Read Sangir SASĚBANG 28 Bible Online

SASĚBANG 28 - Sangir bible

SASĚBANG 28

¹”Kuieko i Harun tuhangu ringangu manga anạ e i Nadab, i Abihu, i Eleazar dingangu Itamar, kụ pileko i sire tadeạu makoạ imang mẹ̌tatangkiang si Siạ.

²Pẹ̌koạko pakeangu imang baugʼi Harun, tadeạu i sie ikasilowe mawantugẹ̌.

³Kuieko kěbị tahaghepẹ kụ sen Takụ nighěllirangu kasingkạ ene. I sire oroiko apẹ̌koạ pakeang i Harun tadeạu i sie mapile makoạ imang apẹ̌tangkiang si Siạ.

⁴Pěngoroko si sire lai pẹ̌koạ laěmping sěbạ, Efod, pakeang manandụ, kameja piạ sujị e, sapeọ dingangu papehẹ. Pakeangu imang ene harusẹ̌be koạ i sire waugʼi Harun tuhangu ringangu manga anạ e tadeạu makoạ imang apẹ̌tangkiang si Siạ.

⁵Pakeang ene harusẹ̌be koạ i sire bọu wolẹ̌ birụ, kamumụ dingangu mahamụ, banaěng bul᷊aeng dingangu leneng al᷊usẹ̌. Sul᷊iung ene tangu efod harusẹ̌ lẹ̌gahembeng sasujị e.

⁷Tal᷊ing běmbang darua laikị efod harusẹ̌be ghepẹ su sěndihange.

⁸Papehẹ sěmbaụ nikahiwuang al᷊usẹ̌ bọu banaěnge mẹ̌sul᷊ung harusẹ̌be ghepẹ su efod ene tadeạu makoạ sěmbahageang.

⁹Pěngal᷊ạko watung dělima ruam baụ. Pědeạko sěngkatau tahasěsal᷊ẹ̌ bul᷊aeng pelesa pěngetạ su watu ene areng i sire mapul᷊o dua anạ i Yakub tuhụ lintuhu umbure, areng pẹ̌tahạ ěnnung su watu sěmbaụ. Bọu ene batu paramata rarua ene harusẹ̌ taho su ral᷊ungu bingke wul᷊aeng kụ tul᷊ang su tal᷊ing běmbang u efod makoạ tialang pẹ̌tatahěndungangu hěntong Israel mapul᷊o dua. Kụ ual᷊ingu kakakoạ e kerene i Harun mẹ̌bẹ̌bawa areng i sire su wěmbange hakịu Iạ, MAWU sěntiniạ makạtahěndung si sire.

¹³Sul᷊iung bingke wul᷊aeng darua ene

¹⁴harusẹ̌be lai pẹ̌koạ hante rarua wọu wul᷊aeng sahị kụ nipitagẹ̌ kere tal᷊i, mědeạu isakẹ su wingke wul᷊aeng ene.”

¹⁵”Koateko gunang Imang Mawantugẹ̌ tatakạ sěbạ sěmbaụ mědeạu ipakẹ su tempong i sie mapulu makakasingkạ u kapulun Duata. Kakoạ e ringangu sujị tatakạ sěbạ ene harusẹ̌ mẹ̌sul᷊ungu kakoạ e ringangu sujị u efod.

¹⁶Umbaghane pirkang kụ ilěku rarua, nandụ e ringangu wěnahe sěmbaụ-sěmbaụ tahạ 22 su sěntine.

¹⁷Tahoingkong batun paramata ěpạ u wěhị su tatakạ sěbạ ene. Su wěhị e humotong batun dělima, topas dingangu biduri.

¹⁸Su wěhị e karuane watun zamrud, batu nilam, dingangu watung intang.

¹⁹Su wěhị e katěllune batung lazuardi, batung akik, batu kere kakakoạ slompretẹ̌.

²⁰Su wěhị e kaěpạ e batung pirus, yakut dingangu sampakang intang. Paramata mapul᷊o dua ene harusẹ̌ pohokangu wul᷊aeng.

²¹Apang paramata e harusẹ̌ kětakeng u areng sěmbaụ bọu areng u anạ i Yakub mapul᷊o dua e, tabidạu tatialang pẹ̌tahěndungangu kal᷊awọu hěntong Israelẹ̌ e.

²²Pẹ̌koạko waugu laěmping sěbạ e hante rarua wọu wul᷊aeng sahị kụ nipitagẹ̌ kere tal᷊i.

²³Pẹ̌koạko l᷊ai ghal᷊ang bul᷊aeng darua kụ sangẹko su pondol᷊e rarua su wowon tatakạ sěbạ ene

²⁴bọu e hante wul᷊aeng darua e tahoko su ral᷊ungu ghal᷊ang kanini.

