Read Sangir SASĚBANG 29 Bible Online

SASĚBANG 29 - Sangir bible

SASĚBANG 29

¹”U kai kere ini mělanisẹ̌ si Harun dingangu manga anạ e tadeạu i sire makoạ imang kụ makapẹ̌tangkiang si Siạ. Pěngal᷊ạko sapi esẹ sěmbaụ kawuhuang dingangu domba esẹ darua tawẹ turạ e.

²Pěmukul᷊ẹ̌ko tapoěng kapiaěnge kụ pẹ̌koạ borotẹ̌ tawẹ kabọ e. Sěnggạ tangu harusẹ̌be koạ borotẹ̌ piạ dal᷊aụ e lanang zaitun, sěnggạ e wue ute tawẹ lanane, arawe lěmbene tangú koạko kukisẹ̌ kụ kaugu l᷊ana.

³Tahoko su ral᷊ungu wikạ kụ sěmbako ene si Siạ sěngkasěmba ringangu sapi esẹ daringange domba esẹ darua e.

⁴Dolohẹ̌ko i Harun dingangu manga anạ e aparěnta sarang sasuěkangu Tenta-Ku kụ pamurẹ̌si wadange.

⁵Pẹ̌pakẹkong pakeang u imang si Harun: kameja, efod, pakeang manandụ pěnakạ efod, laěmping sěbạ dingangu papehẹ.

⁶Takạko umbe su těmbọ e ringangu pěngaelẹ̌kong dal᷊ěgahe wọu wul᷊aeng piạ bohẹ e: ’Nipile waugu MAWU’.

⁷Mase pěngal᷊ạko lana ipẹ̌pakẹ u komol᷊angu pěndal᷊anisẹ̌, kụ sebohẹ̌ su těmbọ e kụ luwi e i sie.

⁸Bọu ene, aparěntako manga anạ e kụ luheingkong kameja,

⁹dingangu apẹ̌pakẹkong papehẹ i sire, wọu ene takateng umbe su těmbo i sire. Kerene kakoạ e něngal᷊amatẹ̌ si Harun dingangu manga anạ e. I sire ringangu manga pal᷊ahěnton sire harusẹ̌ pẹ̌tangkiang si Siạ kere imang sarang marěngụ-děngụ.

¹⁰Bọu ene sapi esẹ ene e harusẹ̌ ěntudu sarang těngon Tenta-Ku. I Harun dingangu manga anạ e harusẹ̌ pěměllọ u l᷊iman sire su těmbọ u binatang ene.

¹¹Potọ e sapi esẹ ene su těngo-Ku, su sasuěkangu Tenta.

¹²Pěngal᷊ạko rahan sapi ene sěnggạ kụ buhang tal᷊imedonu su sunge su pěnanutungang sasěmba. Lěmben daha ene harusẹ̌ sěbohu su al᷊ungu pananěmbaěng.

¹³Bọu ene al᷊ạko kal᷊awọu tawane kụ něhěmbung lohon tiange, atene kapiaěnge ringangu watune rarua su kal᷊uwaeng dingangu tawane mase kěbị ene pělọ su pananěmbaěng kụ tongkạ koạ sasěmba si Siạ.

¹⁴Gěsine, pisine ringangu tinaing sapi ene harusẹ̌ tongkạ sul᷊ikudu Tenta. Kụ ene ute kai sasěmbang kal᷊aampungu rosang manga imang.

¹⁵Bọu ene pěngal᷊ạko sěmbaụ bọu tal᷊oaran domba esẹ ene. I Harun dingangu manga anạ e harusẹ̌ pěměllọu l᷊iman sire su wowon těmbọ u binatang ene.

¹⁶Kụ bọu ene potọ e binatang ene, al᷊ạ dahane kụ sěbohẹ̌ su sěndihange ěpạ bọu pananěmbaěng ěndaị ene.

¹⁷Domba esẹ ene harusẹ̌be pẹ̌papotọ, dal᷊ungu sasindạ e ringangu palange harusẹ̌be uhasẹ̌ kụ pěllọ su těmbọ e ringangu wadange wọu nịpẹ̌papotọ.

