Read Sangir SASĚBANG 8 Bible Online

SASĚBANG 8 - Sangir bible

SASĚBANG 8

¹Mase MAWU e něhengetang si Musa, ”Dakọe pẹ̌těngon datu kụ paul᷊ịko si sie tatanata-Ku ini: ’Pakawalako umatẹ̌-Ku e aparal᷊eng baugu pẹ̌kal᷊iomaneng si Siạ.

²Mạengu i kau e tawe měnarimạ, banua ini e sarung Takụ pakapenẹ u tumpepạ kere sěmbaụ papahang.

³Sal᷊ụ u Nil sarung mapenẹ u tumpepạ, hakịu manga binatang ene e mahunsěbang bọu akẹ mase měmpahunsuẹ̌ su ral᷊ungu istananu, sarang dal᷊ungu kamaru pẹ̌tatikilang dingangu raral᷊okaěngu, sarang dal᷊ungu manga wal᷊eng mapapangkatẹ̌ dingangu kawanua, ore lai sarang dal᷊ungu tampạ u tatongkateng borotẹ̌ dingangu manga pantisẹ̌.

⁴Apang tumpepạ ene sarung měmpahul᷊insọ kụ mahuawị si kau, su kěbị mapapangkatẹ̌ dingangu kawanua.’ ”

⁵MAWU e něhengetang si Musa, ”Oroiko i Harun apěngogoru těkinge su manga sal᷊ụ, manga songe ringangu manga mal᷊ane tadeạu tumpepạ mahunsěpụ měmenẹ ěntanang Misirẹ̌ e.”

⁶Tangú i Harun něhengkẹ u těkinge su wowong kěbị akẹ, mase manga tumpěpạ němenẹ patikụ banua.

⁷Arawe manga tahatariang němpẹ̌pakẹ u kasingkạ i sire marěndung kụ mal᷊aing mapasěbangu tumpepạ su wanua ene.

⁸Datu e nẹ̌kui si Musa rẹ̌duang Harun, dingangu nẹ̌bera, ”Pẹ̌kal᷊iomanengko su MAWU, tadeạu i Sie mapakapuạ u kal᷊awọu tumpepạ ini tangu iạ sarung mapakawalang bansanu aparal᷊eng baugu měnarakangu sasěmba su MAWU.”

⁹I Musa simimbang, ”Dingangu naung mal᷊uasẹ̌ iạ sarung mẹ̌kal᷊iomaneng baugʼi Tuangku. Apakatantuko tempone, tangu iạ sarung mẹ̌kal᷊iomaneng i Tuangku, manga mapapangkatẹ̌, dingangu kawanua. Tangu i Tuangku sarung ipakal᷊iu wọu manga tumpepạ ene, kụ tawẹ u sarung mal᷊ěmbe, tabeạu katewe su Sal᷊ụ u Nil.”

¹⁰Sasimbangu ratu ene, ”Pẹ̌kal᷊iomanengko waugu riěllo.” Angkuěng i Musa, ”Iạ sarung mẹ̌koạ apang dẹ̌dorongang i Tuangku. Tangu i Tuangku sarung masingkạ u tawẹ apa Ruata wal᷊ine kere Mawu, Ruatang kami.

¹¹I Sie sarung měliwirʼi Tuangku, manga mapapangkatẹ̌, dingangu kawanua patikụ bọu manga tumpepạ ene. Sarung tawẹ apa tumpepạ su manga wal᷊e, tabeạu katewe su Sal᷊ụ u Nil.”

¹²Bọu e i Musa rẹ̌duang Harun naněntangu ratu. Mase i Musa nẹ̌kal᷊iomaneng su MAWU tadeạu apạkapuạ u manga tumpepạ kụ nipakarěntanʼE waugu ratu.

¹³MAWU rimaringihẹ̌ dorong i Musa, kụ kal᷊awọu tumpepạ apang su manga wal᷊e, rělahẹ̌, dingangu su manga ansedẹ̌ e nasue nate.

¹⁴Tau Misirẹ̌ e něnampungke manga maietʼu manga tumpepạ ene sarang nẹ̌bumbung u kal᷊awọe, hakịu kasěllahu wanua e apạ e mawuhụ dal᷊urune.

¹⁵Ene ratu nakasilọ e kal᷊awọu tumpepạ seng nate, i sie saụewe nẹ̌tungkětịu těmbọ e. Kụ kerẹewe sembeng nipěhengetangu MAWU, datu e madiri mẹ̌pandung bawerang Musa rẹ̌duang Harun.

