Read Sangir SASĚBANG 4 Bible Online

SASĚBANG 4 - Sangir bible

SASĚBANG 4

¹Bọu e i Musa simimbahẹ̌ su MAWU, ”Kụ kai kereapa kereu tau Israel tawe mangimang dingangu tawe rumaringihẹ̌ manga waweraku? Kai apa hinon takụ koateng kereu i sire mẹ̌bera u MAWU tawe mẹ̌těngkatodẹ u watangenge si siạ?”

²MAWU e nakiwal᷊o si Musa, ”Kai apa ěndaị su l᷊imanu?” Sasimbang i Musa, ”Těking.”

³Angkuěngu MAWU, ”Teledẹ̌ko ěndaị ene su ěntana.” I Musa něneledẹ̌, kutẹu těking ene kawe nẹ̌bal᷊ui nakoạ těmpu kụ i Musa timal᷊ang mẹ̌těngkarau.

⁴MAWU e nẹ̌bera si Musa, ”Danieko těmpu ene, kụ hěgo su tol᷊ene.” I Musa himaungke kụ něnamẹ těmpu ene kụ mal᷊ighạ-lighạ nẹ̌bal᷊ui kapia nakoạ těking su limangkewen Musa.

⁵Angkuěngʼu MAWU, ”Pẹ̌koạko kerene tadeạu tau Israel mangimang u Iạ e kai Mawu Ruatang i upung i sire, Duatang Abraham, Ishak dingangu i Yakub seng nẹ̌tengkatodẹ u watangenge si kamene.”

⁶MAWU e něhengetangko l᷊ai si Musa, ”Suhiko l᷊imanu su ral᷊ungu pakeangu.” I Musa timuhụ, kụ sarětạeng i sie něnawụ l᷊imane pinakasěbang, kutẹu l᷊imane měngkate mawira-wira nitěmboěngu sakị su pisị makạtatakụ.

⁷Mase MAWU e něhengetang, ”Saụko suhi limanu kapia su ral᷊ungu pakeangu.” I Musa mẹ̌kẹ̌koạ kerene, ringangu piạ i sie něnawụ l᷊imane kapia, tangu limane ene seng nul᷊e.

⁸Angkuěngu MAWU, ”Kamageng i sire tawe mangimang si kau, arau tawe měngiaking sarětạeng seng nakasilo karal᷊inaụ humotong, tangu karal᷊inaụ sarung makakariadin sire mangimang.

⁹Kamageng i sire wědang lai tawe mangimang si kau maningbe i sire seng bọu nakasilo karal᷊inaụ darua ini, dingangu i sire tawe mahimang kal᷊awọu waweranu ute, pěngal᷊ạko akẹ kadodọ bọu Sal᷊ụ u Nil kụ bosoko su ěntana. Akẹ ene sarung mẹ̌bal᷊ui makoạ daha.”

¹⁰Arawe i Musa nẹ̌bera, ”O Mawu, iạ bal᷊inewe taumata pande mahumbisara, dongkeng kangerẹ sarangkewe orasẹ̌ ini, bọuten MAWU e něhengetang si siạ. Iạ e mawěhạ lilaku, mẹ̌bera mal᷊ongge ringangu mẹ̌tẹ̌tahatuẹ̌.”

¹¹MAWU e něhengetang si sie, ”I sai tangu něngonggọu mohong su taumata? I sai napakariadin si e mou ringangu wengelẹ̌? I sai napakariadin sie ta kal᷊ahuntikilang arau wuta? Iạ kai wal᷊inewe MAWU tangu?

¹²Kụ dakọ e, Iạ sarung mẹ̌tul᷊ung i kau mẹ̌bisara ringangu maněntirong apang hinong iweranu.”

¹³Arawe i Musa simimbang, ”Iạ e mẹ̌dorong kereu wotonge kumbahangbe měndolohu iạ Mawu, pěndolohẹ̌kon taumata wal᷊ine.”

¹⁴Mase MAWU e limangehẹ̌ si Musa kụ něhengetang, ”I kau wal᷊inewe piạ anạ u sěngkataunu i Harun? Iạ masingkạ i sie taumata pande mẹ̌bisara. Mamben těngadẹ̌ i sie seng kadamahine sol᷊ong ini, kụ i sie sarung mal᷊uasẹ̌ mẹ̌sombang i kau.

¹⁵Pẹ̌bisarako ringange kụ paul᷊ikọ si sie apa hinong iwerane. Iạ e sarung mẹ̌tul᷊ung i rua ringangu měněntirong apa hinong iwera ringangu koateng i rua.

