Read Sangir SASĚBANG 33 Bible Online

SASĚBANG 33 - Sangir bible

SASĚBANG 33

¹ Bọu e MAWU něhengetang si Musa, ”Těntangko tampạ ini kụ dakọ e ral᷊eng dingangu kawanua kụ niwawanu wọu Misirẹ̌ e sol᷊ong banua kụ Takụ nikědo si Abraham, Ishak dingang i Yakub ore lai patikụ hěnton sire.

²Iạ sarung měndolohu sěngkatau malạekatẹ̌ ipěngahạ si kamene. Iạ e sarung měnokol᷊u tau Kanaan, Amori, Het, Feris, Hewi ringangu Yebus.

³I kamene mẹ̌tẹ̌timona sol᷊ong ěntana kụ kalạ dingangu matawa, arawe Iạ sẹ̌saku tawe timol᷊e ringang i kamene, tadeạu i kamene kumbahangbe Takụ ipakiwihua sutal᷊oaran dal᷊eng, batụu i kamene kai umatẹ̌ těmbọ e makakětị.”

⁴Bọu ene MAWU e rimolohʼi Musa pinẹ̌bera su tau Israel, ”I kamene e kai kawanua tul᷊ine makětị. Kai manga Iạ timol᷊e ringang i kamene maning kadodọ tempo, nal᷊ahẹ u i kamene Takụ ipakawinasa kěbị. Al᷊ạko kěbị kal᷊awọu ral᷊ěgahu, kụ Iạ hědo maul᷊ị apa sarung Takụ koateng si kamene.” Sarạeng seng nakaringihẹ̌ těntirong MAWU ene, i sire měngkate apa masusa naunge mẹ̌sul᷊ungu taumata kụ mělẹ̌lutu. Bọu e i sire namělọeng dal᷊ěgahʼi sire. Kụ bọuten naněntangu Wul᷊udu Sinai, tau Israel semben tawe saụ nẹ̌pakẹ u ral᷊ěgahẹ̌.

⁷Su kasauʼn tau Israel nẹ̌daseng, i Musa něngal᷊ạ Tenta kụ pasikang diọ pakaghea wọu pẹ̌darasengang i sire. Tenta ene isẹ̌sěbạ Tentaʼm MAWU, kụ i saing mapulu mẹ̌dorong sasasang MAWU ute ruměnta sene.

⁸Kereu i Musa makoạ sol᷊ong Tenta ene, tau Israel dumarisị su těngon sasuěkangu tentan sire kụ měnitị si Musa sarang i sie masuẹ̌.

⁹Mạeng seng i Musa masuẹ̌, tangú rihi winawa e matěntungke kụ maědung su sasuěkangu Tenta. Bọu winawa ene MAWU mẹ̌bisara ringang i Musa.

¹⁰Su tempon tau Israel nakasilo rihi winawa su sasuěkangu Tentaʼm MAWU, i sire kěbị nẹ̌buạ kụ nẹ̌tumpěkuhẹ̌ su sasuěkang u Tentan sěmbaụ-sěmbaụ.

¹¹MAWU nẹ̌bisara ringang i Musa nẹ̌těngong gati kere taumata mẹ̌bisara ringangu hapị e. Ual᷊ingu ene i Musa nẹ̌sul᷊e sarang pẹ̌darasengang. Arawe i Yosua anạ i Nun, sěngkatau umbaseng lumaontol᷊ẹ̌ si Musa tatapẹ̌ mạtanạ su ral᷊ungu Tentaʼm MAWU ene.

¹²Piạ sěhěllo i Musa nẹ̌bera su MAWU, ”MAWU, i Kau nẹ̌parenta si siạ něngahạ kawanua ini sarang banua nipẹ̌kědonʼU. Kaiso i Kau tawe nẹ̌bera i sai takụ irolohẹ̌ mẹ̌deạu pẹ̌tul᷊ung si siạ. MAWU, i Kau nẹ̌bera u i Kau masingkạ u iạ, dingangu lụl᷊ahimpulung iạ.

¹³Kamageng kerene, mal᷊umbạko i Kau měhabaru kai apa ilẹ̌ol᷊angʼU, MAWU, tadeạu iạ makatangkiang si Kau, ringangu tatapẹ̌ makal᷊uasẹ̌ naungʼU. Pẹ̌tahěndungko l᷊ai u kawanua ini e seng nipilenʼU nakoạ tataghuanengʼU.”

¹⁴Angkuěngu MAWU, ”I kamene sarung Takụ těntanurang tadeạu makapěmusakạ ěntana Takụ pinẹ̌kědo.”

¹⁵Angkuěng i Musa, ”Kereu MAWU e tawe tumol᷊e ringang i kami, abe rolohẹ̌ i kami pěněntangu tampạ ini.

¹⁶Kereapa taumata sarung masingkạ u i Kau e makạl᷊ahimpulu si siạ dingangu su kawanua ini kereu i Kau e tawe mẹ̌tul᷊ung i kami? Kal᷊aeneng MAWU sutal᷊oarang kami e sarung mapẹ̌dal᷊ahaeng kami e wọu manga wansa wal᷊ine su dunia ini.”

¹⁷Angkuěngu MAWU e si Musa, ”Dorongu e sarung Takụ daringihang, batụu Iạ masingkạ i kau ringangu Iạ e lẹ̌lahimpuluangu.”

¹⁸Tangú i Musa e nẹ̌kal᷊iomaneng, ”MAWU, todẹko si siạ sěnangu pahesʼU.”

¹⁹ Angkuěngu MAWU, ”Iạ e sarung sumahe ringangu kasěllahu kawawantugẹ̌-Ku su těngonu, apidu kapẹ̌sěbạ e areng-Ku masusi. Seng Iạ e MAWU, dingangu Iạ e měnodẹ u karal᷊ondon naung-Ku ringangu kapia-Ku su taumata apam pinile-Ku.

²⁰Gati-Ku tawe Takụ itodẹ si kamene u tawẹ u sarang sěngkatau makasilo si Siạ, dingangu tatapẹ̌be wiahẹ̌.

²¹Su sěmběka-Ku ini e piạ batu hanibẹ̌; kụ i kau e wotonge rumarisị sene.

²²Su tempong sěnangu pahesẹ̌-Ku e simahe, i kau Takụ isuẹ̌ su ral᷊ungu wěllạ u watu hanibẹ̌ ene, kụ Takụ takatengu l᷊ima-Ku sarang Iạ e seng masahe.

²³Bọu e lima-Ku Takụ bol᷊engang tadeạu i kau makasilo si Siạ bọu likude, arawe ghati-Ku e tawe ikasilonʼu.”