Read Sangir SASĚBANG 22 Bible Online

SASĚBANG 22 - Sangir bible

SASĚBANG 22

¹”I saing mẹ̌tako sapi sěmbaụ arau domba mase měmotọ arau mẹ̌bal᷊ụ, harusẹ̌ měngaweng sapi sěmbaụ, kụ laawenge sapi limam baụ dingangu měngaweng apan domba sěmbaụ awengang domba ěpạ u waụ.

²I sie harusẹ̌ měngaweng barang nitakone. Kamagengu i sie tawẹ tataghuanenge apa, i sie hala sarung iwal᷊ụ kere ěllang ipěngaweng apal᷊iwụ seng nitakone. Kereu nitakone ene kawe manga sapi, kalide arau domba, mase kinaěbakeng su tau ene kụ bědang biahẹ̌, ute i sie harusẹ̌ měngaweng kụ apang binatang sěmbaụ awengangu ruam baụ. Kereu mẹ̌tatako e i kasamẹ hěbi su wal᷊e sěmbaụ, kutẹu kawe kinapate, ute tau němate si sie e tawẹ sal᷊ane. Arawe kamagengu nariadi ěllo tangú i anu ěndaị namate mambeng niěnna piạ sal᷊ane.

⁵I saing mapakawalang binatang e kumaěng děmpugẹ̌ su sasuange arau su waelu anggore, mase binatang ene mạngumpěpidẹ̌ kụ měnahangesẹ̌ sasuangu taumata wal᷊ine,[21] tangu taghuang binatang ene harusẹ̌ měmaehẹ̌ kararugi ringangu ghěsing sasuang arau ghěsing baelu anggore hala kal᷊ěnggihange.

⁶I saing měnutung baele kụ mělewa sarang baelu tau kụ makatutung gandung kạtuwone arau kal᷊awọu gandung bọu nipěnsạ, ute tau něndikọ putung ene harusẹ̌ měmaehẹ̌ kararugi.

⁷Manga piạ u mapulu makiresọ u roitẹ̌ arau apal᷊iwụ mal᷊ěgadẹ̌. Kutẹu wọu ene roitẹ̌ arau apal᷊iwụ ene piạu nẹ̌tako wọu wal᷊ene. Kamagengu tau nẹ̌tako e kaẹ̌bakeng, i sie harusẹ̌ měmaehẹ̌ dua sul᷊e.

⁸Arawe kamagengu mẹ̌tatakone tawe kaẹ̌bakeng, tangu i anu piạ bal᷊ene piněmuniang, iwawa sarang bal᷊eng pananěmbaěng, kụ sene i sie harusẹ̌ pẹ̌salu u i sie tawe nẹ̌tako apal᷊iwụ mạdaresọ su anune.

⁹Suapang pẹ̌sasilontahẹ̌ ual᷊ingu tataghuaneng, balạewe měnsang hal᷊ẹ̌ u sapi, arau kalide, arau domba arau pakeang, arau měnsang apạ e kụ nailang mase saụ nikaěbạ, i saing něngaku kawe taghuange, ute harusẹ̌ iwawa sarang bal᷊eng pananěmbaěng. Taumata kụ nilahẹ u Ruata kawe taumata piạ sal᷊ane, ute harusẹ̌ měmaehẹ̌ dua sul᷊e kal᷊awọ e su taghuange.

¹⁰Umpamane sěngkatau měhiking kalide, sapi, domba arau lai binatang bal᷊ine tataghuanengu sěndinganenge. Mase binatang ene nate, nal᷊esẹ arau nipul᷊ahong sědụ, sěmbal᷊iau tawẹ apa sahidine.

¹¹Su hal᷊ẹ̌ ene tangu i sie harusẹ̌ iwawa sarang bal᷊eng pananěmbaěng kụ pẹ̌salu su arengu MAWU u i sie tawe nẹ̌tako binatang kạl᷊ahiking si sie. Mangawe i sie mamben tawe nẹ̌tako, taghuange harusẹ̌ měnanggung dugine, arawe tau nẹ̌hiking tangu tawahal᷊uasʼu měmaehẹ̌ laaweng dugi.

¹²Kamagengu binatang ene nitakon taumata wal᷊ine, tangu taumata kụ něhiking, harusẹ̌ pěmaehẹ̌ dugine su taghuange.

¹³Kereu binatang ene těmboěngu binatang makarangěngisẹ̌, taumata kụ mělahikinge harusẹ̌ měnodẹ u manga lěmben duhine kere tatialane su taghuange, tawahal᷊uasʼu i sie měmaehẹ̌ dugi waugu binatang ene.

