Read Sangir SASĚBANG 39 Bible Online

SASĚBANG 39 - Sangir bible

SASĚBANG 39

¹I Bezaleel dingangu i Aholiab nẹ̌koạ pakeangu pẹ̌tahamawu e wọu wolẹ̌ birụ, kamumụ dingangu mahamụ baugu manga imang su tempong i sire mẹ̌munara su Huang Susi. Pakeangu imang baugʼi Harun nikoạ kere niparentam MAWU si Musa.

²Efod nikoạ bọu leneng al᷊usẹ̌, wolẹ̌ birụ, kamumụ dingangu mahamụ, dingangu banang bul᷊aeng.

³I sire naněsal᷊ẹ̌ bul᷊aeng nipakapipi kụ bọu ene nipẹ̌papapotọ nakoạ banaěng manipị, mase nikahiwuang dingangu hekạ u leneng al᷊usẹ̌ dingangu wolẹ̌ birụ, kamumụ dingangu mahamụ.

⁴Bọu ene nikoạ darua tal᷊i laikị běmbang u lakụ efod kụ nighepẹ surul᷊unge.

⁵Papehẹ nikahiwuang al᷊usẹ̌ nikoạ bọu kakoạ e mẹ̌sul᷊ung kụ nighepẹ su efod ene hakịu nakoạ sěmbaụ kerẹewe seng niparentan MAWU e si Musa.

⁶I sire něngasa watung dělima wọu e nitaing su ral᷊ungu bingke wul᷊aeng. Dingangu napenẹ u kapande i sire němpěngetạ arengu anạ i Yakub i sire mapul᷊o dua su manga watu ene.

⁷Bọu ene kal᷊awọu watu ene nitaing su tal᷊ing běmbang u efod kere tandang tatahěndung su hěnton Israel mapul᷊o dua e kerẹewe niparentang MAWU si Musa.

⁸I Bezaleel dẹ̌duang Aholiab nẹ̌koạ tatakạ sěbạ bọu kakoạ e mẹ̌sul᷊ung dingangu efod, dingangu sasujị e mal᷊aing mẹ̌sul᷊ung.

⁹Koạ e nẹ̌buku ěpạ nilěpi rarua, běnahe ringangu nandụ e pẹ̌tahạ 22 su sentine.

¹⁰Su tatakạ sěbạ ene i sire nẹ̌taingu watum paramata ěpạ u wěhị. Su wěhị humotong batung dělima, topas, dingangu widuri sal᷊iawuhẹ̌.

¹¹Su wěhị karuane paramata wirụ, batung nilam dingangu intang.

¹²Su wěhị e katěllune, batung lazuardi, batung paramata piạ awạ e, ringangu watu kecubung.

¹³Su wěhị e kaěpạ e, watung pirus, yakut, dingangu intang sampakang. Paramata mapul᷊o dua ene napahěkụ u wul᷊aeng.

¹⁴Su apang paramata ene pinangetakeng u areng sěmbaụ bọu tal᷊oarang anạ i Yakub mapul᷊o dua nakoạ tatialang manga hěntong Israel.

¹⁵Bọu ene nikoateng hante wọu wul᷊aeng sahị darua kụ nipitagẹ̌ kere tal᷊i.

¹⁶Nikoateng lai ghal᷊ange wul᷊aeng darua nisakẹ su pondol᷊e rarua su wowon tatakạ sěbạ ene.

¹⁷Mase hante wul᷊aeng darua ene nitaho su ghal᷊ang ene,

¹⁸ringangu pondol᷊e rarua wal᷊ine nịlaikị su wingkene rarua, hakịu tatakạ sěbạ ene nẹ̌dal᷊ahakị u tal᷊iʼm běmbang u efod batuhu těngone.

¹⁹Mase nikoạ lai ghal᷊ang darua wọu wul᷊aeng kụ nitaing su tatakạ sěbạ ene, su pondol᷊e wawa su ral᷊unge kahinoěngu efod.

²⁰Bọu ene nikoateng lai ghal᷊ang bul᷊aeng darua kụ nitaing su těngon tal᷊ing běmbangu efod darua, maraning pẹ̌sěmakengu ghaghepẹ e watuhu wawa, su wowong papehẹ bọu kahiwuange masikome.

