Read Sangir SASĚBANG 18 Bible Online

SASĚBANG 18 - Sangir bible

SASĚBANG 18

¹I Yitro, i empong i Musa e kai imang su Midian, nakaringihẹ̌ habaru mạanung kal᷊awọu sabarang kụ kẹ̌koatengu Ruata waugʼi Musa ringangu tau Israel, su tempong i sie měngẹ̌ngahạ i sire apạsěbang bọu Misirẹ̌.

² Tangú rimal᷊engke i Yitro nẹ̌tiwo si Musa, nẹ̌bawa si Zipora, kawingʼi Musa kụ bědang mạtanạ su Midian,

³ dingang i Gersom[19] dẹ̌duang Eliezer, anạ e esẹ darua. Anạ humotong nisěbạ si Gersom ual᷊ingu i Musa nẹ̌bera, ”Iạ e kai taumata raghị su wanuan tau l᷊iwụ”;

⁴anạ e karuane nisěbạ si Eliezer[20] batụu i Musa nẹ̌bera, ”Duata rẹ̌daloěng i upung gaghurangku e seng nẹ̌tul᷊ung dingangu něngambang si siạ hakịu iạ tawe nipaten datung Misirẹ̌.”

⁵I Yitro riměnta ringangu kawing i Musa ringangu anạ e rarua su wanua l᷊inggi tampạ i Musa nẹ̌daseng su rěduhu wul᷊ude susi.

⁶I Musa nipaul᷊ikangu habarẹ̌ u i sire riměnta,

⁷kụ siměbangke i sie naněnsomahẹ̌ si sire. I sie nẹ̌tumpěkuhẹ̌ su těngon Yitro kụ diměngu. I sire měmpẹ̌kẹ̌kakiwal᷊ong hal᷊ẹ̌ u kapapiam badang i sire sěngkatau-sěngkatau, bọu e simuẹ̌ su ral᷊ungu pẹ̌darasengang i Musa.

⁸I Musa nẹ̌běke si empone kal᷊awọu apang kinoạ u MAWU waugu ratu ringangu tau Misirẹ̌ baugu mapakasal᷊amatʼu tau Israel. I sie mal᷊aing nẹ̌běkeng kal᷊awọu sigěsạ tẹ̌tatěngoěngu tau Israel sutal᷊oaran dal᷊eng, dingangu kakakoạ u MAWU e něngambang si sire.

⁹Nakaringihẹ̌ kěbị ene, i Yitro nakapěndang limuasẹ̌

¹⁰kụ nẹ̌bera, ”Karaloko MAWU kụ napakasal᷊amatʼi kamene wọu limang datu ringangu tau Misirẹ̌! Karaloko MAWU kụ něliwiru tau Israel wọu pẹ̌tahamawuang!

¹¹U ini e iạ nasingkạ e u MAWU e kai limembong kasěllahe wọu patikụ duata, batụu kěbị ene nikoạ e piạ tau Misirẹ̌ měngẹ̌ngobotẹ̌ su tau Israel.”

¹²Bọu ene i Yitro nẹ̌bawạe manga sasěmba tinongkạ dingangu sasěmba pinotọ kere sasěmba su Ruata. I Harun dingangu kěbị pangahạ u tau Israel diměnta kụ kimaěng sěngkakaěng dingangʼi Yitro su ral᷊ungu rarěntan Duata.

¹³Sěngkariọěllone i Musa něhukungu pẹ̌sasilontahẹ̌ sutal᷊oaran tau Israel. Hal᷊ẹ̌ ene kimaěng tempo wọu mal᷊ukadẹ̌ sarang nahěbi.

¹⁴Piạ i Yitro nakasilo kěbị apang hinong koateng i Musa, i sie nakiwal᷊o, ”Kai apạe hinong koatengu waugu wansa ini? Patikụ tamai ini e harusẹ̌ koatengu hala tangu, hakịu sarang mẹ̌gausẹ̌ sasasanu tudẹ, i sire harusẹ̌ dumarisị sini wọu mal᷊ukadẹ̌ sarang hěbi tangu?”

¹⁵Sasimbang i Musa, ”I sire ene riměnta su anuku mědeạu makakasingkạ u kapulun Duata.

¹⁶Kamagengu i sire mẹ̌silontahẹ̌, i sire pẹ̌těngong iạ tadeạu měmutusẹ̌ pěrkaran sire, dingangu iạ měhabarẹ̌ si sire kal᷊awọu parenta ringangu titam Mawu Ruata.”

¹⁷Angkuěng i Yitro, ”Dal᷊akisẹ̌ kerene.

¹⁸Dingangu kakakoạ e kerene i kau makarul᷊epe watangengu hala, dingangu lai i sire ene. Hal᷊ẹ̌ ene tumanịu mal᷊awọ baugu sěngkatau.

¹⁹Pẹ̌daringihẹ̌ko sasasaku, dingangu Ruata e sarung mẹ̌tul᷊ung i kau. Mambeng mapia i kau měkoạ mananělangu wansa ini su těngon Duata kụ mẹ̌bawa kal᷊awọu sangkural᷊ang i sire si Sie.

²⁰I kau harusẹ̌ pěněntiro si sire kal᷊awọu parentan Duata ringangu pěnualagu kakakoạ u pẹ̌bawiahẹ̌ mapia dingangu apa hinong koateng i sire.

²¹Kaiso su sěmběkang ene i kau harusẹ̌ pěmile manga esẹ pirang katau kụ pelesa, ringangu pěněbọ i sire makoạ tuměllangu sěhiwu su kataune, mahasụ su kataune, limam pul᷊o su kataune, ringangu mapul᷊ong katau. I sire kawe hinong taumata mạtakụ dingangu mararingihẹ̌ su Mawu, kapěngumbalaěng dingangu mạdiri měnarimạ u roitẹ̌ sasorokẹ̌.

²²Pěngoroko si sire pẹ̌karadiahang kere mělahukungu wansa ini, sěngkatau-sěngkatau waugu ghal᷊ipohone. Munara ene harusẹ̌ koateng i sire pakahundugẹ̌ pakapia. Apang pěrkara ghaghuwạ botonge ipẹ̌kabaratang i sire si kau, arawe sidarạ pẹ̌kadodọ e botongewe ipakasuen sire hala. Hal᷊ẹ̌ ene sarung makakahaěng si kau batụu i sire mal᷊aing piạ pandungange.

²³Kereu i kau mẹ̌koạ kerene, dingangu hal᷊ẹ̌ ene iorong Mawu Ruata si kau, i kau sarung makaumal᷊ẹ̌ mẹ̌koạ munaranu, kụ kěbị taumata sarung mapul᷊e tạ konsange apa watụ u sidarạ i sire seng lighạ niurusẹ̌.”

²⁴I Musa timuhụ sasasang Yitro,

²⁵ringangu němile taumata apang papelesa sutal᷊oaran tau Israel. I sie něnẹ̌bọ i sire nakoạ tuměllangu sěhiwu su kataune, mahasụ su kataune, limam pul᷊o su kataune, ringangu mapul᷊ong katau.

²⁶I sire mẹ̌děndal᷊engu munaran sire kere mělahukung tau Israel. Pěrkara gaghaghuwạ e ikẹkabaratang i sire si Musa, arawe silontahẹ̌ dararodọ e lẹ̌urusang i sire hala.

²⁷Bọu e i Musa němalang Yitro niparal᷊eng kụ i Yitro e napul᷊ẹ e sol᷊ong banuane.