Read Sangir SASĚBANG 32 Bible Online

SASĚBANG 32 - Sangir bible

SASĚBANG 32

¹ Sarạeng tau Israelẹ̌ nakasilo u i Musa kai marěngụ kahěngang tawe limintụ bọu wul᷊ude, kaiso mang bědang paịse lai, ute i sire nahuhuangke sol᷊ong anung Harun kụ nẹ̌bera si sie, ”I kitẹ e wěga měnsang apa nariadi si Musa, tau e nạung nẹ̌bawa si kitẹ nipasěbang bọu Misirẹ̌; kụ pẹ̌koạko waugʼi kami ruata[33] kụ sarung měngahạ si kami.”

²Bọu e nẹ̌berạ e i Harun si sire, ”Pěmpěluạko anti-anti wul᷊aeng kụ ipẹ̌pakẹ u kawingu sěmbaụ-sěmbaụ dingangu manga anạ i kamene kụ damahi tonda su anuku.”

³Tangu i sire němpẹ̌bawạ e anti-anti wul᷊aeng i sire kụ niwawa sarang anung Harun.

⁴ I Harun něngal᷊ạ anti-anti ene, bọu e nitunone kụ niwěmbinge su ral᷊ungu pastaka kụ kinoạ e tul᷊adaʼn sapi sěmbaụ. Kawanua ene nẹ̌berạ e, ”E Israel, seng ini e ruatang kitẹ kụ naněbang i kitẹ bọu Misirẹ̌!”

⁵Bọu e i Harun namětịko pananěmbaěng sěmbaụ su těngon sapi wul᷊aeng ene kụ němohang, ”Diěllo kai piạ sal᷊iwang baugu měngadatẹ̌ MAWU.”

⁶ Sěngkarịěllone mal᷊uka-l᷊ukadẹ̌, tau Israel němpẹ̌bawa binatang piara piram baụ baugu sasěmba tẹ̌tutungang, dingangu piram baụ lai waugu sasěmbam pẹ̌darame. I sire naiang kimaěng dingangu něnginung bọu e nẹ̌buạ němpẹ̌dal᷊uasẹ̌.

⁷Tangú MAWU e něhengetang si Musa, ”Pakahawesẹ̌ bue tanaẹ lumintụ u kawanuanu niahạ u wọu Misirẹ̌ e seng němpẹ̌koạ dal᷊awang.

⁸I sire seng nělenga wọu manga tita-Ku. I sire němpẹ̌koạ tul᷊ada sapi wọu wul᷊aeng niwěmbing, mase němpẹ̌suba ringangu něnarakangu sasěmba si sie. Kụ angkuěng i sire, seng ěndaị ene ruatan sire naněbang i sire wọu Misirẹ̌ e.

⁹Iạ masingkạ u wansa ene tumanịu nahěmpal᷊iung kakětị e těmbọ i sire.

¹⁰Abe pěnal᷊ukạ si Siạ, Iạ lumangehẹ̌ si sire kụ hědo měminasa si sire. Arawe i kau ringangu hitenu e sarung Takụ pakariadi kawanua masěllahẹ̌.”

¹¹ I Musa nẹ̌kamaẹ su MAWU Ruatane, angkuěnge, ”MAWU, unụe i Kau harusẹ̌ mẹ̌koạ kerene si sire. Bal᷊inẹbe kětạeng i Kau sẹ̌sanu něliung sire wọu Misirẹ̌ dingangu kawasa, kuate makạdal᷊inaụ Mawu?

¹²Kereu i Kau maminasa si sire, tau Misirẹ̌ sarung mẹ̌bera u i Kau něngahạ kawanua ene nipasěbang bọu Misirẹ̌ mẹ̌deạu měmate si sire su wawul᷊udange ringangu měminasa si sire pakaupu. Kumbahang bue kerene o MAWU! bal᷊irịko naungʼU ringangu kumbahangbe mapakasilakạ u wansa ene.

¹³ Tahěndunge wue manga ěllangu i Abraham, Ishak dingangu i Yakub. Pẹ̌tahěndung bue u i Kau nẹ̌diandi piạ salune měngonggọu hěnton sire kal᷊awọe kere wituing su l᷊angị, kerene lai kal᷊awọu ěntana kụ nikědonʼU e sarung makoạ tataghuanengu hěnton sire sarung marěngụ-děngụ.”

¹⁴Tangú MAWU e nẹ̌sasaul᷊e nekatʼE kụ tawe nisěhụ naparal᷊engu hukumangʼE ipakaěnsạ su kawanua ene kawuakengu hombang masaria.

¹⁵I Musa e rimẹ̌sung kapia wọu wul᷊ude ene kụ nẹ̌bawa watu rarua pinamohekangu kal᷊awọu titaʼm Mawu su sěndihange ruam běka.

¹⁶Mawu Ruata sẹ̌sane seng nẹ̌koạ batu ene ringangu něngetạ u kěbị titanʼE sene.

¹⁷Těntal᷊ang ěnạe kạděsunge, i Yosua nakaringihẹ̌ tau Israel měmpěmẹ̌mansagẹ̌, tangú něberạ e i sie si Musa, ”Kai piạ gahasengu pẹ̌seketang su pẹ̌darasengang.”

