Read Sangir SASĚBANG 5 Bible Online

SASĚBANG 5 - Sangir bible

SASĚBANG 5

¹Mase i Musa rẹ̌duang Harun tamai nẹ̌těngon datung Misirẹ̌ kụ nẹ̌bera, ”Kere ini parentang MAWU, Ruatang Israel, ’Apakawalako bansa-Ku pasěbang tadeạu i sire makapẹ̌kal᷊iomaneng si Siạ su wanua l᷊inggi.’ ”

²”I sai kai MAWU ene?” angkuěngu ratu. ”Kawe unụe iạ harusẹ̌ mẹ̌pandung si Sie ringangu mapakawalang tau Israel apasěbang? Iạ e wěgaweng MAWU ene ringangu tau Israel tawe takụ ipakawala pasěbang.”

³I Musa ringangu i Harun nẹ̌bera, ”Duatan tau Ibrani seng nẹ̌tengkal᷊ahẹ u watangenge si kami. Apakawalako i kami tamai sol᷊ong banua l᷊inggi karaung těllu ěllo su raral᷊engang baugu makapěnarakangu sasěmba su MAWU, Ruatang kami. Kereu i kami tawe mẹ̌koạ ene, i kami e sarung ipakapaten sahindạ arau paraěng.”

⁴Angkuěng u ratu si Musa rẹ̌duang Harun, ”Kawe unụe i kamene něnahaghe si sire hakịu i sire ale-ale měmpẹ̌koạ hal᷊ẹ̌ i sire? Oroiko manga ěllang ěndaị e pěhal᷊ẹ̌!

⁵I sire ene seng tumanịu mal᷊awọ dekenang e, kụ ini e tangu i kamene mapulu tadeạu i sire apạngirul᷊e měmpẹ̌hal᷊ẹ̌!”

⁶Ěllo ini tangu apang měnanahimata tau Misirẹ̌ dingangu apang mandorẹ̌ u tau Israel nakahombang parenta wọu ratu,

⁷”Kumbahang delaing mẹ̌gěllịu kalung ěmme mahěgu su wansa ene ipẹ̌koạ tela. Balako i sire apẹ̌deạ hala.

⁸Katewe pěngoroko si sire apẹ̌koạ tela kal᷊awọe abe pakal᷊intụ bọu nạung-nạung. I sire měngkate nạung mapulu mẹ̌těngkamalasẹ̌ samatang; hakịu ene i sire tatapẹ̌ sụsimbulung tadeạu ipakawala ipasěbang baugu měnarakang u sasěmba su Ruatan sire.

⁹Sihasai wue i sire tadeạu měmpẹ̌hal᷊ebe něngalembong kasěgadẹ̌, tadeạu i sire měngkate matasibung hal᷊ẹ̌ dingangu tawẹ loahe waugu mẹ̌daringihẹ̌ manga wěke konti.”

¹⁰Apang měnanitị tau Misirẹ̌ dingangu manga mandorẹ̌ u Israelẹ̌ siměbang kụ nẹ̌bera si sire tau Israelẹ̌, ”Datu e nẹ̌parenta tadeạu i kamene kumbahangbe saụ gělirangu rěmpugẹ̌.

¹¹I kamene harusẹ̌ mẹ̌deạ hala walạewe měnsang suapa, kaiso pẹ̌tahěndung bue tela nạung nikoạ i kamene tawe wotonge relaing maghaing bọu nạung kal᷊imona.”

¹²Tangu rimal᷊engke tau Israel nělikụ kasěllahu ěntanang Misirẹ̌ mědeạu měnampung kalung ěmme.

¹³Apang měnanahimatane turusẹ̌ měnẹ̌nahonsang tadeạu apang ěllo i sire makakoạbe tela kụ mẹ̌sul᷊ung kal᷊awọe kere nạung i sire nighěllirangu kalung ěmme.

¹⁴Apang měnanahimatane e němpẹ̌měbahẹ̌ kal᷊awọu mandorẹ̌ u tau Israel kụ nioro piněnahimata hal᷊ẹ̌. I sire němpẹ̌kibal᷊o, ”Unụe orasẹ̌ ini e bansanu e tawe nẹ̌koạ tela mẹ̌sul᷊ung kal᷊awọe kere kal᷊imona?”

¹⁵Bọe manga mandorẹ̌ u Israel tamai nẹ̌těngon datu kụ makịtatal᷊ẹ̌ntụ, ”Kawe unụ e i tuang nẹ̌koạ kere ini si kami?

¹⁶I kami tawe nighěllirangu kalung ěmme kaiso kawe nisihasa pẹ̌kẹ̌koạ tela! Arawe ini e i kami niwěbahẹ̌, sumbal᷊iau kawe sawohị tuang piạ sal᷊ane.”

¹⁷Datu e simimbang, ”I kamene e mambeng malaseng dingangu tawe mapulu měhal᷊ẹ̌. Kai ual᷊ingu ene i kamene nẹ̌dorong loahe si siạ baugu tamai měnarakangu sasěmba su Mawung kamene.

¹⁸Tamaị e pěhal᷊ẹ̌ kapia. I kamene seng tawe pẹ̌gilirangu kalung ěmme, kaiso i kamene tatapẹ̌ harusẹ̌ pẹ̌koạ tela mẹ̌sul᷊ung kal᷊awọe.”

¹⁹Manga mandorẹ̌ ene masingkạ u i sire kai su ral᷊ungu sigěsạ su piạ piněhabareng u tau Israel harusẹ̌ makakoạ tela těbe mẹ̌sul᷊ung kal᷊awọe kere seng nạung-nạung.

²⁰Piạ i sire siměbang bọu istana, i sire nẹ̌sombang i Musa rẹ̌duang Harun kụ seng kapěngẹ̌ngampal᷊ẹ̌ si sire.

²¹Angkuěngu manga mandorẹ̌ ene, ”MAWU e masingkạ u kakanoạ u! I Sie sarung měhukung si kamene! Seng i kamene makạdiading kami e ikẹ̌kawěnsing u ratu ringangu manga pěgawene hakịu i sire mapulu měmate si kami.”

²²Mase i Musa nẹ̌těngon MAWU kapia kụ nẹ̌bera, ”Mawu, unụe tau Israel kawe kinoạʼU nipakaral᷊akisẹ̌ kerene. Unụe i Kau e rimolohʼu iạ sol᷊ong ini?

²³Nanětạ deng iạ nẹ̌těngon datu kụ nẹ̌bisara su ral᷊ungu arengʼU, i sie nanětạ e mẹ̌tẹ̌tingkaị bansa ini. Kụ i Kau e tawe nẹ̌koạ apa-apa waugu mẹ̌tul᷊ung i sire.”

²⁴Bọu MAWU něhengetang si Musa, ”Ini e i kau sarung makasilo kereapa Iạ mẹ̌kakanoạ baugu ratu. I sie Takụ sihasaěng apěměllọu bansa-Ku. Mamben těngadẹ̌, i sie sarung Takụ sihasaěng ipěliwuahẹ̌ si sire wọu wanua ini.”