¹⁸ Pěllọ e kěbị domba esẹ ene su wowom pananěmbaěng baugu sasěmba tẹ̌tongkateng. Dal᷊urung sasěmba ene makạl᷊uasẹ̌ naung-Ku.

¹⁹Pěngal᷊ạko domba esẹ sěmbaụ lai; kụ domba esẹ baugu komol᷊angu pěngangal᷊amatẹ̌. Oroko i Harun dingangu manga anạ e pěmpěněllidu liman sire su těmbọ u binatang ene.

²⁰Mase potọ e domba esẹ ene, pěngal᷊ạko rahane kạdodọ kụ buhako su raungu tul᷊ing Harun sěmběkane koaneng batuhu wawa ringangu su tul᷊ing manga anạ e, su iněngen lima koaneng, dingangu iněngen laedʼi sire koaneng. Lěmben daha ene harusẹ̌be sěbohu su sěndihangu pananěmbaěng ěpạ e.

²¹Pěngal᷊ạko raha kadodọ bọu wowong pananěmbaěng dingangu lanang dal᷊anisẹ̌ e kadodọ, kụ bọu ene kaesẹ̌ si Harun dingangu manga anạ e ringangu pakeang i sire. Kụ ual᷊ingu kawe kerene tangu i Harun dingangu manga anạ e ringangu pakeang i sire e nitani waugu Iạ.

²²Pěngal᷊ạko tawang domba esẹ ene, tol᷊ene kụ piạ tawane, tawane su lohon tiange, atene kapaelange, dingangu watune rarua su kal᷊uwaenge ringangu tawane ringangu palange koaneng.

²³Bọu wikạ u borotẹ̌ kụ seng bọu piněněmbaěng si Siạ tangu pěngal᷊ạko pẹ̌sěmbaụ bọu apang haghine sěmbaụ: sěmbaụ bọu nikoạ piạ lanang zaitun, sěmbaụ tawẹ lanane ringangu kukisẹ̌ sěmbaụ.

²⁴Pělọko kaěng ene kěbị su l᷊imang Harun dingangu manga anạ e kụ oroko i sire pěnodẹ u ene si Siạ tabidạu sasěmba kụ pinakal᷊ahẹ.

²⁵Mase al᷊ạko borotẹ̌ ene wọʼi sire kụ tongkạko su wowong pananěmbaěng su wowong sasěmba tẹ̌tongkateng ene. Dal᷊urun sasěmba ene makạl᷊ahimpulu si Siạ.

²⁶Al᷊ạko sěbạ u domba esẹ ene kụ ogorẹ̌ko kere sasěmba itẹ̌togorẹ̌ si Siạ. Kụ seng ene e wuạ u.

²⁷Su pěngangal᷊amatẹ̌ imang, sěbạ dingangu palang u domba esẹ e kụ hinong ipakẹ su komol᷊ang ene harusẹ̌ ighěllị kere sasěmba itẹ̌togorẹ̌ si Siạ kụ nihae waugu manga imang.

²⁸Seng ini e putusang-Ku kụ sen tawe ikawal᷊ui: Su tempong umatẹ̌-Ku e ruměnta maněmbang sasěmbang pẹ̌darame e, sěbạ dingangu palangu binatang e kai wuạ u manga imang. Kụ seng ene e sasěmbang umatẹ̌-Ku e waugu Iạ.

²⁹Pakeang Imang i Harun harusẹ̌be itěntang su manga anạ e, tadeạu ikapakẹ i sire su tempong al᷊amateng.

³⁰Anạ i Harun kụ nakoạ imange něngaweng si amange kụ simuẹ̌ su Tenta-Ku mẹ̌kal᷊iomaneng su Huang Susi, kụ hinong měluheng pakeang ene karěngụ u pitu ěllo.

³¹Pěngal᷊ạko ghěsin domba esẹ kụ nipakẹ su komol᷊angu pěndal᷊anisẹ̌ si Harun dingangu manga anạ e kụ sasạko ghěsi ene su tampạ sěmbaụ kụ susi.