¹⁴Kamagengu piạ u měngědang binatang lẹ̌hikinang sěmbaụ kụ masene binatang ene mal᷊esẹ arau mate su tempong taghuang e tawẹdise sene, ute i anu něngědang harusẹ̌be měmaehẹ̌ laaweng duging binatang ene su taghuange.

¹⁵Kai kamagengu ene kawe nariadi su tempong taghuange ene sene, ute i anu nangědang semben tawe měmaehẹ̌ laaweng dugi. Kai kamagengu binatang ene kawe binatang nisewa, ute rugine makipẹ̌be su ongkosu sewa.”

¹⁶ ”I saing gụgighilẹ̌ sěngkatau wawine parawang kụ den tawẹ kaghiange mẹ̌tikị dingange, harusẹ̌ měmaehẹ̌ bul᷊aeng u kawing kụ pẹ̌kawing dingange.

¹⁷Arawe kamagengu i amangu rariọ bawine tawe pakawalang dariọ esẹ ene mẹ̌kawing u anạ e, ute i anu esẹ e harusẹ̌ měmaehẹ̌ kal᷊awọu arěgang bul᷊aeng u kawing baugu sěngkatau parawang ene.

¹⁸ Apang bawine kụ tahapatehẹ̌ e harusẹ̌ pateěng.

¹⁹ Taumata kụ mẹ̌sěngkapẹ̌tikị dingangu binatang harusẹ̌ pateěng.

²⁰ I saing kụ manarakang u sasěmba su mahang duata bal᷊inewe si Siạ u kai MAWU e, harusẹ̌ ihukung pakapate.

²¹ Kumbahangbe měměhạ arau kai tawẹ su kạadile miěbạ taumata raghị e; pẹ̌tahěndungko u nạung kal᷊imona e i kamene mal᷊aing taumata raghị su Misirẹ̌ e.

²²Kumbahang mẹ̌batụ kapulu miěbạ bal᷊u arau manga rariọ kasisi ěndusẹ̌.

²³Kereu i kamene měndal᷊aị si sire, Iạ, MAWU e sarung dumaringihẹ̌ si sire kereu i sire kụkahiorọ u makitul᷊ung si Siạ.

²⁴Iạ kai lumangehẹ̌ dingangu měmate si kamene su ral᷊ungu pẹ̌seketang, hakịu manga kawingʼi kamene měngkawal᷊u ringangu manga anạ i kamene makasisi.

²⁵ Kereu i kamene mẹ̌gěllịu roitẹ̌ pakiědang su sěngkatau kasiang wọu tal᷊oaram bansa-Ku. Kụ abe pẹ̌těngkakoạ kere měnanětul᷊ẹ̌ utang kụ měnuntụ rentene.

²⁶ Kereu i kamene měngal᷊ạ kakingkaeng u taumata wal᷊ine kere wawalarẹ̌ utange, kakingkaeng ene harusẹ̌ sul᷊eng kamene kal᷊imonang matangěllo tawe simasědạ,

²⁷batụu hekạ ene kai tataghuanenge su matane waugu ipěnal᷊ighang badange. Kamagengu tawe isul᷊e si sie, kai apạ e lai ipakẹ e gunang ipẹ̌kakahiwune su tempong mẹ̌tikị tangu? Kereu i sie kumahiorọ u makitul᷊ung si Siạ, tangu Iạ e rumaringihẹ̌ batụu Iạ piạ tatal᷊ěntụ-Ku.

²⁸ Kumbahang měngorong pẹ̌salu su Mawu ringangu kumbahang měngane těmbonangu bansanu.

²⁹Su tempo kụ nitantu, pẹ̌bawako sasěmba si Siạ sěmbahageang bọu gandungu, akẹ u anggorʼu ringangu lanang zaitunngu. Gěllịko si Siạ patikụ anạ i kamene esẹ i akang,

³⁰ore lai sapi ringangu domba esẹ kụ piněhanạ humotong. Měngkate wala katatanạ e patikụ binatang ene ringang i ninange karěngụ u pitu ěllo, mase sarakangke Siạ su ěllo kaual᷊une.

³¹ I kamene kai umatẹ̌-Ku, ual᷊ingu ene tangu kumbahang bue i kamene kuminạ gěsim binatang kụ nitěmboěngu binatang bahani; ěndokangbe ghěllị su manga asu.”