Read Sangir SASĚBANG 24 Bible Online

SASĚBANG 24 - Sangir bible

SASĚBANG 24

¹Bọu ene MAWU e něhengetang si Musa, ”Ěndaị saka pẹ̌těngon Iạ, i kau ringang i Harun, i Nadab dingangu i Abihu, ringangu i sire měnanalange pitum pul᷊o su kataune, pẹ̌těngkasumagẹ̌ko pěněmba si Siạ bọu maraune.

²Kětạeng i kau sěsanu wotonge rumani si Siạ. I sire wal᷊ine tawe wotonge mẹ̌těngkarani, dingangu patikụ umatẹ̌ bal᷊ine tawe wotonge sumaka su wul᷊ude ini.”

³Bọu e i Musa tamai kụ němohang su kal᷊awọu umatẹ̌ e patikụ parenta ringangu titam MAWU. I sire kěbị simimbahẹ̌ sěngkahindọ, ”I kami e mapulu měndal᷊engu patikụ apang nipěhengetangu MAWU.”

⁴Bọu ene i Musa němohẹ patikụ titam MAWU. Kụ sěngkarịěllone mal᷊uka-l᷊ukadẹ̌, i sie němětị pananěmbaěng sěmbaụ dingangu palẹ̌ e mapul᷊o dua su pentọ u wul᷊ude ene; kụ palẹ̌ sěmbaụ mạul᷊ị u hěntong Israelẹ̌ sěmbaụ.

⁵Bọu e i Musa rimolohu mangangudạ pirang katau, mase i sire němpanutung sasěmba waugu MAWU kụ němotọ sapi piram baụ baugu sasěmbang pẹ̌darame.

⁶Sěmbahageang bọu rahan sapi ene nial᷊ạ i Musa ringangu niwěmbinge su ral᷊ungu manga wohogẹ̌. Sěmbahageangke wue niwěmbinge su wowom pananěmbaěng.

⁷Bọu ene nial᷊ạ e bukẹ̌ u pẹ̌dariandi niwohekangu kal᷊awọu titam MAWU, kụ niwasane ringangu tingihe maihạ baugu wansa ene. Angkuěng i sire, ”I kami mapulu tumuhụ MAWU ringangu měndal᷊engu kal᷊awọu titanʼE.”

⁸ Bọu e i Musa něngal᷊ạ daha su ral᷊ungu manga rulang ene kụ nisěbohe su manga kawanua. Angkuěnge, ”Daha ini mạnoghasẹ̌ pẹ̌dariandi kụ nipěgongu MAWU ringang i kamene niwěnta su manga titanʼE.”

⁹Bọu ene i Musa, i Harun, i Nadab, i Abihu ringangu těmbonange i sire pitum pul᷊o su kataune ene němpẹ̌saka wul᷊ude,

¹⁰kụ i sire nakasilọ e Ruatang Israel rụdarisị su wowong laěmpahẹ̌ kere lantem bal᷊e wọu watum paramata, kụ birụ kere langị matilang.

¹¹Apang pangahạ u Israelẹ̌ ene seng nakasilo Mawu Kasěllahenge; kai maning kerene i sire tawe pinakawinasa kahian Sie. Mase i sire nahungkaěng dingangu němpanginung.

¹²Bọu ene MAWU nẹ̌bera si Musa, ”Děntạ e su anu-Ku su wowom bul᷊ude. Sene Iạ sarung měngonggọ u watu rarua Takụ nipěmohekang u kal᷊awọu tita-Ku si kamene. Patikụ tita ene Takụ nionggọ baugu makoạ těntiro su wansa ene.”

¹³Mase i Musa rěduang Yosua takinge nẹ̌dariahi kụ i Musa simaka[23] wul᷊ude katatanakengu MAWU ene.

¹⁴I Musa seng timanata su pangahạ u Israel, ”Pěngampal᷊ẹ̌ su raseng ini sarang i kami mẹ̌sul᷊e kapia. I Harun dẹ̌duang Hur ene ringang i kamene sini. I saing piạ sidarạ e pakiurusẹ̌.”

¹⁵I Musa simaka Wul᷊udu Sinai, bọu ene niwal᷊embungu winawa sěngkempang.

¹⁶Tualagu rarěntan MAWU e diměsung sarang bowom bul᷊ude ene kụ tau Israel nakasilọ e kere putung kụ diměllị su wowom bul᷊ude. Ěnnungu ěllo karěngụ e winawa něnakạ bul᷊ude ene, ringangu su ěllo kapitune MAWU e nẹ̌kui si Musa bọu winawa ene.

¹⁸ Bọu ene i Musa apidu simaka sarang i sie nasuẹ̌ su ral᷊ungu winawa ene. Ěpạ u pul᷊o su ěllone ěpạ u pul᷊o su hěbine i Musa natanạ sene.