Read Sangir SASĚBANG 36 Bible Online

SASĚBANG 36 - Sangir bible

SASĚBANG 36

¹I Bezaleel, i Aholiab, dingangu patikụ apang mẹ̌kakoạ munara kụ nakatarimạ kasingkạ dingangu katahuěnna wọu MAWU, masingkạ u tiahane mẹ̌koạ kal᷊awọu apang gẹ̌gausang baugu mẹ̌koạ Tentaʼm MAWU. I sire harusẹ̌ mẹ̌koạ kěbị ene kerẹewe seng niorong MAWU.”

²I Musa nẹ̌kui si Bezaleel, Aholiab dingangu kěbị taumata apang nakatarimạ u kasingkạ bọu MAWU ringangu apang kụ mapulu měnongkạ, mase měngoro si sire pěnětạ.

³I Musa něngonggọ si sire kal᷊awọu apang nighěllị u tau Israel baugu munara koạ u Tentaʼm MAWU. Arawe tau Israel bědang tatapẹ̌ kapẹ̌bawane sasěmba si Musa apang kamal᷊ukadẹ̌.

⁴Mase apang měmamunara kụ kapẹ̌kẹ̌koạ e munara ene,

⁵němpěhabarẹ̌ si Musa, ”Apang kakoạ kụ nionggọ u taumata e seng něngalembo wọu apang gausang baugu karạdiahang u apang niorong MAWU.”

⁶Tangú i Musa něhabarẹ̌ u su kạguwạu pẹ̌darasengang, u seng naghanapẹ̌ laonggọ baugu Tentaʼm MAWU; kụ taumata e semben tawe nẹ̌bawa lai apa-apa.

⁷Sasukụ munara kụ seng nionggọ i sire e seng nahěmpal᷊iung kal᷊awọe waugu ipangěnsue kal᷊awọu munara ene.

⁸Mase apang kụ něngalembong kapandene wọu tal᷊oarang měmamunara e němpẹ̌koạ Tentaʼm MAWU. Tenta ene nikoạ i sire wọu hekạ leneng mapul᷊oʼm pědi nikahiwuang dingangu wolẹ̌ birụ, kamumụ dingangu mahamụ, bọu ene nisujikangu gambaru kerub.[38]

⁹Apang pěding hekạ ukurange mẹ̌sul᷊ung, nandune mapul᷊o dua su metere, ringangu wěnahe dua meterẹ̌.

¹⁰Hekạ limaʼm pědi nipẹ̌tatauhẹ̌ nakoạ sěmbaụ hakị, mase limaʼm pědi lai wal᷊ine nịkakoạ l᷊ai mẹ̌sul᷊ung.

¹¹Su wiwihu senggọ darua ene nikoateng sasangetange wọu hekạ birụ,

¹²limaʼm pul᷊o su waụ e sasangetange su senggọ sěmbaụ, kụ hakịu nakoạ sěmparẹ̌.

¹³Bọu e nikoateng limaʼm pul᷊o kakaị e wọu wul᷊aeng limam pul᷊o waugu ipěnauhẹ̌ senggọ ene rarua.

¹⁴Bọu ene i sire nẹ̌koạ atụ u Tenta ene wọu hekạ kinoạ bọu rukụ u kambing mapul᷊o ěsa su pědine.

¹⁵Apang pěding hekạ mang mẹ̌sul᷊ung ukurange, nandune 13 su metere, běnahe 2 meterẹ̌.

¹⁶Limaʼm pědi nikauhẹ̌ nakoạ senggọ sěmbaụ, mase ěnnungu pědi lai wal᷊ine e nikoạ kerene.

¹⁷Sasangetange arěgang limaʼm pul᷊o su waụ e nisangẹ su wiwihu senggọ humotong, dingangu limaʼm pul᷊o su waụ e su senggọ karuane.

¹⁸Bọu ene nikoateng sasangetange limaʼm pul᷊o su waụ e wọu pera tadeạu ipěngauhẹ̌ senggọ darua ene makoạ atụ u Tenta.

