Read Sangir SASĚBANG 23 Bible Online

SASĚBANG 23 - Sangir bible

SASĚBANG 23

¹ ”Kumbahang mẹ̌kakekeng habarẹ̌ tạ katěngade, kụ kumbahang mẹ̌tul᷊ungu taumata ral᷊akisẹ̌ kụ kawe mẹ̌sẹ̌sahiding konti.

²Abe pẹ̌těngkal᷊aụ dingangu taumata kụ měngkai mẹ̌kẹ̌koạ katatanggaěng arau měmal᷊eho tita kụ mẹ̌sahiding konti.

³ Kumbahang mapẹ̌dal᷊ahaedu taumata su ral᷊ungu pěngadilang manilaing irẹ̌datẹ̌ e kawe tau kasiang.

⁴ Kereu i kamene nẹ̌sarětạu kawe nakasilo sapi arau kaliden sědụ u napal᷊idẹ̌ ute tonda wue su anun taghuange.

⁵Kereu kaliden sědụ u kawe nanawo ual᷊ingu wawawaěnge mawěhạ, ontol᷊ewue i sie měmětị kalidene abe wala i sie kerene.

⁶ Koạbe ringangu kạadilẹ̌ kereu tau kasiange ruměnta makiurusʼu pěrkarane su pěngadilang.

⁷Pakarau wue ěnsilẹ̌ tạ katěngade ringangu kumbahangbe taumata tawẹ sal᷊ane kawe ihukung pakapate, u Iạ e tawe měnahutěngadẹ̌ taumata kụ mẹ̌koạ dal᷊akisẹ̌ kerene.

⁸Kumbahang měnarimạ u roitẹ̌ sasorokẹ̌ batụu sasorokẹ̌ e kai makạkoạ taumata mẹ̌tẹ̌timbuta wọu katěngadẹ̌ dingangu makạkarugi taumata tawẹ sal᷊ane.

⁹ Kumbahang mẹ̌batụ kapulu miěbạ taumata raghị; i kamene masingkạ kereapa pěndangu makoạ taumata raghị, batụu nạung kal᷊imona e i kamene mal᷊ain taumata raghị su Misirẹ̌.”

¹⁰ ”Ěnnungu taung karěngụ e i kamene wotonge mahěnsinuang su waelʼu ringangu měngal᷊ạ kal᷊awọu ghẹ̌sine.

¹¹Arawe su taung kapitune ěntana ene harusẹ̌be těntang i kamene. Su sěntaung ene i kamene tawe wotonge měngal᷊ạ apang kụ timuwo hala sene. Balạete ene su tau kasiang dingangu apang lěmbene su binatang dul᷊u. Koạko lai kerene waugʼu waelu anggorʼu ringangu manga kalun zaitun kamene.

¹² Ěnnungu ěllo su ral᷊ungu sěngkamisa i kamene wotonge mẹ̌koạ hal᷊ẹ̌ i kamene, arawe su ěllo kapitune i kamene harusẹ̌ pěngirul᷊e, tadeạu binatang i kamene, manga ěllang dingangu taumata raghị kụ mělẹ̌hal᷊ẹ̌ su anung kamene harusẹ̌ lai pěngirul᷊e.

¹³Nẹ̌naunge wue kal᷊awọu apan Takụ nipaul᷊ị si kamene. Kumbahang mẹ̌tahamawu ruata wal᷊ine, dingangu lai kumbahang měngkai kạsěbạ e arenge.”

¹⁴”Apan taung i kamene harusẹ̌ těllun sul᷊e mẹ̌koạ pěmamantugẹ̌ si Siạ.

¹⁵ Su wul᷊angu Abib, su tempo seng nitantu i kamene harusẹ̌ pẹ̌koạ Sal᷊iwangu Borotẹ̌ Tawẹ Kabọ e kụ koạ kere Takụ nipaul᷊ị si kamene, ual᷊ingu su ral᷊ungu wul᷊ang ene i kamene něněntangu Misirẹ̌. Kumbahang kumaěng borotẹ̌ kabọ e karẹ̌ngụ u pěmamantugẹ̌ su ral᷊ungu pitu ěllo e. Suapang i kamene ruměnta mẹ̌kal᷊iomaneng si Siạ, i kamene harusẹ̌be pẹ̌bawa sasěmba.

¹⁶ Bantugeko Sal᷊imbangu Pěnsạ su tempong měngal᷊ạ buane humotong bọu pẹ̌bawaelangu. Bantugeko Sal᷊imbangu Selon Daukalu su pěngěnsueěngu taung piạ i kamene něnampungu ghěsing baelu anggorẹ̌ dingangu wuang kakaluang kẹ̌kanengang.

