Kuieko těmbonange manga pirang katau kụ pahundal᷊engko sěngkaral᷊eng dingang i sire pěngal᷊imona wansa ene. Bawa lai těking kụ ipakẹ u waugu ipěměpelẹ̌ Sal᷊ụ u Nil.

⁶Iạ e sarung dumarisị su těngonu su wowom batu sěmbaụ gěguwạ su Wul᷊udʼu Sinai. Běbahe watu ene, kụ akẹ suměpụ e hakịu i sire ene makapěnginung.” I Musa nẹ̌koạ kerene nisahidiangu manga pangahạ u Israel.

⁷Tampạ ene isẹ̌sěbạ Masa[16] batụu su tampạ ene tau Israel něnal᷊ukạ MAWU piạ i sire nakiwal᷊o, ”Měnsang MAWU e mạněntanudẹ̌be si kitẹ arau tala?” Tampạ ene mal᷊aing isẹ̌sěbạ Meriba[17] ual᷊ingu su tampạ ene tau Israel němpẹ̌simbulung.

⁸Bọu ene tau Amalek diměnta kụ něnekẹ tau Israel su Rafidim.

⁹Angkuěng i Musa si Yosua, ”Pěmileko pirang katau ipěnekẹ tau Amalek. Diěllo iạ hědo rumarisị su wowom bul᷊ude měngumpaedẹ̌ těking kụ nipakiwawang Mawu.”

¹⁰I Yosua nẹ̌koạ apang kụ niorong Musa si sie. I sie tamai něnekẹ tau Amalek, arawe i Musa, i Harun dingangu i Hur simaka wul᷊ude sarang pusige.

¹¹Karěngụ u i Musa mělẹ̌hengkẹ limane, tau Israelẹ̌ e makauntung. Kaiso kamagengu i Musa měngol᷊ohẹ̌ limane ute tau Amalekẹ̌ e makauntung.

¹²Su tempong i Musa e mělome, i Harun děduang Hur něngal᷊ạ batu sěmbaụ tadeạu i Musa makakaiang; i Harun dẹ̌duang Hur dumarisị su kaihi ringangu su koaneng i Musa mědeạu měnongkạ takiahe tadeạu těbewe kạl᷊ahengkẹ sarang matangěllo sumědạ.

¹³Pěngěnsueěnge tau Amalek nikawatạ i Yosua.

¹⁴ Angkuěngu MAWU e si Musa, ”Bohẹko kal᷊auntu ini e tadeạu tẹ̌bewe tẹ̌tahěndungang. Paul᷊ịko si Yosua u iạ sarung mapakawinasang tau Amalek.”

¹⁵Bọu e i Musa němangung pananěmbaěng sěmbaụ kụ nisěbạ e ”MAWU e kai Kěllungku.”

¹⁶Angkuěng i Musa, ”Tědeko pakarangẹ-dangẹ kělungu MAWU![18] Mawu e mẹ̌sekẹ dumokạ tau Amalek sarang marěngụ-děngụ!”