Read Sangir SASĚBANG 7 Bible Online

SASĚBANG 7 - Sangir bible

SASĚBANG 7

¹MAWU e něhengetang si Musa, ”Iạ e sarung mapakariading kau kere Ruata su těngon datu, ringangu anạ u sěngkataunu i Harun sarung mẹ̌bisara si sie kere nabinu.

²Paul᷊ịko si Harun kěbị apan Takụ nioro si kamene. Dolohẹ̌ko i Harun apẹ̌bera su ratu u i sie harusẹ̌ mapakawalan tau Israel měmpěněntangu wanuang Misirẹ̌.

³ Arawe Iạ e sarung mapẹ̌tungkětịu těmbọ u ratu. I sie sarung tawe mẹ̌pandung si kau, manilaing Iạ e maparěntang haghing hombang su Misirẹ̌.

⁴Ual᷊ingu ene Iạ sarung měhukungu tau Misirẹ̌ dingangu hukumang mawěhạ, mase manẹ̌bangu kal᷊awọu tau Israel umatẹ̌-Ku e; bọu wanua ene.

⁵Tangú tau Misirẹ̌ e sarung masingkạ u Iạ ini e kai MAWU, piạ Iạ něhukung i sire ringangu naněbangu tau Israel bọu wanuan sire.”

⁶I Musa rẹ̌duang Harun nẹ̌koạ apan niorong MAWU.

⁷I Musa umbure 80 su taunge ringangu i Harun 83 su taunge piạ i sire nẹ̌těngon datum Misirẹ̌.

⁸MAWU e něhengetang si Musa rẹ̌duang Harun,

⁹”Kereu ratu e mẹ̌dorong si kamene pẹ̌koạ karal᷊inaụ makoạ tatahutěngadẹ̌ ute rolohẹ̌ko i Harun apěngal᷊ạ teking e kụ pakiteledẹ̌ su ěntana su těngon datu. Teking ene sarung mẹ̌bal᷊ui makoạ těmpu.”

¹⁰Tangú rimal᷊engke i Musa rěduang Harun nẹ̌těngon datu kụ irẹ̌dua nẹ̌koạewe apang piněhengetangu Mawu Ruata. I Harun něneleden těkinge su ěntana su těngon datu ringangu manga sawohị e, mase těking ene nẹ̌bal᷊ui nakoạ těmpu.

¹¹Ual᷊ingu ene ratu e nẹ̌kui manga taumatane apan mapapande ringangu tahapẹ̌koạ karal᷊inaụ, mase i sire nipẹ̌koạ kerene lai ringangu karal᷊inaụ i sire.

¹²I sire něneledẹ̌ těking i sire su ěntana kụ manga těking ene nakoạ těmpu. Arawe těking i Harun něngělụ těking i sire.

¹³Maningbe kerene, datu e měngkai mẹ̌tẹ̌tungkětị u těmbọ dingangu tawe mapulu mẹ̌pandung u wawerang Musa rẹ̌duang Harun, kerẹewe nipěhengetang u MAWU.

¹⁴Bọu e MAWU nẹ̌hengetang si Musa, ”Datu ene tumanịu makětị těmbọ e; i sie tawe mapakawalan tau Israel apasěbang.

¹⁵Ual᷊ingu ene tamaị e pẹ̌sombang i sie reng mal᷊uka-l᷊ukadẹ̌, su tempong i sie ruměsung sol᷊ong Sal᷊ụ u Nil. Bawako těking kụ makoạ těmpu e kụ pěngampal᷊ẹ̌ sasongone su wiwihu sal᷊ụ.

¹⁶Pẹ̌berako su ratu ene: MAWU, Ruatan Ibrani, něndolohʼu iạ apělěhabarẹ̌ si Tuangku tadeạu mapakawalang umatʼE tamai mẹ̌kal᷊iomaneng si Sie su wanua l᷊inggi. Kaiso sarạeng orasẹ̌ ini i Tuangku e tawe mapulu rumaringihẹ̌.

¹⁷ Ual᷊ingu ene, MAWU e něhengetang kere ini, ’Bọu apang Takụ kinoạ sarung, i kau sarung makakasingkạ u kai Iạ e MAWU. Bọu těking ini iạ sarung měmahesẹ̌ bowong akẹ u sal᷊ụ, kụ akene mẹ̌bal᷊ui makoạ daha.

¹⁸Manga kinạ sarung masue mate, ringangu sal᷊ụ ini sarung mawuhụ dal᷊urune, hakịu tau Misirẹ̌ e tawe makainung akene.’ ”

¹⁹MAWU e něhengetang si Musa, ”Oroiko i Harun pěngal᷊ạ těkingu kụ pěngongkeko kal᷊awọu sal᷊ụ, manga songe ringangu kal᷊awọu mal᷊ane su Misirẹ̌. Akene sarung makoạ daha ringangu su kasěllahu wanua sarung piạ daha, sarang lai su ral᷊ungu manga dulang bọu kalu ringangu manga wěnsadẹ̌ batu.”

²⁰I Musa rẹ̌duang Harun nẹ̌koạ apang nạung niorong MAWU, su těngon datu ringangu manga sawohị e, i Harun něhengkẹ těking kụ němahesẹ̌ akẹ u Sal᷊ụ u Nil, tangu akene něbal᷊ui nakoạ daha.

²¹Manga kinạ su ral᷊ungu sal᷊ụ ene něngkapate kụ dal᷊urune mawuhụ-buhụ, hakịu tau Misirẹ̌ e tawe makainung akẹ ene. Su kạguwạu ěntanang Misirẹ̌ e piạ daha.

²²Arawe apang tahatariang u Misirẹ̌ e mal᷊aing měmpẹ̌kẹ̌koạ kerene lai ringangu kasingkạ i sire marěndung e, hakịu ratu e měngkate těbe mẹ̌tẹ̌tungkětị u těmbọ e. Kerẹewe seng nipěhengetang u MAWU, datu e mạdiri rumaringihẹ̌ si Musa rěduang Harun.

²³Katewe pundangu i sie mapul᷊ẹ sol᷊ong istana tawe mapetọ u hal᷊ẹ̌ nariadi ene sarang kadidị.

²⁴Kěbị tau Misirẹ̌ e němangka lohang e kanandung biwihu sal᷊ụ baugu měmpẹ̌deạ akẹ inumang, batụu akẹ u sal᷊ụ ene tawe ikainung.

²⁵Pitu ěllo nal᷊iu samuring MAWU e něngane Sal᷊ụ u Nil.