Read Sangir SASĚBANG 40 Bible Online

SASĚBANG 40 - Sangir bible

SASĚBANG 40

¹MAWU e něhengetang si Musa,

²”Pětịko Tenta-Ku su tanggalẹ̌ humotong bul᷊ang humotong.

³Suẹ̌ko su ral᷊unge Petiʼm Pẹ̌dariandi piạ lohone Tita Mapul᷊o ringangu taingko hekạ tatakạ e su těngone.

⁴Pěloingkon meda ringangu kal᷊awọu apal᷊iwụ e. Suẹ̌ko lai ral᷊aedu sol᷊o apidẹ̌ dikọ sol᷊one.

⁵Pělọko pananěmbaěng bul᷊aeng tampạ u pěnanutungang buwụ su těngon Petiʼm Pẹ̌dariandi, mase pěnangẹko ral᷊anse su sasuěkangu Tenta.

⁶Pělọko pananěmbaěng baugu sasěmba tẹ̌tutungang su těngon sasuěkangu Tenta.

⁷Pělọko bakẹ̌ u akẹ su wělạ u Tenta ringangu pananěmbaěng ene, kụ bọu ene lohoingkong akẹ.

⁸Bọu ene sangẹko senggọ pangělikụ dělahu Tenta, dingangu pěmitingko ral᷊anseng sasuěkangu pasěllangeng baugu rělahu Tenta.

⁹Bọu ene Tenta ringangu kal᷊awọu apal᷊iwụ e harusẹ̌ isěmbanu si Siạ kụ laniseng lanang dal᷊anisẹ̌, tangú kěbị e taniko waugu Iạ.

¹⁰Kụ sarakangke pananěmbaěng dingangu kal᷊awọu apal᷊iwụ e ringangu kakoạ e kerene, tadeạu kěbị e itani waugu Iạ.

¹¹Koạko kerene lai ringangu bakẹ̌ u akẹ dingangu wal᷊ahuange.

¹²Bọu ene, dolohẹ̌ko i Harun dingangu manga anạ e aparěnta sol᷊ong sasuěkang u Tenta kụ apamurěsi watangenge.

¹³Luheko pakeangu imang si Harun dingangu lanisẹ̌ko i sie tadeạu samatang baugu pẹ̌tangkiang si Siạ kere sěngkatau imang.

¹⁴Bọu e rolohẹ̌ko manga anạ e pahaung, kụ luheingkong kameja i sire.

¹⁵Bọu ene lanisẹ̌ko i sire kerẹewe i kau nělanisẹ̌ si amang i sire, tadeạu i sire mal᷊aing makapẹ̌tangkiang si Siạ kere imang. Kụ ual᷊ingu tundung pěndal᷊anisẹ̌ ene, tangú hěnton sire mẹ̌bẹ̌bawělasẹ̌ e, měngangumbelẹewe pangkatʼu imang.”

¹⁶I Musa e mẹ̌kẹ̌koạ patikụ kerẹewe seng niparentam MAWU.

¹⁷Kụ su tanggalẹ̌ humotong bul᷊ang humotong taung karuane samurin tau Israel naněntang u Misirẹ̌ e, Tentaʼm MAWU e nisakẹ.

¹⁸I Musa e naměllọu manga laěmpahe, napararisị u manga ruhine, němasẹ̌ u manga kalu wawal᷊eange, ringangu napateing manga rihine.

¹⁹Bọu e niwatede atụ u Tenta ringangu tatakạ likude rasị kere niorong MAWU.

²⁰Bọu ene watu rarua ene nitahone su ral᷊ungu Petiʼm Pẹ̌dariandi. Bọu e i Musa něnakẹ u tatakạ Peti ringangu něnuẹ̌ kalu papasanengang su ral᷊ungu ghal᷊ange.

²¹Mase i Musa naměllọ u Peti ene su ral᷊ungu Tenta kụ němitingu hekạ tatimbuhunge su těngone, kerẹewe seng niorong MAWU e si sie.

²²Bọu ene i Musa něměllọu meda su ral᷊ungu Tenta, su sěmběkan sawěnahẹ̌ su l᷊ikudu hekạ dal᷊anse,

²³kụ su wowong meda ene piněměllọkangu borotẹ̌ sasěmba, kerẹewe niorong MAWU e si Musa.

²⁴Dal᷊aedu sol᷊o nipěllọ e su ral᷊ungu Tenta, su sěmběkan timuhẹ̌, mẹ̌tẹ̌těngon meda ene,

²⁵mase manga sol᷊o e nirikọ e su těngom MAWU.

²⁶Pananěmbaěng bul᷊aeng nipěllọe su ral᷊ungu Tenta su těngon dal᷊anse,

²⁷mase nitutunge wuwụ mawěngi kerẹewe niorong MAWU e si Musa.

²⁸I Musa němitingu ral᷊ansen sasuěkangu Tenta,

²⁹kụ su těngon sasuěkang ene nipěllọ e pananěmbaěng baugu sasěmba tẹ̌tutungang. Su wowong pananěmbaěng ene nipěllọ e sasěmba tẹ̌tutungang dingangu sasěmba sẹ̌sadiang.

³⁰Bakẹ̌ tambaga e nipělọ e su wělạ u Tenta ringangu pananěmbaěng, bọu nilohone ringangu akẹ.

³¹I Musa, i Harun dingangu manga anạ e něnguhasẹ̌ lima ringangu laedʼi sire sene,

³²balạewe apan sasuẹ̌ i sire su ral᷊ungu Tentaʼm MAWU arau mẹ̌těngkasandigu pananěmbaěng.

³³Mangělikụ Tenta ringangu pananěmbaěng ene i Musa e němiting senggọ, kụ i sie něnangẹ u ral᷊ansen sasuěkangu pasěllangeng baugu rělahẹ̌ e. Tangú nauadipe kal᷊awọu munara ene.

³⁴ Bọu ene natěntungke winawa nělingkubẹ̌ Tentaʼm MAWU, ringangu Tenta ene napenẹ u tualagu rarěntan MAWU.

³⁵Ual᷊ingu ene i Musa tawe nakasuẹ̌ su ral᷊ungu Tenta ene.

³⁶Su kasaung laawị u winawa ene bọu wowon Tenta ene, tau Israel něhengkẹ tentaʼn sire al᷊ingang sarang tampạ bal᷊ine.

³⁷Arawe kamagengu winawa ene tawe mahengkẹ, i sire tawe mẹ̌buạ bọu ene.

³⁸Karěngụewen tau Israel mẹ̌pẹ̌palilị, MAWU e ene su Tenta ene su awẹ u winawa su tempong ěllo ringangu su awẹ u putung su tempong hěbi.