³²Gěsin domba ene harusẹ̌ kinaseng i sire su sasuěkang u Tenta-Ku dingangu lěmbem borotẹ̌ su ral᷊ungu tatahoěnge.

³³I sire harusẹ̌ kumaěng kaěng bọu nisěmba su tempong pěngangal᷊amatẹ̌ piạ e komol᷊angu pěngangampung dosa e. Kětạeng manga imang botonge kumaěng kaěng kụ seng nihae waugu Iạ e.

³⁴Kereu sěngkariọěllone mal᷊ukadẹ̌ e gẹ̌sin domba ringangu borotẹ̌ ene wědang piạ lěmbene, tangú lěmbene ene harusẹ̌ tutung pakasue, ringangu tawe wotonge kanengang, batụu kai seng nihae.

³⁵Pẹ̌kakomol᷊u pěngangal᷊amatẹ̌ si Harun dingangu manga anạ e harusẹ̌ pitu ěllo karěngụ e, kerẹewe seng bọu Takụ pinaul᷊ị si kamene.

³⁶Apang kal᷊aěllo i kamene harusẹ̌be měmpaněmbang sapi esẹ sěmbaụ baugu pěngangampung dosa. Kinahiang sasěmba ene tangu tampạ u pananěmbaěng nipakasusi. Mase pananěmbaěng ene harusẹ̌ lanisu lanan zaitun tadeạu hae waugu Iạ.

³⁷Koạko ene apang kal᷊aěllo ghěnangu pitu ěllo karěngụ e. Tangú kasěllahu pananěmbaěng ene masusi kahěngang; kụ balạewe měnsang apa kahinoěngu pananěmbaěng ene e harusẹ̌ isarakang su MAWU, dingangu walạewe měnsang i sai kụ měnenggehẹ̌ e sarung masilakạ kinahiang katoghasu kasusine.”[30]

³⁸”Apang kal᷊aěllo sarang marěngụ-děngụ tangu su wowong pananěmbaěng ene e hinong maněmban domba rarua umbure pẹ̌sěntaung.

³⁹Sěmbaụ isěmba mal᷊ukadẹ̌, arawe wal᷊inẹ e wue ute gunang isěmba wawěllo.

⁴⁰Sěngkahindọeweng sasěmba anạ u domba sěmbaụ gunang mal᷊ukadẹ̌ e, harusẹ̌ pẹ̌dingangu tapoěng kapaelange sěngkilo laukangu lanan zaitun sahị sěliterẹ̌. Su l᷊iung ene lai akẹ u anggorẹ̌ sěliterẹ̌.

⁴¹Anạ u domba sasěmba gunang bawěllo koạko l᷊ai pẹ̌sul᷊ung, dinganen tapoěng, lanan zaitun dingangu akẹ u anggorẹ̌. Dal᷊urun sasěmba tẹ̌tongkateng ene e makạl᷊ahimpulu naung-Ku.

⁴²Mase waugu kanandun tempo sarang marěngụ sasěmba tẹ̌tongkateng ene e harusẹ̌be sěmba su těngo-Ku su tukadʼu Tenta-Ku. Kụ sene Iạ sarung mẹ̌sombangu umatẹ̌-Ku ringangu mẹ̌bisarang kau.

⁴³Seng sene Iạ sarung mẹ̌sombangu tau Israel, dingangu tualagʼu rarěnta-Ku sarung makakariadin tampạ ene susi.

⁴⁴Iạ e sarung mapakasusin Tenta ringangu pananěmbaěng ene. I Harun dingangu manga anạ e sarung Takụ ipile wọu kěbị tadeạu i sire pẹ̌tangkiang munara-Ku kụ makoạ imang.

⁴⁵Iạ e matanạ sutal᷊oaran tau Israel makoạ Duatan sire.

⁴⁶I sire sarung masingkạ u kai Iạ e MAWU Ruatan sire kụ naněbang i sire wọu Misirẹ̌, tadeạu Iạ makakatanạ sutal᷊oaran sire. Kai Iạ e MAWU Ruatan sire.”