Read Sangir SASĚBANG 34 Bible Online

SASĚBANG 34 - Sangir bible

SASĚBANG 34

¹Bọu ene MAWU něhengetang si Musa, ”Pakangko pěpal᷊ẹ̌ batu rarua kere nạung kal᷊imona. Su watu rarua ene Iạ sarung měmohẹ u wawera mẹ̌sul᷊ung u su watu kụ seng niwẹ̌kanu ene.

²Pẹ̌dariahiko riěllo mal᷊ukadẹ̌ saka su Wul᷊udu Sinai kụ pẹ̌těngong Iạ su wongkong bul᷊ude ene.

³Tawẹu sarang sěngkatau makatol᷊e si kau arau měnsang suapa maraning bul᷊ude ene. Manga sapi arau domba kumbahang iwala pakaěng děmpugẹ̌ su pentọ u wul᷊ude ene.”

⁴Mase i Musa němakang kạpia watu rarua, kụ sěngkarịěllone mal᷊uka-l᷊ukadẹ̌ niwawane taraị sarang Bul᷊udu Sinai kere niorong MAWU si sie.

⁵Tangú riměllusẹ̌ MAWU[35] su ral᷊ungu winawa sěmbaụ. I Sie rụdarisị dingang i Musa su tampạ ene, kụ nẹ̌sěbạu arengʼE Masusi kụ kawe MAWU.

⁶ Bọu ene MAWU e simahe su těngon Musa kụ nẹ̌hengetang, ”Iạ e kai MAWU, Ruata e napenẹ u karal᷊ondo ringangu kapia. Kakěndagẹ̌-Ku mahěmpal᷊iu, Iạ e satia ringangu tawe měngkate lighạ mẹ̌pědu.

⁷Iạ e mang sěntiniạ kụkěndagu hiwu-hiwu hěnto[36] ringangu mạngampung pẹ̌sasal᷊a ringangu rosa arawe taumata piạ sal᷊ane mamben tawe ipakal᷊iwirẹ̌ bọu hukumange, ringangu Takụ ihukung lai manga rariọ dingangu manga pulung sarang hěnto katěllune ringangu kaěpạ e ual᷊ingu rosang gaghurang i sire.”

⁸Su tempo ene lai i Musa nẹ̌těngkasumagẹ̌ nẹ̌suba.

⁹Angkuěnge, ”Mawu, kereu i Kau kahěnga-hěngang kuměndagu iạ, iạ mẹ̌dorong, karimạko Mawu e tumol᷊e si kami. Kawanua ene mambeng makětị těmbọ e, kaiso ampunge wue karal᷊akisẹ̌ dingangu rosang kami kụ tarimạ e i kami kere umatʼU tataghuanengʼU hala.”

¹⁰Angkuěngu MAWU si Musa, ”Orasẹ̌ ini Iạ měkoạ pẹ̌kakakědo ringangu tau Israel. Su těngong matan sire, Iạ sarung mẹ̌koạ haghing karal᷊inaụ kụ den tawe nikẹ̌koạ su tal᷊oarang bansa patikụ su dunia. Patikụ bansa sarung makasilo patikụ munara makạdal᷊inaụ Takụ kinoạ, batụu Iạ, MAWU e sarung mẹ̌koạ munara makạdal᷊inaụ baugʼi kamene.

¹¹Tuhuke wue patikụ tita Takụ nionggọ si kamene su ěllo ini. Iạ e sarung měnokol᷊u tau Amori, Kanaan, Het, Feris, Hewi ringangu Yebus su tempong i kamene timol᷊ọ.

¹²Kumbahangbe mẹ̌koạ diandi ringangu kal᷊awọu taumata su wanua kụ nirěntaěng i kamene, u hal᷊ẹ̌ kerene kai makạkoạ sedẹ kụ makapate si kamene.

¹³ Kụ kumbahangbe mẹ̌koạ kerene, kaiso hakako kal᷊awọu pananěmbaěng i sire, těnehẹ̌ko kal᷊awọu palẹ̌ i sire karamatẹ̌ dingangu tuwangko kal᷊awọu rihi tul᷊adang Asyera, mahang duatan sire.

¹⁴Kumbahang mẹ̌tahamawu ruata wal᷊ine, u Iạ e kai MAWU, kụ kai Ruata kụ tawe mapulu isul᷊ung dingangu walạewe měnsang apa.

¹⁵Kumbahang i kamene mẹ̌taingu pẹ̌kakakědo ringang i sire su wanua ene, batụu su tempong i sire maněmbang sasěmba pẹ̌potokang su manga ruatan sire, i sire sarung měngiwogẹ̌ si kamene, kụ i kamene sarung tumol᷊e.

¹⁶Kereu manga anạ i kamene esẹ měmpẹ̌kawing dingangu manga wawine tau raghị, i sire sarung iwogangu manga wawine ene mědeạu pěněntangu Iạ kụ pẹ̌tahamawu manga mawun sire.

¹⁷ Kumbahang mẹ̌koạ dingangu maněmba mahang duata sẹ̌sẹ̌sal᷊eng.

