Read Sangir SASĚBANG 30 Bible Online

SASĚBANG 30 - Sangir bible

SASĚBANG 30

¹MAWU Kasěllahenge něhengetang kapia si Musa, ”Pẹ̌koạko pananěmbaěng sěmbaụ bọu kalung akasia baugu panutungang buwụ.

²Koạ u pananěmbaěng harusẹ̌ mẹ̌sul᷊ung pẹ̌pirkang; nandune ringangu wěnahe tahạ 45 su sentine ringangu rangẹ e 90 su sentine. Su wukune ěpạ koate manga sungene kụ pakahakị dingangu pananěmbaěng ene.

³Bowone rasị, narekeng lai sěndihange ěpạ dingangu manga sungene harusẹ̌ pikungu wul᷊aeng sahị dingangu koate bingkene wul᷊aeng pakal᷊ikụ.

⁴Pẹ̌koạko ghal᷊ang darua su al᷊ungu wingke su sěndihange rarua ipěnongka kalung papasanengang pananěmbaěng ene.

⁵Papasanengang ene harusẹ̌be koạ bọu kalung akasia kụ pikuneng bul᷊aeng.

⁶Pěllọko pananěmbaěng ene su l᷊ikudu hekạ su těngom Petim Pẹ̌dariandi, su piạ pẹ̌sasombangeng i kamene ringang-Ku.

⁷Apang kamal᷊ukadẹ̌ piạ e i Harun diměnta něnadian sol᷊o, i sie harusẹ̌ manutung buwụ mawěngi su wowong pananěmbaěng ene.

⁸Hal᷊ẹ̌ ene harusẹ̌ lai koatenge su tempong i sie měnadian sol᷊o wawěllo. Pěnanutung buwụ harusẹ̌be koạ turusẹ̌ su kanandung tempo.

⁹Abe pěmpěněmba su wowong pananěmbaěng ene buwụ isẹ̌sěding, sasěmba binatang arau sasěmba sẹ̌sadiang; abe lai pěněbohu sasěmba akẹ u anggorẹ̌ su wowone.

¹⁰Sěnsul᷊ẹ sěntaung i Harun harusẹ̌ pẹ̌koạ komol᷊angu pěnanusing pananěmbaěng kụ měngaesu rahang binatang sasěmba su sungene ěpạ baugu kal᷊aampungu rosa. Hal᷊ẹ̌ ene harusẹ̌ koạ apan taung su kanandung tempo. Pananěmbaěng ene harusẹ̌ susi patikụ dingangu ihaẹ waugu Iạ.”

¹¹MAWU e něhengetang si Musa,

¹²”Su tempong pěndarol᷊ẹ̌ kawanuang Israel, patikụ manga esẹ harusẹ̌ měmaehẹ̌ si Siạ doitẹ̌ dal᷊uarẹ̌ baugu watangenge tadeạu i sie tawe kahinoěngu silakạ su tempong pěndarol᷊ẹ̌.

¹³ Patikụ taumata ikarol᷊ẹ̌ harusẹ̌ měmaehẹ̌ kal᷊awọu roitẹ̌ kere tinantu tuhụ arěga su Tenta-Ku kere ghaghěllị tani si Siạ.

¹⁴Apan taumata narekeng su pěndarol᷊ẹ̌ ene, apạeweng manga esẹ nidatingu 20 su taunge arau nal᷊iu harusẹ̌ měngonggọu gaghěllị tani ene.

¹⁵Tau kalạ tawe měmaehẹ̌ měngalembo ringangu tau kasiang e tawe wotonge maghaing bawaehe wọu apan seng nipoěng si sie.

¹⁶Komol᷊e roitẹ̌ ene wọu tau Israel, kụ koạ gunang pẹ̌tahamawu su ral᷊ungu Tenta. Doitẹ̌ ene kěbị ute kai tatubusẹ̌ batangeng i sire, kụ Iạ e sěntiniạ mang mẹ̌tẹ̌tahěndung baugu maněntanudẹ̌ si kamene.”

¹⁷MAWU e něhengetang si Musa,

¹⁸ ”Pẹ̌koạ bakẹ̌ bọu sal᷊aka ringangu wal᷊ahuange mal᷊aing bọu sal᷊aka. Pělọko bakẹ̌ ene su wěllạ u Tenta ringangu pananěmbaěng kụ mase lohoing akẹ.