¹⁹Bọu ene nẹ̌koạ lai lahěping e rarua waugu Tenta, sěmbaụ bọu pising domba esẹ nilaburangu mahamụ, dingangkewelain bal᷊ine e wọu pisị al᷊usẹ̌.

²⁰Bọu ene i sire nẹ̌koạ bal᷊unangu Tenta darihine matatul᷊idẹ̌ bọu kalung akasia.

²¹Apan duhine rangẹ e ěpạ u meterẹ̌ dingangu wěnahe ěnnungu pul᷊o ěnnung su sentine.

²²Apan duhine nikoateng darihine pẹ̌sěmparẹ̌, hakịu manga ruhine ene e botonge ikasěmpụ sěmbaụ su wal᷊ine.

²³Baugu wahageang sěmběkan timuhẹ̌ bọu Tenta e nikoateng umbaghane ruam pul᷊o su waụ e,

²⁴dingangu kakaianenge wọu sal᷊aka ěpạ u pul᷊o su waụ e, darua watuhu wawa apam umbaghane waugu rihine rarua.

²⁵Baugu Tenta watuhu sawěnahẹ̌ nikoateng bal᷊unange ruaʼm pul᷊o,

²⁶kakaianenge ěpạ u pul᷊o wọu sal᷊aka, darua su al᷊unge wawa apang umbaghane.

²⁷Baugu Tenta sul᷊ikude watuhu sěmběkang bahẹ, nikoateng bal᷊unange ěnnungu waụ,

²⁸dingangu umbaghane rarua su wukune.

²⁹Apang umbaghane wukune ene nisěmpụ su laede turusẹ̌ sarang bowone rasị, bal᷊unange rarua kụ pinẹ̌bukuange e nikoạ lai kerene.

³⁰Tangú kěbị ute kai 8 umbaghane dingangu ral᷊aede wọu sal᷊aka 16 su waụ e, pẹ̌tahạ darua wawa su al᷊unge apang umbaghane sěmbaụ.

³¹Mase i sire nẹ̌koạ kalu wawal᷊andange wọu kalung akasia, mapul᷊o l᷊ima su waụ e, lima waugu manga rarihine su sěndihangu Tenta,

³²lima waugu sěndihange wal᷊ine, dingangu lima lai waugu likudʼu Tenta sěmběkam bahẹ.

³³Bawal᷊andange sutal᷊oarane, nipasẹ̌ maloarang umbaghane karangẹ e, bọu pondol᷊e sarang pondol᷊u Tenta ene.

³⁴Darihin Tenta ringangu manga kalu wawal᷊andange ene nilapisangu wul᷊aeng, mase nitahoěngu manga ghal᷊ange wul᷊aeng ipěnahang manga kalu ene.

³⁵I sire lai němpẹ̌koạ dal᷊anse wọu hekạ leneng al᷊usẹ̌ nikahiwuang dingangu wolẹ̌ birụ, kamumụ dingangu mahamụ, bọu e nisujikangu gambaru kerub.[39]

³⁶Mědeạu pěnangetang hekạ ene nikoạteng darihine wọu kalung akasia ěpạ u waụ niěmboěngu wul᷊aeng dingangu kakaị e wul᷊aeng kụ nitaho su wowong kal᷊aianenge wọu sal᷊aka, ěpạ u waụ.

³⁷Bọu ene nikoateng dal᷊anse waugu tukadu Tenta wọu leneng al᷊usẹ̌ nikahiwuang dingangu wolẹ̌ birụ, kamumụ dingangu mahamụ mase nilẹ̌gahengu sasujị e.

³⁸Baugu ral᷊anse ene nikoateng dihine limam baụ kụ nipẹ̌dal᷊ahakị dingangu manga kakaị e. Apang pondol᷊e ringangu apang pẹ̌sěmpukangu rihi lima ene, niwuhaěngu wul᷊aeng, arawe kal᷊aianenge lima e nikoạ wọu pera.