Read Sangir SASĚBANG 21 Bible Online

SASĚBANG 21 - Sangir bible

SASĚBANG 21

¹Bọu ene MAWU e něhengetang si Musa, ”Gěllịko su tau Israel kal᷊awọu atorange ini:

² Kereu i kamene měmělli sěngkatau ěllang bọu kawanuanu hala e, i sie harusẹ̌ pěhal᷊ẹ̌ baugʼi kau e ghěnnangu ěnnungu taung. Su taung kapitune i sie harusẹ̌ seng ipakal᷊iu ringangu tawe hinong ipěmaehẹ̌ manga apa.

³Andene i sie wědang sẹ̌sane su tempong i sie nakoạ ěllangu, tangu kawinge tawe wotonge tumol᷊e si sie su tempong i sie suměbang. Arawe kamagengu kawe seng bọu nẹ̌kawing supiạ i sie nakoạ ěllangu, tangú kawinge wotonge tumol᷊e si sie.

⁴Kereu mawune mapẹ̌kawing i sie ringangu sěngkatau wawine, kụ masene nakahombang anạ, tangú kawinge ringangu anạ e ene kai tataghuanengu mawune, kụ tawe wotonge tumol᷊e ringangu ěllang ene su tempong i sie nipakal᷊iu.

⁵Arawe kamagengu ěllang ene manodẹ u i sie kawe kụkěndagu kawinge, manga anạ e ringangu mawune, tawe lai mapulu ipakal᷊iu

⁶tangú i tuange harusẹ̌ měbawa si sie sarang tampạ u pẹ̌tatahamawuang. Paị sene ěllang ene ioro pararisị pěngunsarehẹ̌ su tukadẹ̌ arau rihim tukadẹ̌ tampạ u pẹ̌tatahamawuang kụ i tuange mělohang tul᷊ing ěllang ene. Kụ i sie sarung makoạ ěllange kanandung pẹ̌bawiahe.

⁷Kereu sěngkatau wawinen tau Ibrani e iwal᷊ụ kere sěngkatau ěllang kahiang amange, ute wawine ene tawe ipakal᷊iu sarang měhěpusẹ̌ ěnnungu taung, kụ nẹ̌darol᷊e wue ringangu ěllang esẹ e.

⁸Kereu tawe makal᷊uasẹ̌ naungu mawune kụ piạ naunge mẹ̌kawing i sie, tangu i sie saụ iwal᷊ụ kapia su ghaghurange. Bawine ene tawe wotonge iwal᷊ụ su taumata raghị, batụu i sie seng tawe nikoạ su kaadile kahiang mawune kụ seng nělanda kirene.

⁹Kereu pẹ̌sěngkatau měmělli ěllang bawine mědeạu koateng kawingu anạ e, ěllang bawine ene harusẹ̌ koateng kere anạ e hala.

¹⁰Kamagengu anạ esẹ ene saụ mẹ̌kawing kapia, ute i sie sěntiniạ tatapẹ̌ mapakaěng dingangu mapẹ̌pakeang dingangkewelain patikụ tanggunange kerẹewe ikẹ̌koạ e su kawinge humotong.

¹¹Kereu i sie tawe mẹ̌koạ kerene ute i sie harusẹ̌ měliwirẹ̌ kawinge ene kụ tawẹ bawaehe.”

¹² ”I saing měmahang taumata wal᷊ine sarang mate, harusẹ̌ lai ihukungu papate.

¹³ Arawe kamageng u i sie němahang kụ tawe nipẹ̌tatudẹ kụ tawẹ karakine měmate, i sie wotongewe tumal᷊angu watangenge sol᷊ong tampạ sěmbaụ kụ sarung Takụ itěbọ si kau, kụ paị sene i sie maambang.

¹⁴Kai kereu pẹ̌sěngkatau e mawị dahane mẹ̌tatudẹ měmate taumata wal᷊ine, bọu ene i sie tumal᷊ang sarang pananěmbaěng-Ku mẹ̌deạu mal᷊indung, tangú tau ene harusẹ̌ samekang bọu tampạ u pananěmbaěng kụ pateěng.

¹⁵I saing měmahang si amange arau si ninange harusẹ̌ pateěng.

¹⁶ I saing mělikosẹ̌ měnamẹ taumata harusẹ̌ pateěng baewe tau ene seng niwal᷊ụ e arau wědang lai ene su wal᷊ene.

¹⁷ I saing měngane si amange arau si ninange harusẹ̌ pateěng.

