Read Sangir SASĚBANG 19 Bible Online

SASĚBANG 19 - Sangir bible

SASĚBANG 19

¹Bọu ene tau Israel naněntangu Rafidim, kụ su tanggalẹ̌ humotong bul᷊ang katěllune bọuten sire naněntangu Misirẹ̌ e, narěntạ e i sire su wanuan Sinai linggi e. I sire němpẹ̌daseng su al᷊ungu Wul᷊udu Sinai,

³kụ i Musa e simaka wul᷊ude ene mědeạu mẹ̌sombang dingangu Mawu Ruata. MAWU e nẹ̌bisara ringang i Musa wọu wul᷊ude ene kụ něndolohʼi sie piněmohang su tau Israel, pal᷊ahěnton Yakub,

⁴”I kamene seng nakasilo apan Takụ nikoạ baugu tau Misirẹ̌, dingangu kereapa kakakoạ u Iạ nẹ̌bawa si kamene sol᷊ong anu-Ku sini ringangu kawasa masěllahẹ̌, kere manụ kasiahe měnẹ̌nal᷊endeng anạ e su wowom panide.

⁵ Kụ ini e kereu i kamene matuhụ si Siạ dingangu satia su pẹ̌dariandi-Ku, i kamene sarung Takụ koateng umatẹ̌-Ku e hala. Kasěllahu dunia e kai tataghuaneng-Ku, arawe i kamene sarung makoạ tataghuanengu ikẹ̌kěndagẹ̌-Ku,

⁶ nitani waugu watangeng-Ku hala, kụ i kamene sarung mẹ̌tangkiang si Siạ kere manga imang.”

⁷Tangú limintụ e i Musa kụ nẹ̌kui manga tuměllange apẹ̌tẹ̌tampung, mase niwěkene si sire kal᷊awọu sabarang kụ niorong MAWU e si sie.

⁸I sire kěbị simimbang sěngkahindọ, ”I Kami mapulu mẹ̌koạ kal᷊awọu apang nipěhengetangu MAWU,” kụ sasimbange ene nipaul᷊ị i Musa su MAWU. Mase angkuěngu MAWU si Musa, ”Iạ e sarung duměnta su anunu kạl᷊ahěmbung su ral᷊ungu winawa masuwenehẹ̌; taumata e sarung makaringihẹ̌ si Siạ mẹ̌bẹ̌bisarang kamene, kụ manětạ tempo ene i sire sarung hanesẹ̌ mạngimang si kamene.

¹⁰Kụ ini tangú pẹ̌sombangkon sire ene, kụ oroko i sire sěhěllo ini ringangu rịěllo pěndiahing batangeng baugu mẹ̌kal᷊iomaneng. I sire harusẹ̌ pěngunsạ pakeang i sire.

¹¹Sěngkakarumahinge i sire harusẹ̌ seng sadia. Su ěllo ene Iạ hědo tumumpa su wowom Bul᷊udu Sinai, tampạ u kěbị taumata kụ makasilo si Siạ.

¹² Koạko tatiala pěngělikụ bul᷊ude ini kere pẹ̌saraěng kụ tawe wotonge kal᷊iuangu wansa ene. Sedingko bansa ene sumaka wul᷊ude, saral᷊aing mẹ̌tengkarani. I saing kụ lumiu pẹ̌saraěnge, sarung i hukungu papate;

¹³tau ene harusẹ̌ ěntungangu watu arau pitikang dingangu tawe wotonge senggehang. Hal᷊ẹ̌ ini mihino waẹ su taumata arau waugu binatang; kěbị apang lumiu sara ene harusẹ̌ ihukung pateěng. Su tempong ikaringihẹ̌ tingihu napiri manandụ tangu i sire ene harusẹ̌ sumaka wul᷊ude.”

¹⁴Bọu ene i Musa limintụ bọu wul᷊ude kụ něndolohʼi sire ene pědẹ̌dariahi mẹ̌kal᷊iomaneng. Angkuěnge, ”Karumahi i kamene hinon seng sadia, ringangu su tempọewe ini kạdal᷊enge i kamene tawe wotonge mẹ̌sěngkapẹ̌tikị.” Bọu ene tangu wansa ene nanětạ e němpẹ̌dariahi kụ němpěngunsạ pakeang i sire.

¹⁶ Su ěllo katěllune mal᷊ukadẹ̌, piạ e rěllụ dingangu kilạ. Binawa masuwenehẹ̌ siměpụ e su wowom bul᷊ude kụ nikaringihe tingihu napiri maihạ-ihạ. Kěbị taumata su pẹ̌darasengang tangu němpahungkenden takụ.

¹⁷I Musa e nẹ̌bawa si sire, apẹ̌sẹ̌sombangu Ruata, kụ i sire rụdarisị su al᷊ungu wul᷊ude ene.

¹⁸Kasěllahu Wul᷊udu Sinai natukusu tipu batụu MAWU e riměllusẹ̌ su ral᷊ungu putung. Tipu ene tụtiowol᷊ẹ̌ kere tipu wọu rapuhang kụ kěbị bul᷊ude ene gimanuẹ̌ tạ sihinge.

¹⁹Tingihu slompretẹ̌ mangkeng kạkaihạ e. I Musa nẹ̌bisara, kụ Mawu Ruata e simimbahẹ̌ dingangu rěllụ.

²⁰MAWU riměllusẹ̌ su wowong pusigu Wul᷊udu Sinai, kụ kimui si Musa sarang bowone ene. Bọu ene i Musa simakạ e,

²¹kụ MAWU e něhengetang si sie, ”Děluse kụ paul᷊ịko si sire ene u i sire tawe wotonge lumiu sara kụ duměnta měmanda si Siạ. Kereu i sire lumewang, ute mal᷊awọ bọu tal᷊oaran sire ene sarung mate.

²²Sarang lai manga imang kụ mapulu mẹ̌těngkaraning Iạ, harusẹ̌ měnusing batangeng; arawe kamagengu tala ute i sire sarung Takụ ihukung.”

²³Angkuěng i Musa su MAWU, ”I sire ene tawe makaawị, batụu i Kau něngoro si kami apạngěnnau wul᷊ude ini kai kere tampạ susi, ringangu měnẹ̌nitị pẹ̌saraěng mạngělikụ.”

²⁴Angkuěngu MAWU, ”Děluse kụ pẹ̌sul᷊ẹ e sarang ini ringang i Harun. Arawe manga imang dingangu kawanua e tawe wotonge lumiu sara mědeạu ruměnta su anu-Ku. Kereu i sire kawe lumiu tangu i sire sarung Takụ ihukung.”

²⁵Tangú rimělluse i Musa nẹ̌sombang u wansa ene kụ nipaul᷊ị e tatanatang MAWU e si sire.