¹⁶I sie harusẹ̌ mahumbisara wọu arengu su těngong kawanua. I sie sarung makoạ mẹ̌bawerang baweranu dingangu i kau ikoạ kere Ruata mẹ̌berang apa hinong ipẹ̌berane.

¹⁷Bawạ e těking ene, i kau sarung makakoạ kal᷊awọu munara makạdal᷊inaụ ual᷊ingu těking ene.”

¹⁸Bọu ene i Musa napul᷊ẹ sol᷊ong bal᷊eng Yitro i empone, kụ nẹ̌bera si sie, ”Apakawalako iạ e reng mẹ̌bal᷊ị sol᷊ong Misirẹ̌ mẹ̌tiwo anạ u sěngkatauku měnsang bědangbeng biahẹ̌.” I Yitro nẹ̌bera si Musa, ”Dakọ e ral᷊eng su pẹ̌darame.”

¹⁹Piạ i Musa wědang su ěntanang Midian, MAWU e něhengetang si sie, ”Pẹ̌sul᷊ẹ e sol᷊ong Misirẹ̌. Kěbị taumata kụ lụěnning u měmate si kau seng nasue nate.”

²⁰Tangu i Musa němaringangu kawinge ringangu manga anạ e kụ napaawị i sire su wowong kalide bọu e sěngkatamai sol᷊ong Misirẹ̌. Kụ kahiang parentan Mawu tangu i Musa mal᷊aing nẹ̌bawa těking e.

²¹MAWU e něhengetang si Musa, ”Iạ seng něngonggọu kawasa si kau mědeạu mẹ̌koạ manga munara makạdal᷊inaụ. Kụ kamageng i kau seng mẹ̌sul᷊e su Misirẹ̌ tangu pẹ̌koạ e kal᷊awọu karal᷊inaụ ene su těngon datung Misirẹ̌. Arawe Iạ sarung mapẹ̌tungkětị u těmbọ, hakịu i sie tawe mapakawalan bansa ene tamai.

²²Mase pẹ̌berako su ratu ene u Iạ, MAWU e kai naul᷊ị kere ini: ’Israel kai anạ-Ku i akang,

²³ dingangu i kau sen Takụ oroěng pamalang anạ-Ku ene apatamai tadeạu i sie makapẹ̌tahamawu si Siạ, arawe i kau tawe rumararingihẹ̌. Tangú Iạ sarung měmate anạu i akang.’ ”

²⁴Su tampạ sěmbaụ pẹ̌dasengang su raral᷊engang ene, MAWU e riměnta su anun Musa kụ měmate si sie.

²⁵I Zipora kawinge něngal᷊a e watu mahoro sěmbaụ kụ něnduru kotọ u kasasiliangu anạ e, mase itẹ̌tonạ e su laedʼi[6] Musa. Angkuěng i Zipora, ”I kau esẹ tatialan daha si siạ.”

²⁶Hal᷊ẹ̌ ene niwerane ual᷊ingu piạ kal᷊ahěmpukange ringangu hal᷊ẹ̌ u pẹ̌sasasunatẹ̌. Tangú MAWU e tawe nisěhụ němate si Musa.

²⁷Ene MAWU e něhengetangke si Harun, ”Dakọko sol᷊ong banua l᷊inggi pẹ̌sombang i Musa.” I Harun tamaị e, kụ bọu ene nẹ̌sombangu tuarine su wul᷊ude susi, kụ diměngu si sie.

²⁸I Musa nẹ̌běke si Harun kal᷊awọu apam piněhengetangu MAWU si sie su tempong i sie nirolohẹ̌ pinẹ̌sul᷊e sarang Misirẹ̌, kerene lai mạanung kěbị apang makạdal᷊inaụ kụ hinong koatenge.

²⁹Bọu ene i Musa rẹ̌duang Harun nakoạ sol᷊ong Misirẹ̌ kụ nẹ̌nampungu kal᷊awọu těmbonangu Israel.

³⁰I Harun něhabarẹ̌ si sire patikụ apang piněhengetangu MAWU si Musa, kụ i Musa e nẹ̌koạ e patikụ karal᷊inaụ ene su těngon sire ene.

³¹Ene nangimangke i sire, kụ piạ i sire nakaringihẹ̌ u MAWU kawe seng nẹ̌kakělla tau Israel dingangu nakasilo kal᷊awọu sigěsạ i sire tangu i sire němpẹ̌těngkasumagẹ̌ naněmba.