Read Sangir SASĚBANG 25 Bible Online

SASĚBANG 25 - Sangir bible

SASĚBANG 25

¹MAWU e něhengetang si Musa,

²”Dolohẹ̌ko tau Israel pẹ̌bawa sasěmba si Siạ. I saing pěndange kimanoạ, harusẹ̌ mẹ̌bawa sasěmba

³kere manga: wul᷊aeng, sal᷊aka ringangu wilụ;

⁴hekạ leneng al᷊usẹ̌, wolẹ̌ birụ, kamumụ dingangu mahamụ, hekạ bọu rukụ u kambing,

⁵pisin domba esẹ kụ pinakahamụ, pising binatang masikome, kalung akasia,

⁶lanan sol᷊o, dampa waugu lana ipakẹ su komol᷊ang dingangu waugu kamania mawawěngi,

⁷haghing batu paramata mědeạu ihundugẹ̌ su efod[24] dingangu tatakạ sěbạ u Imang Karangetange.

⁸Dolohẹ̌ko kawanua ene pẹ̌koạ selo sěmbaụ baugu Iạ tadeạu Iạ matanạ sutal᷊oaran sire.

⁹Tenta ringangu kal᷊awọu apal᷊iwụ e harusẹ̌be koạ i sire tuhụewe karaki kụ sarung Takụ itěbọ si kamene.”

¹⁰”Pẹ̌koạko sěmbaụ peti wọu kalung akasia kụ nandune mahasụ mapul᷊o su sentine, běnahe ringangu rangẹ e kěbị pẹ̌tahạ ěnnung pul᷊o ěnnung su sentine.

¹¹Pikungkong bul᷊aeng sahị batuhu ral᷊unge ringangu likude kụ koateko wingkene wọu wul᷊aeng.

¹²Kalu papikul᷊ange, koateko ghal᷊ange bọu wul᷊aeng ěpạ u waụ kụ pahěkụko su l᷊aede ěpạ, dingangu ghal᷊ang darua su apan sěndihange.

¹³Koateko l᷊ai papikul᷊ange wọu kalung akasia kụ lapiseng bul᷊aeng,

¹⁴bọu ene suhiko kalu papikul᷊ange ene su ral᷊ungu ghal᷊ange su apan sěndihangu peti ene.

¹⁵Kalu papikul᷊ang ene harusẹ̌be tatapẹ̌ kạsasuhi su ghal᷊ange, kụ kumbahang sawukang.

¹⁶Bọu ene su ral᷊ungu peti ene i kau harusẹ̌ pěměllọ u watu rarua lohong kal᷊awọu tita kụ sarung Takụ ionggọ si kau.

¹⁷ Pẹ̌koạko tatakạ peti ene wọu wul᷊aeng sahị nandune mahasụ mapul᷊o su sěntine ringangu wěnahe ěnnung pul᷊o ěnnung su sentine.

¹⁸Pěněsal᷊ẹ̌ko kerub[25] darua bọu wul᷊aeng,

¹⁹sěmbaụ su apang pondol᷊u tatakạ peti ene. Awẹ u malaekatẹ̌ darua ene e, harusẹ̌ koạ sěmbahageang dingangu tatakạ e,

²⁰dingangu koạko papanide kạbawingkahẹ̌ apẹ̌tatěngo su wowom peti ene.

²¹Tahoko watu rarua su ral᷊ungu peti ene kụ taingengkon tatakạ e su wowone.

²²Iạ hědo mẹ̌sombang dingangu su tampạ ene, kụ bọu wowon tatakạ e, su wěllạ u awẹ u malạekatẹ̌ ene, i kau hědong Takụ pẹ̌gěllikangu manga tita-Ku waugu taumatan Israel.”

²³”Pẹ̌koạko meda sěmbaụ bọu kalung akasia nandune ual᷊um pul᷊o ual᷊u su sentine, běnahe ěpạ pul᷊o ěpạ su sentine, ringangu rangẹ e ěnnung pul᷊o ěnnung su sentine.

²⁴Ěmboingkong bul᷊aeng sahị dingangu koateko lai wingkene sěmbaụ bọu wul᷊aeng pangělikụ.

²⁵Koateko wawiwihu meda sěnaung 7,5 su sentine wěnahe ringangu sasarane wul᷊aeng pělikụ biwihe ene.

²⁶Pẹ̌koạko ghal᷊ang bọu wul᷊aeng ěpạ u waụ kụ taingko ene su wukune ěpạ su l᷊aede maraning biwihe.

²⁷Gal᷊ang ene baugu pěnuilẹ̌ kalu papasanengange tadeạu meda ene wotonge pẹ̌tatimbangeng.

²⁸Kalu papasanengang ene harusẹ̌ koạ bọu kalung akasia mase ěmboing bul᷊aeng.

²⁹Pẹ̌koạko manga l᷊amạ, bekerẹ̌, manga ketelẹ̌ dingangu lainumang baugu pẹ̌tahoěngu sasěmba anggorẹ̌. Kal᷊awọu apal᷊iwụ u meda ene harusẹ̌ ikoạ bọu wul᷊aeng sahị.

³⁰ Meda ene harusẹ̌ ipělọ su těngong Petim Pẹ̌dariandi dingangu su wowom meda ene harusẹ̌ sěntiniạ kạsasadia borotẹ̌ sẹ̌sadiang.”

³¹”Koạko ral᷊aedu sol᷊o wọu wul᷊aeng sahị. Kakaianenge dingangu pěngangumpaedange harusẹ̌be koạ bọu wul᷊aeng nisěsal᷊ẹ̌; bawungange kụ mungkul᷊e ringangu wul᷊ihe harusẹ̌ pakahakị u kakaianenge ringangu pěngangumpaedange.

³²Su pělahěgoěnge harusẹ̌ koạ ěnnungu lelang, kụ su ruam běka koạ pẹ̌tahạ těllu lelang sěmběka.

³³Su apang lelange harusẹ̌ koate ral᷊egahe bungangu kalum badam tatěllu piạ měsị e dingangu lokabe.

³⁴Su pěngangumpaedange harusẹ̌ koate ral᷊egahe mạngawẹ bungangu kalum badam ěpạ piạ měsị e ore lai lokabu wuane.

³⁵Su apang al᷊ungu pẹ̌dokateng u lelange ene harusẹ̌ koate měsị e sěmbaụ.

³⁶Kal᷊awọu laedu sol᷊o ene ringangu manga měsị e arau lai lelange harusẹ̌ koạ bọu wul᷊aeng sahị nisěsal᷊ẹ̌ sěmpědi.

³⁷Koateko sobung sol᷊o pitu su sasol᷊oěng ene kụ dikọko tadeạu tualage sumarang sol᷊ong těngone.

³⁸Koateko kakuhine bawurěsi sobung sol᷊o kụ dulange mal᷊aing bọu wul᷊aeng sahị.

³⁹Pẹ̌pakẹ u wul᷊aeng sahị arěgang těllum pul᷊o l᷊ima su kilone pẹ̌koạ laedu sol᷊o ene ringangu kal᷊awọu apal᷊iwụ e.

⁴⁰ Pakatatahěndung bue tadeạu ral᷊aedẹ̌ sol᷊o ene koạbe kere Takụ nipasilo si kau su wul᷊ude ini.”