Read Sangir SASĚBANG 37 Bible Online

SASĚBANG 37 - Sangir bible

SASĚBANG 37

¹I Bezaleel nẹ̌koạ Petiʼm Pẹ̌dariandi wọu kalung akasia, nandune 110 su sentine, běnahe, ringangu rangẹ e pẹ̌tahạ 66 su senti meterẹ̌.

²Dal᷊unge ringangu likude niěmboěngu wul᷊aeng sahị, mase nikoateng bingkene wul᷊aeng nipakal᷊ikụ.

³Bọu ene kinoạ e ghal᷊ang bul᷊aeng ěpạ baugu kalu papikul᷊ange kụ nipasẹ̌ e su ral᷊aedu peti ěpạ e, kụ gal᷊ange rarua su apan sěndihange.

⁴Nikoạ lai papikul᷊ange wọu kalung akasia, ringangu niěmboěnge ringangu wul᷊aeng,

⁵mase kalu papikul᷊ange nitaho su ral᷊ungu ghal᷊ang su apạewen sěndihangu peti ene.

⁶Bọu ene nikoạ e tatakạe sěmbaụ bọu wul᷊aeng sahị, nandune 110 su sentine ringangu wěnahe 66 su sentine.

⁷Nikoạ e lai kerub[40] darua wọu wul᷊aeng nisěsal᷊ẹ̌,

⁸sěmbaụ su apang pondol᷊u tatakạ e. Tul᷊adang malạekatẹ̌ darua ene e nikoạ hakị dingangu tatakạ e,

⁹mase koateng pẹ̌tatěngo, ringangu papanide kạbawingkahẹ̌ ipẹ̌nimbuhung tatakạ peti ene.

¹⁰I Bezaleel nẹ̌koạ meda wọu kalung akasia, nandune 88 su senti metere, běnahe 44 su senti metere dingangu rangẹ e 66 su sentine.

¹¹Meda ene niěmboěngu wul᷊aeng sahị piạ lauwunge nilikụ bọu wul᷊aeng.

¹²Mase i sie nẹ̌koạ dal᷊ungu meda kawěnahe 7,5 su senti metere. Dal᷊unge ene nikoateng lauwunge wọu wul᷊aeng nipakal᷊ikụ.

¹³Nikoạ e ghal᷊ange ěpạ sasuhiangu kalu papikul᷊ange kụ nisakẹ e su wukung laedu meda ěpạ.

¹⁴Gal᷊ang tatanudẹ̌ kaluʼm papikul᷊ange nipasẹ̌ su rěduhu wiwihu meda.

¹⁵Papikul᷊ang ene nikoạ bọu kalung akasia kụ nipikungu wul᷊aeng.

¹⁶I sie nẹ̌koạ lai manga l᷊amạ, lainumang ketelẹ̌ dingangu manga mangko waugu sasěmba akẹ u anggorẹ̌. Kal᷊awọu apal᷊iwụ u meda e nikoạ e wọu wul᷊aeng sahị.

¹⁷I Bezaleel nẹ̌koạ laedu sol᷊o wọu wul᷊aeng sahị. Kal᷊aianenge ringangu pěngangumpaedange nikoạ bọu wul᷊aeng nisěsalẹ̌. Manga bungang dal᷊ẹ̌gahe, narekeng lai měsị e ringangu kohabe nikoạ hakị dingangu pul᷊ane.

¹⁸Su pul᷊ane ene nikoạ lelange ěnnung, tahạ těllu lelang su apan sěndihange.

¹⁹Su apang lelange nikoateng dal᷊ěgahe mạngawẹ bungangu kalum badam tatěllu piạ měsị e ringangu kohabe.

²⁰Su pul᷊ane nikoateng dal᷊ěgahe kere bungangu kalum badam ěpạ piạ měsị e ringangu kohabe.

²¹Su al᷊ungu pẹ̌darokatengu lelange rarua e kinoạ e pẹ̌bihisange sěmbaụ.

²²Patikụ dal᷊aedu sol᷊o ene ringangu manga pẹ̌bihisange ore lai manga lelange nikoạ bọu wul᷊aeng sahị sěmpědi nisěsal᷊ẹ̌.

²³Su ral᷊aedu sol᷊o e nikoạ e sol᷊o pituʼm baụ dingangu pakakasẹ̌ baugu wawurěsi sobung sol᷊o ringangu dulange wọu wul᷊aeng sahị.

²⁴Baugu pẹ̌koạ dal᷊aedu sol᷊o ringangu kakoạ e pěnadiang bul᷊aeng sahị 35 su kilone.

²⁵I Bezaleel nẹ̌koạ pananěmbaěng sěmbaụ bọu kalung akasia baugu pěnanutungang kamania. Pananěmbaěng ene nẹ̌buku ěpạ mẹ̌sul᷊ung; nandụ e ringangu wěnahe pẹ̌tahạ 45 su sentine katewe rangẹ e 90 su sentine. Su wowom bukune ěpạ e nikoateng sungene nasěmbaụ dingangu pananěmbaěng ene.

²⁶Sěndihange ěpạ bowone rasị dingangu manga sungene nipikungu wul᷊aeng sahị dingangu rul᷊unge nikoateng lauwunge wul᷊aeng.

²⁷Nikoatengu l᷊ai ghal᷊ange su al᷊ungu wingke wul᷊aeng su sěndihange rarua mědeạu ipěnanudẹ̌ kalu papikul᷊angu pananěmbaěng ene.

²⁸Papikul᷊ang ene nikoạ bọu kalung akasia ringangu nipikungu wul᷊aeng.

²⁹ I Bezaleel nẹ̌koạ l᷊ai lanaʼn dal᷊anisẹ̌ dingangu kamania sahị dal᷊urune mawěngi nilaukang kere lana mawěngi.