¹⁸Kereu piạ u měmpẹ̌kakoka kụ sěngkatau němahang sěndinganenge ringangu watu arau kěngkunge, kụ tawe nakapate ute i sie tawe pateěng. Kai kamagengu tau nipahangeng ene sarang harusẹ̌ makaral᷊oka ual᷊ingu papahang ene,

¹⁹kụ bọu ene makawangung dingangu saụ makaral᷊eng kapia piạ těkinge, taumata kụ němahang harusẹ̌ měngundang si sie sarang mapia ringangu měmaehẹ̌ dugine karěngụeweng i sie masakị.

²⁰I saing měmahang ěllange esẹ arau wawine kụ sarang ěllang ene mate, ute harusẹ̌ ihukung.

²¹Arawe kamagengu ěllang ene tawe mate su ral᷊ungu sěhěllo arau rua ěllo, mawune ene tawe ihukung. Kararugi kinahombangenge ual᷊ingu kinailangengu ěllange ene e nakoạ kere hukumang si sie.

²²Kereu pirang katau manga esẹ kapẹ̌kẹ̌kakokane kụ sěngkatau wọu tal᷊oaran sire makakarěntan silakạ su sěngkatau wawine piạ kapapia kụ hakịu anạ e naondol᷊ẹ̌, kai tawe matědụ su wadange wal᷊ine, ute tau ene harusẹ̌ měmaehẹ̌ denda kal᷊awọeweng tẹ̌tuntukangu kawinge ringangu su kapulung manga mělahukung.

²³Arawe kamagengu wawine ěndaị e makahombang silakạ limembong kawěhạ e, tangú hukumang baugu kakanoạ dal᷊akisẹ̌ ene ute niawa awenge niawa,

²⁴ mata awenge mata, isi awenge isi, lima awenge lima, laedẹ̌ awenge laedẹ̌,

²⁵lesẹ awenge lesẹ, loso awenge loso, sahěnụ awenge sahěnụ.

²⁶I saing měmẹ̌bahẹ̌ matang ěllange sarang mawuta, harusẹ̌ mapakal᷊iwirʼu ěllang ene kere tatubusẹ̌ baugu matane.

²⁷Kereu pẹ̌sěngkatau měmẹ̌bahẹ̌ ěllange sarang kapědiangu isine, ěllang ene harusẹ̌ ipakal᷊iu kere tatubusẹ̌ baugu isine.”

²⁸”Kereu sapi esẹ sěmbaụ měnunge taumata sarang mate, sapi ene harusẹ̌ ěntungem batu sarang mate, kụ gěsine kumbahang kinaseng, arawe taghuange tawe ihukung.

²⁹Kereu sapi esẹ ene piạ lulune měnunge, kụ taghuange seng pinaul᷊ikang, kaiso tawe měndiagạ binatang ene, mase kamagengu sapi esẹ ene měnunge taumata sarang mate, tangu binatang ene harusẹ̌ ěntungem batu dingangu taghuange lai harusẹ̌ ihukung u papate.

³⁰Arawe kamagengu taghuang sapi ene ipakawala pěmaehẹ̌ tatubusẹ̌, ute i sie harusẹ̌ pěmaehẹ̌ kakěpal᷊eweng tẹ̌tuntukang ipanubusẹ̌ niawane.

³¹Kereu nipate ene kawe sěngkatau rariọ esẹ arau wawine, mal᷊aing mẹ̌pakẹ u tiahane ene lai.

³²Kereu kinapate ene kawe sěngkatau ěllang esẹ arau wawine, taghuang sapi ene harusẹ̌ pěmaehẹ̌ doitẹ̌ sal᷊aka těllum pul᷊o su kal᷊ẹ̌pane su taghuang ěllang ene ringangu sapi esẹ harusẹ̌ ěntungem batu sarang mate.

³³I saing mělekesẹ̌ tatakạ pahighi arau měmangka pahighi kụ tawe měnakạ kụ kanawoěngu sapi esẹ sěmbaụ arau kalide su ral᷊unge,

³⁴tangú taghuang pahighi harusẹ̌ měmaehẹ̌ kararugi su taghuang binatang ene, katewe i sie wotongewe měngal᷊ạ binatang kụ seng nate ene waugʼi sie.

³⁵Kereu sapi esẹ u pěsěngkatau e měmate sapi esẹ u taumata wal᷊ine, i rẹ̌dua taghuange harusẹ̌ mẹ̌bal᷊ụ u binatang kụ bědang biahẹ̌ ene mase mẹ̌papahiạ u roite. I sire lai harusẹ̌ mẹ̌papahiạ u ghěsim binatang kụ seng nate ene.

³⁶Arawe kamagengu seng kinasingkateng u sapi esẹ ene piạ lulune měnunge, kụ taghuange tawe měndiagạ ute i sie harusẹ̌ měngawengu sapi esẹ kụ bědang biahẹ̌, dingangu wotonge měngal᷊ạ binatang kụ seng nate ene waugʼi sie.”