¹⁸Angkuěng i Musa, ”Daringihange kai wal᷊inewe kere ghion dal᷊uasẹ̌ arau wansagu kawawatạ; ene kai tingihu taumata mẹ̌kẹ̌kantarị.”

¹⁹Sarạeng i Musa nasandigu pẹ̌darasengang ene, nikasilonẹ e sapi wul᷊aeng ene ringangu taumata kapẹ̌sẹ̌sal᷊aine, tangú limangehe i sie. Sene lai su pentọ u wul᷊ude ene i Musa němahị u watu niwawane sarang nal᷊ahěmpung nakakorọ.

²⁰Bọu ene nial᷊ạ e tul᷊adan sapi e ěnạ u l᷊iman tau Israelẹ̌ ene, nitunone, nilutạ e pinakaal᷊usẹ̌ kere awul᷊ẹ̌, bọu e nilaukangu akẹ. Mase niorone tau Israel nipěnginung.

²¹I sie nẹ̌bera si Harun, ”Kai apa nikoạ i sire si kau hakịu niwalanu i sire nẹ̌dosa kereng kasariane?”

²²Angkuěng i Harun, ”Kumbahang mẹ̌pědu si siạ; i kau hala masingkạ kereapa karakin sire ini mědeạu mẹ̌koạ dal᷊akị.

²³I sire nẹ̌bera si siạ, ’I kitẹ běga wue měnsang apa mariadi si Musa, i sie nạung nẹ̌bawa si kitẹ siměbang bọu Misirẹ̌; kụ koateko waugʼi kami ruata kụ makaahạ si kami.’

²⁴Iạ něngoro si sire pěnarakangu ral᷊ěgahẹ̌ bul᷊aeng, bọu e i sire něnarakangu ene si siạ. Kěbị dal᷊ěgahẹ̌ ene takụ nitaho su ral᷊ungu putung, tangu nariadị e sapi ini!”

²⁵I Musa nakahěngangke mahunẹu i Harun kai seng něměllọ u tau Israel kere kawal᷊o nakapěllọ bọu tendạ e, hakịu i sire nakoạ pal᷊ahul᷊ěgeěngu patikụ sědụ i sire.

²⁶Tangú rimarisị e i sie su těngong sasuěkangu pẹ̌darasengang kụ nẹ̌bera, ”I saing manumběka su MAWU harusẹ̌ haung damahi!” Tangú němpẹ̌děntạ e hěntong Lewi nangělikụ si Musa,

²⁷kạberane si sire, ”MAWU Ruatang Israel nẹ̌parenta si kamene sěmbaụ-sěmbaụ mědeạu apěnawụ pedang kamene kụ pahundal᷊eng limiu pẹ̌darasengang ini, bọu pasěllangeng ini sarang pasěllangeng bal᷊ine apidu kạpẹ̌matene manga anạ u sěmbaụ, manga hapị dingangu manga l᷊ampung i kamene.”

²⁸Hěnton Lewi timuhụ parenta ene kụ su ěllo ene piạ u manga těllu hiwu su kataune taumata nate nịpapaten sire.

²⁹Angkuěng i Musa su hěnton Lewi, ”Sahěllo ini i kamene seng naněntani watangeng[34] nakoạ imang kụ nẹ̌tangkiang MAWU kụ němate manga rariọ dingangu manga anạ u sěmbaụ i kamene, tangú MAWU e nẹ̌gěllịu al᷊amatʼE si kamene.”

³⁰Tangú sěngkarịěllone i Musa nẹ̌bera su kawanua ene, ”I kamene seng nẹ̌koạ dosa masaria. Arawe orasẹ̌ ini e iạ sarung sumaka wul᷊ude ene lai mědeạu mẹ̌těngong MAWU; kụ mal᷊owọko iạ deng makahombang kal᷊aampungu rosang kamene.”

³¹Bọu e i Musa mal᷊aing tamai nẹ̌těngon MAWU kụ nẹ̌bera, ”Bansa ene seng nẹ̌koạ dosa masaria. I sire nẹ̌koạ mahang duata wọu wul᷊aeng.

³² Mal᷊owọko i Kau reng mangampung dosan sire; mạeng tala ute měngkai ěmụ arengku wọu bukẹ̌ u taumata wiahẹ̌.”

³³MAWU e simimbang, ”Kětạeng taumata apan seng nẹ̌dosa si Siạ e Takụ sarung ěmukang arenge wọu bukẹ̌ ene.

³⁴Tamaị e ini, kụ bawako i sire ene sol᷊ong tampạ kụ seng Takụ niareng si kamene. Malạekatẹ̌-Ku e sarung mangahạ si kamene, kaiso tempone sarung marěnta i sire ene Takụ ihukung ual᷊ingu kal᷊awọu rosan sire.”

³⁵Bọu e MAWU naparěntang hombang su taumata ene ual᷊ingu i sire měnẹ̌nihasa si Harun pẹ̌kẹ̌koạ tul᷊ada wọu sapi wul᷊aeng ene.