Read Sangir SASĚBANG 38 Bible Online

SASĚBANG 38 - Sangir bible

SASĚBANG 38

¹I Bezaleel něngal᷊ạ kalung akasia, bọu e nikoạ pananěmbaěng baugu sasěmba tẹ̌tutungang. Pananěmbaěng ene nẹ̌buku ěpạ, nandune ringangu wěnahe sěmbaụ-sěmbaụ 2,2 su metere, dingangu rangẹ e 1,3 su metere.

²Su apang bukune rasị bowone nikoateng sungene kụ pinakasěmbaụ dingangu pananěmbaěng ene. Kěbị harusẹ̌ pikuneng pera.

³Nikoạ e lai manga kaha, sikopẹ̌, mangko, manga porokẹ̌ dingangu tampạ u putung. Kal᷊awọu apal᷊iwụ tamai ene nikoạ bọu pera.

⁴Nikoạ anangu kawa wọu pera kụ nilawung su pananěmbaěng sěmpotọ bawa, dangẹ e maloara wọu rangẹ u pananěmbaěng.

⁵Mase nikoạ e ghal᷊ang ěpạ u waụ baugu kalu papikul᷊ang su wukune ěpạ batuhu wawa.

⁶Kalu papikul᷊ang ene kinoạ e wọu kalung akasia nipikunangu pera.

⁷Mase kalu rarua papikul᷊ang ene e nisuhine su ral᷊ungu ghal᷊ang su sěndihangu pananěmbaěng e ruam běka. Pananěmbaěng ene nikoạ e wọu pěpal᷊ẹ̌ dingangu watuhu ral᷊unge piạ huange.

⁸ I Bezaleel nẹ̌koạ pahighi wọu pera ringangu kal᷊aianenge pera. Pera ene wọu manga sahamingang tẹ̌taghuanengu manga wawine mẹ̌tatangkiang su sasuěkang u Tentaʼm MAWU Kasěllahenge.

⁹I Bezaleel němagarẹ̌ dělahu Tentaʼm MAWU ringangu ral᷊iwung bọu hekạ u leneng al᷊usẹ̌. Su sěmbẹ̌kan timuhẹ̌, nandune 44 su metere,

¹⁰kạpapěgong u rihi pera ruaʼm pul᷊o su wuane, sěmbaụ-sěmbaụ su ral᷊ungu kal᷊aianenge pera, dingangu kakaị e kụ pěngabitang e wọu sal᷊aka.

¹¹Su sěmběkan sawěnahẹ̌ mal᷊aing nikoạ kerene.

¹²Su sěmběkaʼm bahẹ dal᷊iwung nisakẹ nandune 22 su metere, dingangu rihine mapul᷊o ringangu ral᷊aede mapul᷊o, kakaị e ringangu sasěmpụ e nikoạ bọu sal᷊aka.

¹³Su sěmběkan daki, kụ piạ sasuěkange, běnahu ral᷊iwung e mal᷊aing 22 su metere.

¹⁴Su kaihi ringangu koanengu sasuěkang ene nisaketang u ral᷊iwung, nandune lawọ pẹ̌tahạ 6,6 u metere, dingangu rihine pẹ̌tahạ těllum bua ringangu kal᷊aianenge pẹ̌tahạ těllum baụ.

¹⁶Kal᷊awọu senggọ nangělikụ dělahẹ̌ ene nikoạ bọu hekạ leneng al᷊usẹ̌.

¹⁷Dal᷊aedu manga rihine nikoạ bọu pera, arawe kakaị, sasempụ e ringangu kotọ u rihine nikoạ bọu sal᷊aka. Kěbị dihi sěnaung dělahẹ̌ ene nihakị sěmbaụ su wal᷊ine ringangu kakaị e sal᷊aka.

¹⁸Dal᷊ansen sasuěkangu pasěllangengu rělahẹ̌ ene nikoạ bọu leneng al᷊usẹ̌ nikahiwuang dingangu wolẹ̌ birụ, kamumụ dingangu mahamụ kụ nilěgahengu sasujị e. Nandụ e sio meterẹ̌ dingangu rangẹe dua meterẹ̌ mẹ̌sul᷊ung u ral᷊iwung bọu rělahẹ̌.

¹⁹Hekạ u tukadẹ̌ ene nikansing u rihi ěpạ piạ dal᷊aede ěpạ bọu pera. Kakaị e kěbị, tatakạ pusigu rihi ringangu senggetange nikoạ bọu sal᷊aka,

²⁰arawe manga papasị e waugu Tenta ringangu pagare nikoạ bọu pera.

²¹Seng ini e rol᷊ẹ̌ u patikụ uada ipakẹ su ral᷊ungu Tentaʼm MAWU, tampạ u watu rarua ringangu Titaʼm Mawu Mapul᷊o ene niresọ. Dol᷊ẹ̌ ene nikoạ ual᷊ingu parentan Musa ringangu nihundugu tau Lewi kụ něhal᷊ẹ̌ su laahạ i Itamar anạ u Imang i Harun.

²²I Bezaleel anạ i Uri, pulung i Hur bọu hěnton Yehuda, mẹ̌kẹ̌koạ kal᷊awọu apang niparentang MAWU.

²³Lumaontol᷊e, i Aholiab anạ i Ahisamakh bọu hěnton Dan, ute sěngkatau měngangukirẹ̌, mělahingidẹ̌ dingangu měngangahiwuang hekạ u leneng al᷊usẹ̌, ore lai wolẹ̌ birụ, kamumụ dingangu mahamụ.

²⁴Bul᷊aeng kụ nisěmba su MAWU waugu Tenta Susi kěbị sěhiwu su kilone kal᷊awọe, nitimbang tuhụ timbangeng kụ ipẹ̌pakẹ su Tentaʼm MAWU.

²⁵ Sal᷊aka kụ nikaẹ̌bakeng bọu rol᷊ẹ̌ u tau Israel kal᷊awọe 3.430 su kilone nitimbang tuhụ timbangeng kụ ipẹ̌pakẹ su Tentaʼm MAWU.

²⁶Dekenange ene mẹ̌sul᷊ungu apa kụ baehang u patikụ taumata kụ mạbawohẹ su ral᷊ungu rol᷊ẹ̌ ene. Apan taumata měmaehẹ̌ kerẹewe seng nitantu, nitimbang tuhụewe timbangeng ipẹ̌pakẹ tempo ene. Su pěndarol᷊ẹ̌ ene kạbawohẹ 603.550 su kataune manga esẹ umure su wowong 20 su taunge.

²⁷Bọu sal᷊aka ene, 3.400 su kilone nipakẹ baugu pẹ̌koạ dal᷊aedẹ̌ dihi 100 su wuane baugu Tentaʼm MAWU ringangu ral᷊ansene. Dal᷊aede sěmbaụ běhạ e 34 su kilone.

²⁸Bọu lěmben sal᷊aka ene, bědang 30 su kilone, i Bezaleel nẹ̌koạ manga sasěmpụ e ringangu manga kakaị e waugu rihine, ore lai tatakạ manga pusigu rihi ene.

²⁹Pera kụ nisěmba su MAWU kěbị kal᷊awọe 2.425 su kilone.

³⁰Pera ene nipakẹ baugu pẹ̌koạ dal᷊aedu tukadu Tentaʼm MAWU, pananěmbaěng kụ nianang bọu pera, kal᷊awọu apal᷊iwụ u pananěmbaěng,

³¹dal᷊aedu senggọ piněliwung dělahẹ̌ dingangu tukadu pasěllangenge, kěbị papasị Tenta dingangu rělahe nal᷊ikụ e.