Read Sangir SASĚBANG 31 Bible Online

SASĚBANG 31 - Sangir bible

SASĚBANG 31

¹MAWU e něhengetang si Musa,

²”Iạ e seng němile si Bezaleel anạ i Uri, pulung i Hur bọu hěnton Yehuda,

³dingangu nẹ̌gěllịu kakěndage si sie ringangu kawasa-Ku.[32] I sie Takụ gěllirangu katatahuěnna, kasingkạ, dingangu kapelesa su ral᷊ungu kal᷊awọu haghing munara mal᷊aholẹ:

⁴baugu mẹ̌koạ karaki mẹ̌gẹ̌gausẹ̌ kapande sarang mẹ̌koạ apal᷊iwụ bọu wul᷊aeng, sal᷊aka ringangu pera;

⁵baugu ipěngasa batuʼm paramata kụ sarung ihundugẹ̌; baugu měngetạ kalu ringangu waugu kal᷊awọu haghing munarang kaketạ lai wal᷊ine.

⁶I Aholiab, anạ i Ahisamakh bọu hěnton Dan, selain Takụ nipile waugu pěnongka si sie. Takụ lai ghěllikang u kasingkạ tawẹ sihinge su manga tukang mapapande, tadeạu i sire makakoạ bue patikụ apan Takụ pakikoạ:

⁷Tenta-Ku, Petim Pẹ̌dariandi ringangu tatakạ e, kal᷊awọu apal᷊iwụ u Tenta,

⁸kerẹewe meda, ringangu manga kakakoạ e, laedu sol᷊o wọu wul᷊aeng sahị dingangu kakoạ e, pananěmbaěng pěnanutungang buwụ.

⁹Pananěmbaěng tampạ u pạnutungang sasěmba ringangu manga pakakase, bakẹ̌ u akẹ dingangu kakaianenge,

¹⁰pakeangu kal᷊iomaneng baugʼi Harun dingangu manga anạ e, kụ harusẹ̌ iluhe su tempong i sire mẹ̌koạ hal᷊ẹ̌ u imang,

¹¹lanang dal᷊anisẹ̌ dingangu wuwụ mawěngi waugu Huange Susi. Kěbị ene harusẹ̌ koateng i sire kerẹewe seng Takụ nitul᷊ada si kamene.”

¹²MAWU nẹ̌parenta si Musa,

¹³waugu apạmohang su tau Israel, ”Pamantugẹ̌kong ěllon Sabatẹ̌, ěllọ e seng Takụ tinilakehẹ̌ kere ěllong pěngiruleěng. Sarang marěngụ-děngụ ěllo ene makoạ tatahěndungang sutal᷊oarang kamene ringang-Ku, tadeạu i kamene masingkạ u kai Iạ e MAWU, dingangu kai Iạ e seng něndiadi si kamene nakoạ kawanua-Ku hala.

¹⁴ Ěllong pěngiruleěng ene harusẹ̌ adateng i kamene kere ěllo susi. I kamene Takụ gěllirang u ěnnungu ěllo pěmunara, arawe su ěllo kapitune kai ěllo masaria kụ itani waugu Iạ. I sain tawe měngadatẹ̌, kụ kawe měmunara su ěllo ene ute harusẹ̌ ihukung pakapate.

¹⁶Kawanuang Israel harusẹ̌ měmantugẹ̌ ěllo ene wọu hěnto mẹ̌bẹ̌bawěllasẹ̌ kere makoạ tatialang pẹ̌dariandi.

¹⁷ Ěllo ene kai sěmbaụ tatahěndung kụ tatapẹ̌ sutal᷊oarang Israel dingang-Ku, u Iạ e MAWU, seng něndiadi langị dingangu dunia su ral᷊ungu tempo ěnnungu ěllo, ringangu su ěllo kapitune Iạ e simohọ bọu hal᷊ẹ̌ kụ něngirul᷊e.”

¹⁸Nasuẹeng bisarane ringang i Musa su wowong Bul᷊udu Sinai, Mawu Kasěllahenge něngonggọu pěpal᷊ẹ̌ batu rarua si sie seng pinamohekangu Mawu Kasěllahenge kal᷊awọu titanʼE.