²⁵Pondol᷊e rarua wal᷊ine e wọu hante ene harusẹ̌ ikị su wingke rarua, tadeạu tatakạ sěbạ e ikahakị dingangu tal᷊ing běmbangu efod batuhu těngone.

²⁶Pẹ̌koạko l᷊ai ghal᷊ang bul᷊aeng darua, mase pasẹ̌ko su tatakạ sěbạ ene su pondol᷊e wawa su ral᷊unge kahinoěngu efod.

²⁷Bọu ene pẹ̌koạko l᷊ai ghal᷊ang bul᷊aeng darua kụ sakẹko su těngon tal᷊ing běmbangu efod darua pakaraning pẹ̌sěmakengu ghaghepẹ e watuhu wawa, su wowong papehẹ nikandong al᷊usẹ̌.

²⁸Gal᷊ang tatakạ sěbạ harusẹ̌ ipakahěmpụ u tal᷊i wirụ su ghal᷊ang efod tadeạu tatakạ sěbạ ene těbewe su wowong papehẹ kụ tawe mapělọ.

²⁹Su tempong i Harun simuẹ̌ su ral᷊ungu tampạ susi, i sie harusẹ̌ mẹ̌bawa manga areng u hěntong Israel apang kạkaketạ su tatakạ sěbạ e, tadeạu Iạ e MAWU sidutu mang mẹ̌tẹ̌tahěndung umatẹ̌-Ku.

³⁰ Tahoikong Urim dingangu Tumim[29] su ral᷊ungu tatakạ sěbạ ene mědeạu paketang i Harun kereu i sie mẹ̌těngong Iạ. Su tempo kere tamai ene tangu i sie harusẹ̌ hanesẹ̌ mẹ̌pakẹu tatakạ sěba, tadeạu i sie makakasingkạ u kapulu-Ku e waugu umatʼu Israelẹ̌ e.”

³¹”Pakeange manandụ kụ hinong ipakẹ su wowong efod, harusẹ̌ kěbị e ikoạ bọu wolẹ̌ birụ.

³²Karakẹ̌ e harusẹ̌ tawieng pita nikahiwuang tadeạu tawe gampang maghehẹ.

³³Su kaguwạu wawiwihe wawa harusẹ̌ koate wawungange kere wuang delima bọu wolẹ̌ birụ, kamumụ dingangu mahamụ niwělakengu wawalọ e wul᷊aeng.

³⁵Pakeang ene harusẹ̌ ipakẹ i Harun kamagengu i sie měmunara munarang imang. Su tempong i sie ruměnta su těngo-Ku su Huange Susi arau maněntangu tampạ ene, ute kẹ̌karingihẹ̌ tingihu giring-giring ene, tadeạu i sie tawe mate.

³⁶Pẹ̌koạko sěmbaụ dal᷊ěgahẹ̌ bọu wul᷊aeng sahị dingangu pěngetạko manga wawera ini, ’Nipile waugu MAWU’.

³⁷Hakidẹ̌ko ringangu ene su paporong dingangu tal᷊i wirụ.

³⁸Dal᷊ěgahẹ̌ ene harusẹ̌ ipakẹ i Harun su rěhụ e tadeạu Iạ, MAWU e mal᷊uasẹ̌ měnarimạ u kal᷊awọu sasěmba kụ niwawan tau Israel sarang anu-Ku, maningbe i sire mẹ̌bẹ̌bawa sasěmba e seng nẹ̌koạ pẹ̌sasal᷊a.

³⁹Kamejang Harun hinong ikoạ bọu lenen al᷊usẹ̌. Pẹ̌kọako lai paporong u těmbọ sěmbaụ bọu lenen al᷊usẹ̌ dingangu papehẹ niwal᷊ikụ.

⁴⁰Pẹ̌koạko kameja, papehẹ dingangu paporong baugu manga anạ i Harun tadeạu i sire ikasilo e mawantugẹ̌.

⁴¹Pakẹko pakeang ene si Harun tuhangu manga ringangu manga anạ e. Luwieko i sire ringangu lanan zaitun; kụ ual᷊ingu ene i sire nial᷊amateng dingangu nihae kere imang baugu pẹ̌tangkiang si Siạ.

⁴²Mase i sire koateko sal᷊ana manimbụ bọu hekạ leneng, nandune wọu kal᷊uwaeng sarang palang tadeạu ipěhẹ̌mbung kasasiliange.

⁴³Sal᷊ana ene harusẹ̌ hanesẹ̌ lẹ̌luheěng i sire su tempong i sire sumuẹ̌ su ral᷊ungu Tenta-Ku arau rumani pananěmbaěng baugu mẹ̌koạ pẹ̌kakal᷊iomaneng su Huange Susi ual᷊ingu kawe sěngkatau imang, tadeạu i sire tawe mate ual᷊ingu wadang i sire pěli e kawe kinasilo. Tiaha ene mamben těbe rẹ̌dal᷊engang i Harun dingangu manga hěntone.”