¹⁷Sěntiniạ taung su pěmamantugẹ̌ sal᷊imbang tatěllu ene tangu, kěbị manga esẹ e harusẹ̌ duměnta mẹ̌kal᷊iomaneng si Siạ MAWU Ruatanu e.

¹⁸Kumbahang mẹ̌bawa sasěmba borotẹ̌ piạ kabọ e su tempong i kamene měněmbang binatang si Siạ. Tawang binatang kụ isěmba si Siạ karěngụeweng pěmamantugẹ̌ ene tawe wotonge iwala sarang sěngkarịěllone mal᷊ukadẹ̌.

¹⁹ Su apang taung i kamene harusẹ̌ mẹ̌bawa gandung humotong nipěnsạ i kamene sarang bal᷊em MAWU Ruatanu. Gěsing anạ u domba arau anạ u kambing tawe wotonge tuěngang dingangu akẹ u susun ninange.”

²⁰”Iạ sarung dumolohʼu malạekatẹ̌-Ku apěngal᷊imona si kamene waugu ipangěllung si kamene suraral᷊engang dingangu pẹ̌bawa si kamene sarang tampạ Takụ niriahi.

²¹Daringihe wue ringangu tuhuke wue i sie. Kumbahang dumokạ si sie batụu i sie kai rarolohang-Ku, kụ i sie tawe mangampung dal᷊awangu.

²²Kereu i kamene mararingihẹ̌ si sie ringangu mẹ̌kẹ̌koạ kal᷊awọu apan Takụ ilẹ̌oro, Iạ sarung mẹ̌sekẹ dumokạ patikụ sekẹ u.

²³Malaekatẹ̌-Ku sarung měngal᷊imona si kamene ringangu mẹ̌bawa si kamene sol᷊ong banuan tau Amori, Het, Feris, Kanaan, Hewi ringangu Yebus, dingangu i sire sarung Takụ pakawinasa.

²⁴Kumbahang mẹ̌suba tul᷊ada pẹ̌ngumbalaěng i sire ringangu kumbahang mẹ̌těno lulun sire mẹ̌tahamawu. Goghahěko kěbị pakal᷊uang i sire pěngumbalaěng dingangu nịpapapědiko kal᷊awọu rihi watu pẹ̌paketang i sire waugu pẹ̌tẹ̌tahamawuang.

²⁵Kamagengu i kamene mẹ̌tahamawu si Siạ, MAWU Ruatanu, i kamene sarung Takụ al᷊amatengu kaěng dingangu inumang mase kal᷊awọu sakị Takụ ipakarau wọu anung kamene.

²⁶Su wanuang kamene sarung tawẹ apa wawine měhěnding deng bal᷊ine tempone arau wantọ. I kamene sarung Takụ gěllirangu umburẹ̌ manandụ.

²⁷Apang kawanua sarung děntạěng i kamene Takụ ipakatakụ u Iạ; i sire sarung Takụ ipẹ̌kal᷊ipomponge; patikụ sekẹ i kamene sarung měmpẹ̌sul᷊e ringangu mahuntal᷊ang.

²⁸Dumarokạ si kamene sarung Takụ ipẹ̌sal᷊iawuhẹ̌,[22] dingangu tau Hewi, Kanaan dingangu Het Takụ itokol᷊ẹ̌ bọu těngonu, tadeạu tawe makasahaghe raral᷊eng i kamene.

²⁹I sire tawe Takụ itokol᷊ẹ̌ sěngkahindọ su ral᷊ungu sěntaung, tadeạu ěntana ene kumbahang mawala, ringangu kumbahangbe binatang bawahani e mẹ̌tondaisẹ̌.

³⁰I sire hědon Takụ itokol᷊ẹ̌ kadodọ-kadodọ, sarang taumatang kamene seng diọ mal᷊awọ makakaiang su ěntana ene.

³¹Pẹ̌saraěngu wanuang kamene sarung Takụ itantu měnětạ bọu Wěngạ u Akaba sarang Sal᷊ụ u Efrat, dingangu wọu L᷊audẹ̌ Tal᷊oara sarang banua l᷊inggi. I kamene Takụ buakeng u kawasa waugu tumanạ u wanua ene, hakịu i sire ikatokol᷊ʼi kamene su tempong i kamene měmul᷊aho wanua ene.

³²Kumbahang mẹ̌taingu pẹ̌dariandi ringang i sire arau ringangu manga mahang duatan sire.

³³Abe pakawala i sire mẹ̌tanạ su wanuang kamene, tadeạu i kamene kumbahang mẹ̌suba mahang duatan sire kụ makoạ dosa su těngo-Ku. Kereu i kamene mẹ̌suba ruatan sire, i kamene manawo su ral᷊ungu sedẹ u papate.”