Read Sangir SASĚBANG 35 Bible Online

SASĚBANG 35 - Sangir bible

SASĚBANG 35

¹I Musa něngomol᷊u kal᷊awọu kawanuang Israel bọu e nẹ̌bera si sire, ”Kai ini laorong MAWU si kamene:

² Ěnnungu ěllo i kamene makapẹ̌koạ hal᷊ẹ̌ i kamene, arawe su ěllo kapitune e kai ěllom pěngangiruleěng, ěllo ghẹ̌guwạ samatang baugu MAWU. I saing měngkai měhal᷊ẹ̌ su ěllong Sabatẹ̌ harusẹ̌ ihukung pakapate.

³Su ěllo ene i kamene tawe wotonge měhunụ putung su wal᷊eng kamene.”

⁴I Musa nẹ̌bera su kal᷊awọu tau Israel, ”Kai kere ini parentan MAWU Kasěllahenge:

⁵Pẹ̌bawako sasěmba waugu MAWU. I saing pěndange kimanoạ botonge měbawa sasěmba wul᷊aeng, sal᷊aka, ringangu tambaga;

⁶hekạ leneng al᷊usẹ̌, hekạ wolẹ̌ birụ, kamumụ dingangu mahamụ; hekạ bọu rukụ u kambing;

⁷pising domba esẹ awạ e nilaburangu mahamụ; pisị al᷊usẹ̌, kalung akasia,

⁸lanan sol᷊o; dampa gunang lanang dal᷊anisẹ̌ dingangu waugu kamania kụ mawěngi;

⁹paramata delima, dingangu paramata wal᷊ine mědeạu iluhudẹ̌ su pakeangu imang dingangu tatakạ sěbạ u Imang Mawantugẹ̌.”

¹⁰”Kěbị apang tahamunara papelesa sutal᷊oarang kamene harusẹ̌ děnta waugu mẹ̌koạ kal᷊awọu apang laorong MAWU kere:

¹¹Tenta, atụ dingangu tatakạ e, kakaị dingangu umbaghane, manga kalu kakandange, rihin tukadẹ̌ dingangu ral᷊aede;

¹²Petiʼm Pẹ̌dariandi ringangu papikul᷊ange, tatakạ e ringangu hekạ tatukuse;

¹³meda ringangu kalu papikul᷊ange, kěbị kakoạ e ringangu borotẹ̌ isiliwirẹ̌,

¹⁴laedu sol᷊o waugu pěnualagẹ̌ dingangkeweng kakoạ e, sol᷊o ringangu lanane;

¹⁵pananěmbaěng tampạ pěnutungang kamania ringangu kalu papikul᷊ange, lanan dal᷊anisẹ̌, kamania mawěngi; ral᷊anse waugu tukadu Tenta,

¹⁶pananěmbaěng baugu sasěmba tẹ̌tutungang dingangu piạ sasěndihange wọu pera, kalu papikul᷊ange ringangu kal᷊awọu kakoạ e; bakẹ̌ tampạ u pěnguhaseng dingangu laěmpahe,

¹⁷kal᷊awọu hekạ baugu tatěndạ dělahẹ̌, kal᷊awọu manga rihi ringangu ral᷊aede, ral᷊anse waugu tukadu pasěllangengu rělahẹ̌,

¹⁸manga papasị dingangu patikụ tal᷊i waugu Tenta ringangu waugu rělahe;

¹⁹pakeangu kal᷊iomaneng baugu manga imang su tempong i sire němunara su Huange Susi ringangu pakeang tani waugu Imang i Harun dingangu manga anạ e.”

²⁰Mase kěbị tau Israel apang kụ natampung ene nẹ̌kal᷊iaesẹ̌,

²¹balạewe i sai apang pěndange kimanoạ, němpẹ̌bawa sasěmba su MAWU waugu měnukụ Tentaʼm MAWU. I sire mal᷊aing němpẹ̌bawa patikụ apang gěgausang baugu pẹ̌kakal᷊iomaneng dingangu kakoạ pakeangu imang.

²²I sai-saing kụ mapulu baẹ esẹ arau wawine, duměnta kụ mẹ̌bawa kakaelẹ̌ dal᷊ẹ̌gahẹ̌, anti-anti, sinsing, kalong dingangu kal᷊awọu haghin dal᷊ẹ̌gahẹ̌ bul᷊aeng mědeạu isěmba su MAWU.

²³I saing kụ piạ hekạ e leneng al᷊usẹ̌, hekạ wolẹ̌ birụ, kamumụ arau mahamụ, hekạ bọu rukụ u kambing, pisin domba esẹ kụ laburangu mahamụ, arau pisị masikome, kụ maněmbang kěbị ene.

²⁴I sai-saing kụ makaonggọ u sal᷊aka arau pera kụ mẹ̌bawa waugu MAWU. Kerene lai koateng u taumata kụ piạ kalune akasia waugu hal᷊ẹ̌ ene.

²⁵Manga wawine apan tahakahiwuang nẹ̌bawa banang leneng al᷊usẹ̌ ore lai banaěng wolẹ̌ birụ, kamumụ dingangu mahamụ kụ seng nikoạ i sire.

²⁶I sire mal᷊aing němpạngahiwuang bọu rukụ u kambing.

²⁷Apang pangahạ e němpẹ̌bawa paramata delima ringangu manga paramata wal᷊ine mědeạu iluhudẹ̌ su pakeangu imang dingangu tatakạ sěbạ.

²⁸I sire mal᷊aing němpẹ̌bawa manga rampa ringangu lana waugu sol᷊o, lana gunan dal᷊anisẹ̌ dingangu kamania mawěngi.

²⁹Patikụ tau Israel dingangu kal᷊ahaěngu naung němpẹ̌bawa sasěmban sire su MAWU, waugu munara kụ niorong MAWU e limiung Musa.

³⁰Bọu ene i Musa nẹ̌bera su tau Israel, ”MAWU seng němile si Bezaleel anạ i Uri, pulung i Hur, bọu hěnton Yehuda

³¹ringangu něngonggọ si sie dingangu kawasanʼE.[37] Duata e něngonggọu katatahuěnna si sie kapelesa ringangu katatoelẹ̌,

³²baugu mẹ̌koạ karaki kụ mẹ̌gẹ̌gausẹ̌ kapande ore lai nẹ̌koạ ene wọu wul᷊aeng, sal᷊aka ringangu pera;

³³baugu měngasa watuʼm paramata kụ sarung iluhudẹ̌; baugu měmakang kalu ringangu waugu kal᷊awọu haghing hal᷊ẹ̌ u karal᷊ěnggihẹ̌ lai wal᷊ine.

³⁴Baugʼi Bezaleel dingangu i Aholiab, anạ i Ahisamakh bọu hěnton Dan, MAWU něnggonggọ u kapande waugu maněntirong kasingkạ i sire su taumata wal᷊ine.

³⁵I sire nionggotangu kapande su kal᷊awọu haghing munara kẹ̌koateng u tahapakang, tahal᷊uhudẹ̌ dingangu tahakahiwuang hekạ leneng al᷊usẹ̌, wolẹ̌ birụ, kamumụ dingangu mahamụ, dingangu hekạ bal᷊ine. I sire kai tahahingidẹ̌ matahuěnna ringangu makạkoạ kal᷊awọu haghiʼm munara.