¹⁹Akẹ ene waugʼi Harun dingangu manga anạ e tadeạu i sire wotonge makapěnguhasẹ̌ lima ringangu laedẹ̌

²⁰těntal᷊ang tawe nakạsuẹ̌ su ral᷊ungu Tenta arau nakahaung pananěmbaěng baugu mẹ̌bawa sasěmba tẹ̌tutungang. I sire harusẹ̌ mẹ̌koạ ene tadeạu tawe pateěng. Atorang ene harusẹ̌ tuhukang i sire ringangu manga hěnton sire sarung marěngụ-děngụ.”

²² MAWU e něhengetang si Musa,

²³”Pěngal᷊ạko manga rampa kal᷊ěnggihange, mur mal᷊egẹ ěnnungu kilo, kalu manisẹ̌ těllung kilo, tuwu mawěngi těllung kilo, kalung teja ěnnungu kilo.

²⁴Kěbị e harusẹ̌be timbang tuhụ timbangeng su Tenta-Ku. Tambaiko l᷊ai lanang zaitun ěpạ u literẹ̌,

²⁵dingangu pẹ̌koạko lanan dal᷊anisẹ̌ kụ laụke kere lana mawěngi.

²⁶Pangal᷊ạko lana ene gunang dal᷊ana Tenta-Ku, Petim Pẹ̌dariandi,

²⁷meda ringangu kal᷊awọu pakakasẹ̌, laedu sol᷊o ringangu kal᷊awọu apal᷊iwụ, pananěmbaěng tampạ u pěnanutungang buwụ,

²⁸pananěmbaěng baugu sasěmba tẹ̌tutungang dingangu kal᷊awọu pakakase, ringangu bakẹ̌ u akẹ sarang bal᷊ahuange.

²⁹Ual᷊ingu kakoạ e kerene harusẹ̌be haenu manga pakakasẹ̌ ene waugu Iạ, tadeạu patikụ e ipakasusi. Walạewe měnsang apa mihino su pananěmbaěng ene e harusẹ̌be sarakang su MAWU, kụ balạewe měnsang i sai makasenggehẹ̌ e sarung kahombangengu silakạ kahiang katoghasu kasusine.[31]

³⁰Lanisẹ̌ko l᷊ai i Harun dingangu manga anạ e tadeạu i sire iruị makoạ imang gunang mẹ̌tangkiang si Siạ.

³¹Paul᷊ịko su tau Israel u kanandung tempo lana ral᷊anisẹ̌ ene kětạeng ipakẹ baugu Iạ.

³²Lana ene tawe wotonge ipakẹ su taumata wiasa. Kumbahang mẹ̌koạ lana kerene kụ mẹ̌pakẹ u ral᷊aụ e wọu kal᷊aukang ene. Lana ene kai susi, kụ harusẹ̌ ikoạ kere apal᷊iwụ susi.

³³I saing mẹ̌koạ lana kerene, arau mẹ̌pakẹ u ene waugu taumata kụ bal᷊ine imang, tawe lai marekeng umatẹ̌-Ku.”

³⁴MAWU e něhengetang si Musa, ”Pěngal᷊ạko rampa haghine piram baụ mẹ̌sul᷊ung kal᷊awọe, segẹ u sol᷊o, daram puhe, segẹ u kalumanisẹ̌ dingangu wuwụ sahị.

³⁵Pakẹko kěbị ene waugu mẹ̌koạ buwụ mawěngi pinẹ̌dal᷊aụ. Laukeng asing tadeạu wuwụ ene těbewe sahị kụ botonge ipakẹ baugu Iạ.

³⁶Sěmbahageang bọu wuwụ ene harusẹ̌be lutạ pakaal᷊usẹ̌. Bawako ene sarang Tenta-Ku kụ sawuhẹ̌ko su těngong Petim Pẹ̌dariandi. Buwụ ene harusẹ̌ ikoạ kere barang susi nitěntani waugu Iạ. Kumbahang mẹ̌koạ běngi arau mẹ̌pakẹ u ene gunang kamene hala.

³⁸I saing mẹ̌koạ bawěngi kerene seng tawe masowa umatẹ̌ tataghuaneng-Ku.”