¹⁸ Pěmpěmantugẹ̌ bue Sal᷊imbangu Borotẹ̌ Tawẹ Kabọ e. Kerẹewe seng Takụ nioro si kamene, i kamene harusẹ̌be kaěng borotẹ̌ tawẹ kabọ e karěngụeweng pitu ěllo su ral᷊ungu wul᷊ang Abib, u su ral᷊ungu wul᷊ang ene i kamene něněntangu Misirẹ̌.

¹⁹ Apang manga rariọ esẹ kaiakanenge ringangu binatang esẹ kahumotongange piněhanạ ene kai tataghuaneng-Ku,

²⁰ arawe i kamene harusẹ̌ pěluarẹ̌ anạ u kalide esẹ kahumotongange piněhanạ dingangu maněmbang anạ u domba sěmbaụ laawenge. Kereu i kamene madiri měluarẹ̌, ute lehẹ u kalide ene harusẹ̌be pěding kamene. Apang anạ i kamene esẹ kaiakanenge harusẹ̌be tubusʼi kamene. Tawẹu sarang sěngkatau wotonge ruměnta su anu-Ku, kamagengu tawe mẹ̌bawa sasěmba.

²¹ Seng piạ ěnnungu ěllo waugu pěhal᷊ẹ̌; kumbahang měhal᷊ẹ̌ su ěllo kapitune, maningbe su tempong pẹ̌bawaelẹ̌ e arau pěmaměnsạ.

²² Bantugeko Sal᷊imbangu Pamaměnsạ su tempong i kamene manětạ maměnsạ buang gandung humotong. Bantugeko l᷊ai Sal᷊imbangu Selon Daukalu su pěngěnsueěngu taung, su tempong i kamene měnipo manga wuang kalu.

²³Těllun sul᷊e sěntaung kěbị manga esẹ harusẹ̌ duměnta maněmba si Siạ MAWU Ruatang Israel.

²⁴Samuring Iạ měnguserẹ̌ manga bansa patikụ bọu těngonu ringangu Takụ ipakawěnahẹ̌ banuanu, tawẹu sarang sěngkatau kụ sarung bahani makapul᷊aho soanu su tempong i kamene tamai měmantugẹ̌ Sal᷊imbangu Borotẹ̌ Tawẹ Kabọ e, Sal᷊imbangu Pamaměnsạ, Sal᷊imbangu Selon Daukalu.

²⁵ Su tempong i kamene měmpaněmbang binatang pẹ̌potokang, kumbahang měmpaněmbang apa-apa kẹ̌koateng kụ piạ kabọ e. Binatang kụ potokang baugu sasěmbang pěmamantugẹ̌ Paskah harusẹ̌ ěnsueěng hěbi ene lai; tawe wotonge piạ lěmbene sarang sěngkarịěllone.

²⁶ Su apan taung i kamene harusẹ̌ mẹ̌bawa sol᷊ong bal᷊eng MAWU Ruatanu gẹ̌sing ěntananu e humotong. Gěsing anạ u domba arau anạ u kambing tawe wotonge sasakeng u akẹ u susun ninange.”

²⁷Angkuěngu MAWU si Musa, ”Bohẹko kal᷊awọu wawera ene, batụu kai wọu wawera ene Iạ e nẹ̌koạ pẹ̌kakakědo ringang i kau ore lai ringangu tau Israel.”

²⁸Ěpạ u pul᷊o su ěllone ěpạ u pul᷊o su hěbine i Musa mạtanạ sene ringangu MAWU karěngụ u ene i sie tawe kumakaěng dingangu tawe měnganginung. Bawerang manga pẹ̌dariandi ene, ute Titaʼm Mawu Ruata Mapul᷊o, niwohẹ e su pěpal᷊ẹ̌ batu.

²⁹ Piạ i Musa riměsung bọu Wul᷊udu Sinai nẹ̌bawa Tita Mapul᷊o ene, ghatine kụkerong batụu i sie seng mẹ̌bẹ̌bisara ringangu MAWU, arawe i Musa sẹ̌sane wěga wue ghatine kawe kụkuhenabẹ̌.

³⁰I Harun dingangu patikụ kawanua e nakasilo u i Musa e sụsěnnang gatine, kụ i sire mạtakụ humaung.

³¹Arawe i Musa e kụkui si sire, tangu i Harun dingangu kal᷊awọu těmbonang i sire lụhaung si sie, ringangu i Musa e mẹ̌bẹ̌bisara si sire.

³²Bọu ene kal᷊awọu kawanuang Israel němpẹ̌komolẹ̌ němpěliwung si sie ringangu i Musa něhabarẹ̌ si sire kěbị kal᷊awọu tita nionggọu MAWU si sie su wowom Bul᷊udu Sinai.

³³Ene wọuten nẹ̌bisara ringang i sire, i Musa něnakạ gatine ringangu hekạ.

³⁴Walạewe sasuẹ̌ i Musa su ral᷊ungu Tentaʼm MAWU e mědeạu mẹ̌bisara ringangu MAWU, hekạ ene lẹ̌lekesang sarang i sie nakasěbang. Bọu ene i sie něhabaru kal᷊awọu hengetang u MAWU su tau Israel,

³⁵ku i sire nakasilo ghating Musa, sụsěnnang. Tangú timbuhungange kạpia ghatine sarang tempo tuhụ e kereu i sie mẹ̌bisara kạpia ringangu MAWU.