Read Sangir SASĚBANG 6 Bible Online

SASĚBANG 6 - Sangir bible

SASĚBANG 6

¹Duata nẹ̌bisarang Musa, angkuěngʼE, ”Iạ e MAWU.

² Iạ e mẹ̌těngkatodẹ u watangeng si Abraham, Ishak dingang i Yakub kụ kai Ruata Limembong Kawasa, arawe Ia e tawe mapakasingkạ u watangeng si sire ringangu arengu ’MAWU’.[7]

³Iạ e mal᷊aing mẹ̌taingu pẹ̌kakědo ringang i sire. Iạ mẹ̌diandi sarung měngonggọu wanuang Kanaan si sire, banua e tampạ i sire nạung kal᷊imona e němpẹ̌biahẹ̌ kere tau raghị.

⁴Iạ e seng nakaringihẹ̌ sasangị tau Israel kụ nipẹ̌tahuěllangu tau Misirẹ̌, bọu e Iạ makatahěndungke riandi-Ku ene.

⁵Kụ bohangko su tau Israel u Iạ e nẹ̌bera si sire: Kai Iạ e kai Mawu: I kamene sarung iakụ i pakal᷊iu wọu pẹ̌tatahuěllang u su tau Misirẹ̌. Iạ e sarung mapakal᷊ahẹu kawasa-Ku masaria waugu mapakasal᷊amati kamene ringangu mapakanawong hukumang maměhạ su tau Misirẹ̌.

⁶I kamene sarung Takụ i pakariadi umatẹ̌-Ku, dingangu Iạ makoạ Duatang kamene. Tangú i kamene sarung masingkạ u Iạ ini e kai MAWU, Ruatanu, kụ něliwiri kamene wọu pẹ̌tatahamawuang su Misirẹ̌.

⁷I kamene sarung Takụ iwawa sarang banua Takụ nipẹ̌diandi piạ salune si Abraham, Ishak dingangu i Yakub; ěntana ene Takụ nionggọ si kau makoạ tataghuanengu hala, kai Iạ e MAWU.”

⁸Kal᷊awọu tatumbal᷊ungu MAWU ene nipaul᷊ị i Musa su tau Israel, kaiso i sire tawe mẹ̌pandung si Musa, ual᷊ingu pẹ̌tatahuěllang kụ matingkaị ene e seng nakakaěnsu naung i sire.

⁹Bọu e MAWU e něhengetang si Musa,

¹⁰”Dakọko pětěngon datum Misirẹ̌ dingangu pẹ̌berako u i sie harusẹ̌ mapakawalang tau Israel měněntangu wanuane.”

¹¹Arawe i Musa simimbang, ”Tau Israel sẹ̌sane mạdiri rumaringihẹ̌ si siạ. Kụ kereapa wue mariadi kụ datung Misirẹ̌ dumaringihẹ̌be taumata wodo mẹ̌bisara kere iạ?”

¹²Kerene MAWU e hakịu něndolohʼi Musa rẹ̌duang Harun apẹ̌habarẹ̌ su tau Israel dingangu su ratung Misirẹ̌ u i sire kawe niparentan MAWU apěngahạ u tau Israel apasěbang bọu Misirẹ̌.

¹³Kai ini e salakẹ̌boěng i Musa rẹ̌duang Harun: Ruben, anạ i Yakub, kaiakaneng e piạ anạ e esẹ i sire ěpạ: i Henokh, i Palu, i Hezron dingangi Karmi. I sire ene kai i upungu ghal᷊ipoho su ral᷊ungu hěnton Ruben.

¹⁴I Simeon dingangu kawinge sěngkatau wawineng Kanaan piạ anạ e esẹ i sire ěnnung: i Yemuel, i Yamin, i Ohad, i Yakhin, i Zohar dingangu i Saul. I sire ene kai i upungu manga ghal᷊ipoho su ral᷊ungu hěnton Simeon.

¹⁵I Lewi piạ anạ e esẹ tatěllu: i Gerson, i Kehat dingangu i Merari; i sire ene i upungu manga ghal᷊ipoho su ral᷊ungu hěnton Lewi. I Lewi nakaratingu umure 137 su taunge.

¹⁶ I Gerson piạ anạ e ruang katau esẹ: i Libni ringangu i Simei; hěnton sire maral᷊awọ.

¹⁷I Kehat piạ anạ e manga esẹ i sire ěpạ: i Amram, i Yizhar, i Hebron dingangu i Uziel. I Kehat nakaratingu umbure 133 su taunge.

¹⁸I Merari piạ anạ e esẹ i rẹ̌dua: I Mahli rěduan Musi. Seng ene e manga gal᷊ipoho su ral᷊ungu hěnton Lewi ringangu hěnton sire sěngkatau-sěngkatau.

¹⁹I Amram nẹ̌kawing i Yokhebed, bawinen papạ e tuari, dingangu manga anạ i sire i Harun dẹ̌duang Musa. I Amram deng nẹ̌biahẹ̌ 137 su taunge.

²⁰I Yizhar piạ anạ e esẹ tatěllu: i Korah, i Nefeg, dingangu i Zikhri.

²¹I Uziel mal᷊aing piạ anạ e esẹ těllung katau: i Misael, i Elsafan dingangu i Sitri.

²²I Harun nẹ̌kawing dingang i Eliseba anạ i Aminadab bawine; Eliseba mal᷊aing anạ u sembaụ dingang i Nahason. I Eliseba něhěnding i Nadab, i Abihu, i Eleazar dingangu i Tamar.

²³I Korah piạ anạ e tatěllu esẹ: i Asir, i Elkana ringang i Abiasaf. I sire ene kai i upungu gal᷊ipohong balagʼi Korah.

²⁴I Eleazar, anạ i Harun esẹ, nẹ̌kawing dingangu sěngkatau wọu anạ i Putiel, kụ anạ i sire ute i Pinehas. Kụ ene kěbị ute kai kapitang gal᷊ipoho ringangu kapitam balagẹ̌ bọu hěnton Lewi.

²⁵I Harun dẹ̌duang Musa ene kụ seng niorong MAWU pẹ̌bẹ̌bawa tau Israel pạsěbang bọu ěntanang Misirẹ̌.

²⁶I rẹ̌dua nẹ̌těngon datung Misirẹ̌ tadeạu i sie mapakal᷊iun tau Israel.

²⁷Su tempong MAWU něhengetang si Musa su Misirẹ̌,

²⁸MAWU něhengetang, ”Iạ e kai MAWU. Paul᷊ịko su ratung Misirẹ̌ patikụ apan Takụ nipěhengetang si kamene.”

²⁹Arawe i Musa simimbang, ”MAWU, i Kau e masingkạ u iạ e tawe kapandeku mẹ̌bisara. Kụ mariadi tangu ratu e mapulu rumaringihẹ̌ si siạ?”