²¹Kerẹewe parentaʼm MAWU si Musa, gal᷊ang tatakạ sěbạ ihakị dingangu tal᷊i wirụ su ghal᷊ang u efod, hakịu tatakạ sěbạ ene těbewe piạ, su wowong papehẹ dingangu tawe mawuka.

²²Lakụ manandụ ipẹ̌pakẹ su wowong efod, kěbị nikoạ bọu wolẹ̌ birụ.

²³Lohangu lehẹ e pinakatoghasu ral᷊apise nikahiwuang tadeạu ta waharia maghehẹ.

²⁴Sěnaung patikụ biwihe wawa e koate ral᷊ěgahe wuang dělima wọu hekạ leneng al᷊usẹ̌, wolẹ̌ birụ, kamumụ dingangu mahamụ, ipẹ̌bẹ̌bawělạ dingangu ghiring-giring bọu wul᷊aeng, kerẹewe parentan MAWU e si Musa.

²⁷I sire nẹ̌koạ kameja waugʼi Harun dingangu manga anạ e

²⁸umbe, destar, sal᷊ana manimbụ bọu leneng,

²⁹dingangu papehẹ bọu hekạ u leneng al᷊usẹ̌, wolẹ̌ birụ, kamumụ dingangu mahamụ, piạ dal᷊ěgahe sasujị, kerẹewe niorong MAWU si Musa.

³⁰Nikoateng lai ral᷊ěgahe wọu wul᷊aeng sahị, tatiala watụ u i sire seng nitani waugu MAWU. Kụ su ral᷊ěgahẹ̌ ene seng kạkaketạ bawera, ”Nitani waugu MAWU.”

³¹Dal᷊ěgahẹ̌ ene nitaing su umbe su wahageang těngone, natuhụ kere su parentan MAWU si Musa.

³²Tangú nauadipe kěbị munarang pẹ̌kakoạ Tentaʼm MAWU. Tau Israel seng nẹ̌koạ patikụewe kere niorong MAWU e si Musa.

³³Tangú i sire němpẹ̌bawa Tenta sarang anung Musa dingangkeweng kal᷊awọu kakoạ e, manga kakaị e, manga kalu wawal᷊andang e, manga rihi ringangu ral᷊aede,

³⁴laatụ e wọu rukụ u kambing esẹ kụ nihamukang, tatakạ e wọu pisị al᷊usẹ̌, hekạ tatimbokonge.

³⁵Petiʼm Pẹ̌dariandi lohong batu rarua piạ kalu papikul᷊ange ringangu tatakạ e,

³⁶meda ringangu kěbị apal᷊iwụ e ringangu borotẹ̌ sasadia,

³⁷ral᷊aedu sol᷊o wọu wul᷊aeng sahị, sol᷊one ringangu kěbị kakoạ baugu sol᷊o,

³⁸pananěmbaěng bọu wul᷊aeng, lana ral᷊anisẹ̌, buwụ mawěngi, dal᷊anseng sasuěkang u Tenta,

³⁹pananěmbaěng pera nianang bọu kawa pera, kalu papasanengange ringangu kěbị kakoạ e; bakẹ̌ tampạ u pěnganguhaseng dingangu pěmamělloěnge,

⁴⁰manga ral᷊iwung baugu rělahẹ̌ dingangu manga rihine ringangu ral᷊aede, ral᷊ansen sasuěkang u pasěllangeng baugu rělahẹ̌ sarang lai manga tal᷊ine, papasị Tenta; kěbịewe apal᷊iwụ apang ipakẹ su ral᷊ungu Tenta,

⁴¹dingangu pakeangu imang su tempong i sire sumuẹ̌ mẹ̌kal᷊iomaneng su Huange Susi ringangu pakeange tani waugʼi Harun dingangu manga anạ e.

⁴²Tau Israel seng nẹ̌koạ kěbị hal᷊ẹ̌ ene kere niorong MAWU si Musa.

⁴³I Musa němarikẹ̌sa kěbị ene ringangu nakasilo u i sire seng nẹ̌koạ ene nẹ̌kětạ kerẹewe seng niorong MAWU. Bọu e i Musa něngal᷊amatẹ̌ si sire.