Read Sangir SASĚBANG 27 Bible Online

SASĚBANG 27 - Sangir bible

SASĚBANG 27

¹”Pẹ̌koạko pananěmbaěng sěmbaụ bọu kalung akasia. Umbaghane mẹ̌buku ěpạ pirkang, nandune ringangu wěnahe pẹ̌tahạ 2,2 su metere, dingangu rangẹ e 1,3 su metere.

²Suapang bowom bukune koate sungene pakahakị u pananěmbaěng. Kěbị e harusẹ̌ pikungu pera.

³Pẹ̌koạko l᷊ai manga kawali, sikopẹ̌, lainumang, porokẹ̌, dingangu sunggilẹ̌. Kal᷊awọu apal᷊iwụ tamai ene harusẹ̌ koạ bọu pera.

⁴Pěnganangko kawa wọu pera mase pěnangẹkong gal᷊ange ěpạ baugu panuhiangu papasanengange su wukune watuhu wawa.

⁵Dangẹ u anangu kawa e harusẹ̌ maloara wọu rangẹ u pananěmbaěng. Kawa nianang harusẹ̌ lawung su pananěmbaěng batuhu wawa.

⁶Pẹ̌koạko papikul᷊ange rarua wọu kalung akasia niěmboěngu pera,

⁷kụ suhiko su ral᷊ungu ghal᷊ang su sěndihange ruam běka wọu pananěmbaěng su tempong měmasaěng pananěmbaěng ene.

⁸Pananěmbaěng ene koạko wọu pěpal᷊ẹ̌ kụ piạ loahe su ral᷊unge, tuhụewe Takụ nipaul᷊ị si kamene su wowom bul᷊ude ini.”

⁹”Koateko rělahe pělikụ Tenta-Ku niliwungangu hekạ nikauhẹ̌ bọu leneng al᷊usẹ̌. Batuhu sěmběkan timuhẹ̌, senggọ ene nandune 44 su metere,

¹⁰mạkakansing su rihi pera 20 su wuane sěmbaụ-sěmbaụ piạ kal᷊aianenge pera, dingangu kakaị e ore pěnanangetange wọu sal᷊aka.

¹¹Koạko l᷊ai kerene su sěmběkan sawěnahẹ̌.

¹²Su sěmběkam bahẹ, senggọ ene nandune 22 su metere ringangu rihine mapul᷊o ore lai kal᷊aianenge mapul᷊o.

¹³Su sěmběkan daki kụ piạ tukade, kanandun senggọ ene mal᷊aing 22 su metere.

¹⁴Su kaihi ringangu su koanengu tukadẹ̌ ene harusẹ̌ sangetangu hekạ sěmbaụ-sěmbaụ nandụ e 6,6 su metere dingangu rihi tatěllu su ral᷊ungu kal᷊aianenge tatěllu.

¹⁶Baugu tukade harusẹ̌ měnangẹ u ral᷊anse kanandung 9 meterẹ̌ bọu hekạ leneng al᷊usẹ̌ sěngkakahiwuang dingangu wolẹ̌ birụ, kamumụ dingangu mahamụ, mase lěgahengu sasujị. Baugu ipěngansing hekạ u tukadẹ̌ ene harusẹ̌ koateng darihine ěpạ u wua su ral᷊ungu kal᷊aianenge ěpạ u waụ.

¹⁷Kěbị dihi nipělikụ dělahẹ̌ ene harusẹ̌ ipẹ̌dal᷊ahakị sěmbaụ su wal᷊ine ringangu kakaị e wọu sal᷊aka, arawe ral᷊aede wọu pera.

¹⁸Hekạ mạngělikụ dělahu tenta e nandune 44 su metere, běnahe 22 su metere dingangu rangẹ e 2,2 su metere. Hekạ e harusẹ̌be koạ bọu leneng al᷊usẹ̌ dingangu laěmpahẹ̌ kal᷊aianenge wọu pera.

¹⁹Kal᷊awọu kakoạ nạung nipakẹ su ral᷊ungu Tenta e, kal᷊awọu rihi gunan Tenta ringangu waugu lahěmbunge harusẹ̌be koạ bọu pera.”

²⁰”Paul᷊ịko tau Israel apẹ̌bawa lanan zaitun sahị mase kal᷊ěnggihange gunang lanan sol᷊o su ral᷊ungu Tenta-Ku, tadeạu rikotang mase tatapẹ̌be rụděllị.

²¹I Harun dingangu kěbị anạ e harusẹ̌be měngurusẹ̌ sol᷊o ene bọu wawěllo sarang mal᷊ukadẹ̌ su tampạ Takụ děntạěng, su l᷊ikudu hekạ mạsasangẹ su těngong Petim Pẹ̌dariandi. Parenta ene harusẹ̌be koạ sarang marěngụ-děngụ gunan tau Israel dingangu patikụ hitene.”