Read Sangir SASĚBANG 26 Bible Online

SASĚBANG 26 - Sangir bible

SASĚBANG 26

¹”Koateko Iạ e Tenta,[26] wọu hekạ leneng al᷊usẹ̌ mapul᷊om pědi, kụ kahiwuangko ringangu wolẹ̌ birụ, kamumụ dingangu mahamụ. Sujịkeko hekạ ene ringangu gambaru kerub.[27]

²Pẹ̌sěmpědi-pẹ̌sěmpědi e harusẹ̌ mẹ̌sul᷊ung ukurange, nandune mapul᷊o dua su metere dingangu wěnahe ruam meterẹ̌.

³Hekạ limam pědi e harusẹ̌ pẹ̌sasěmpụ makoạ senggọ sěmbaụ, dingangu limam pědi lai wal᷊ine e harusẹ̌ lai koạ kerene.

⁴Koateko tatauhe wọu hekạ birụ su wiwihu senggọ darua ene,

⁵kal᷊awọe l᷊imam pul᷊o su apan senggọ ene sěmbaụ-sěmbaụ.

⁶Koateko kakaị e wul᷊aeng limaʼm pul᷊o waugu pěngauhẹ̌ senggọ darua ene mědeạu makoạ sěmbaụ.

⁷Baugu atụ u tenta ene koateko hekạ mapul᷊o ěsa su pědine wọu rukụ u kambing.

⁸Pẹ̌sěmpědi-pẹ̌sěmpědi e harusẹ̌ mẹ̌sul᷊ung ukurange, nandụ e mapul᷊o těllu su metere, ringangu wěnahe ruam meterẹ̌.

⁹Limam pědi e harusẹ̌ sěmpụ pakakoạ senggọ sěmbaụ, arawe ěnnungu pědi lai wal᷊ine e harusẹ̌ lai koạ kerene. Sasěmpụ e kaěnnunge harusẹ̌ lěku rarua baugu pěnakạ Tenta watuhu těngone.

¹⁰Saketengkong tatauhe limam pul᷊o su waụ e su wiwihu senggọ humotong dingangu limam pul᷊o su waụ e su wiwihu senggọ karuane.

¹¹Pẹ̌koạko limam pul᷊o su kaị e wọu pera kụ kaịko su tatauhe ene tadeạu senggọ darua ene makoạ sěmbaụ laatụ Tenta.

¹²Sěngkapahiakeng darua wọu hekạ lembene sěmpotọ e ute kai waugu pěnakạ Tenta watuhu likude.

¹³Lěmbeng hekạ kawěnahe limam pul᷊o su sentine kanandun Tenta e harusẹ̌ iwala pěnakạ sěndihangu Tenta ene.

¹⁴Koateko tatakạ e ruam baụ baugu Tenta watuhu likude, sěmbaụ bọu pising domba esẹ awạ e mahamụ dingangu sěmbaụ lai wọu pisị kụ al᷊usẹ̌.

¹⁵Pẹ̌koạko rihi papasị Tenta wọu kalung akasia.

¹⁶Apang kakoạ dangẹ e ěpạ u meterẹ̌ dingangu wěnahe ěnnung pul᷊o ěnnung su sentine.

¹⁷Apang kakoạ piạ bawal᷊andange sěmparẹ̌, hakịu kal᷊awọu kakoạ ene botonge mahakị sěmbaụ dingange wal᷊ine.

¹⁸Baugu Tenta watuhu sěmběkan timuhẹ̌ pěnadiang kakoạ duam pul᷊o su wuane,

¹⁹dingangu kal᷊aianenge wọu sal᷊aka ěpạ u pul᷊o su waụ e, darua su apang kakoạ sěmbaụ baugu wawal᷊andang darua.

²⁰Baugu Tenta watuhu sěmběkan sawěnahẹ̌ koate kakoạ e ruam pul᷊o su wuane

²¹dingangu kal᷊aianenge wọu sal᷊aka ěpạ u pul᷊o su waụ e, darua su al᷊ungu apang kakoạ.

²²Gunang Tenta watuhu likude su semběkam bahẹ, koateko ruhine ěnnungu waụ,

²³mase ruam baụ baugu manga wukune.

²⁴Manga ruhing bukune ene harusẹ̌ isěmpụ pakahakị u laede, matepasʼu wowone. Kakoạ darua nariadi wukune harusẹ̌ lai koạ kerene.

²⁵Tangú kěbị kakoạ ene ute ual᷊um baụ dingangu laěmpahe wọu sal᷊aka 16 su waụe, kụ su al᷊ungu kakoạ sěmbaụ e pẹ̌tahạ duam baụ.

²⁶Pẹ̌koạko wawal᷊andange wọu kalung akasia 15 su wuane, limam bua waugu manga ruhine su sěndihange sěmbaụ bọu Tenta,

²⁷limam bua kụ baugu sěndihange wal᷊ine e, dingangu limam bua l᷊ai waugu sěndihangu Tenta watuhu likude su sěmběkam bahẹ.

²⁸Kalu wawal᷊andange sutal᷊oarane harusẹ̌ taing karangẹ u kakoạ pahiạ darua, wọu pondol᷊e sarang pondol᷊ʼu Tenta e.

²⁹Kakoạ u Tenta ringangu manga kalu wawal᷊andange ene harusẹ̌ ěmboěngu ral᷊apise wul᷊aeng. Gal᷊ange tatahang kal᷊awọu kalu ene harusẹ̌be koạ bọu wul᷊aeng.

³⁰Pětịko Tenta ene tuhụ ol᷊ang Takụ nilahẹ si kamene su wowom bul᷊ude ini.

³¹Pẹ̌koạko ral᷊ansene wọu leneng al᷊usẹ̌ kụ kahiwuang dingangu wolẹ̌ birụ, kamumụ dingangu mahamụ. Sujikeko hekạ ene ringangu gambaru kerub.[28]

³²Sangẹko hekạ u tukadẹ̌ ene su rihi kalung akasia ěpạ u wua piạ dal᷊apise wul᷊aeng dingangu kakaị e wul᷊aeng kụ nitaing su wowong kal᷊aianeng sal᷊aka ěpạ u waụ.

³³ Pělọko hekạ ene su al᷊ungu antehu kakaị e su atụ u tenta. Su l᷊ikudu hekạ ene harusẹ̌be pělokeng Petim Pẹ̌dariandi lohone watu rarua ene. Hekạ ene naměta Huange Susi wọu Huange Kasusiange.

³⁴Pělọ e tatakạ Petim Pẹ̌dariandi su wowong petine.

³⁵Medang sasěmba e harusẹ̌ ipěllọ su l᷊ikudu Huang Kasusiange su sěmběkan sawěnahẹ̌, dingangu laedu sol᷊o su sěmběkan timuhẹ̌ su ral᷊ungu Tenta ene.

³⁶Koạko ral᷊anse waugu tukadu Tenta wọu hekạ leneng al᷊usẹ̌ kụ nikahiwuang dingangu wolẹ̌ birụ, kamumụ dingangu mahamụ, piạ dal᷊ěgahe nisujị.

³⁷Baugu ral᷊anse ene harusẹ̌be koạ darihine limam bua wọu kalung akasia nilapisangu wul᷊aeng kụ nipakahakị dingangu wul᷊aeng limang kaị. Pẹ̌koạko kal᷊aianenge limam baụ bọu pera waugu manga rihin dal᷊anse ene.”