¹⁶MAWU e něhengetang si Musa, ”Oroiko i Harun apěmahesẹ̌ ěntana ringangu těkinge, tangú su kạguwạu wanuang Misirẹ̌ e awul᷊ẹ̌ sarung mẹ̌bal᷊ui makoạ těnị.”

¹⁷Bọu e i Harun němahesẹ̌ ěntana ringangu těkinge, kụ kal᷊awọu awulẹ̌ su Misirẹ̌ e nẹ̌bal᷊ui nakoạ těnị nẹ̌dahěmbung němpẹ̌dulu taumata ringangu binatang.

¹⁸Manga tahatariang e měmpẹ̌tẹ̌tawakal᷊i mẹ̌pakẹu kasingkạ i sire marěndung tadeạu mapakarěntan těnị, kaiso i sire tawe nakakoạ. Suapan tampạ panenẹ piạ těnị,

¹⁹ hakịu apan tahatariang ene nẹ̌bera su ratu, ”Ini e kal᷊iandagu Ruata.” Kaiso ratu e sahuneng nẹ̌tungkětị, dingangu kerẹewe seng nipěhengetang u MAWU, datu ene tawe mapulu mẹ̌pandung bawerang Musa rẹ̌duang Harun.

²⁰MAWU e něhengetang si Musa, ”Diěllo reng mal᷊uka-l᷊ukadẹ̌ dakọko pẹ̌sombang u ratu su tempong i sie rumẹ̌sung sol᷊ong sal᷊ụ, kụ paul᷊ịko si sie wawera-Ku ini: ’Apakawalako umatẹ̌-Ku e tamai mẹ̌kal᷊iomaneng si Siạ.

²¹Kereu i kau tawe měnarimạ tangu Iạ sarung mapakarěntan lango si kamene, su manga mapapangkatẹ̌ dingangu kawanua. Patikụ bal᷊en tau Misirẹ̌, sarang lai patikụ banua e sarung mapenẹ u lango.

²²Arawe Iạ e lumihi wue waugu wanuang Gosyen, tampạ katatanakengu umatẹ̌-Ku. Paị sene sarungbe tạ apa lango, tadeạu i kamene masingkạ u Iạ kai MAWU kụ nẹ̌koạ ene.

²³Iạ e sarung mẹ̌koạ pẹ̌darol᷊e[8] sutal᷊oarang umatẹ̌-Ku ringangu kawanuanu. Karal᷊inaụ ene sarung mariadi rịěllo.’ ”

²⁴MAWU e sarung maparěntan lango mal᷊awọ-lawọ sol᷊ong istanan datu ringangu sarang bal᷊eng manga mapapangkatẹ̌. Kasěllahu wanuang Misirẹ̌ e apạ e nasigěsạ ual᷊ingu manga lango e.

²⁵Bọu e ratu nẹ̌kui si Musa rěduang Harun kụ nẹ̌bera, ”Dakọ e pěngonggọ u sasěmba su Ruatanu, katewe pianẹ e su wanua ini samatang.”

²⁶”Mapiawe walạ e,” angkuěng i Musa, ”ual᷊ingu tau Misirẹ̌ e sarung numěnggạ kereu makasilo sasěmbang kami ene ringangu nal᷊ahẹ u i kami sarung bahungangu watu sarangkewe mate.

²⁷I kami harusẹ̌ tamai sol᷊ong kěhu l᷊inggi karaung dal᷊engang gěnnangu těllu ěllo karěngụ e waugu měnarakangu sasěmba su Mawu Ruatang kami, kerẹewe nioronʼE si kami.”

²⁸Datu e nẹ̌bera, ”Kerenẹ e takụ pakawala i kamene tamai sol᷊ong banua l᷊inggi waugu měnarakangu sasěmba su MAWU, Ruatang kamene, asal᷊u i kamene tawe rumal᷊eng marau. Pẹ̌tahěndung, kal᷊iomanenge wue iạ!”

²⁹Sasimbang i Musa, ”Samuring iạ tamai iạ apidu lighạ mẹ̌kal᷊iomaneng su MAWU, tadeạu rịěllo manga l᷊ango ene maněntang i Tuangku, manga mapapangkatẹ̌ dingangu kawanua. Kaiso kumbahangbe relaing měngakal᷊ẹ̌ si kami, ringangu kumbahangbe měnahaghe tau Israel mahundal᷊eng tamai měnarakangu sasěmba su MAWU.”

³⁰I Musa maněntang u ratu, bọu e mẹ̌kal᷊iomaneng su MAWU,

³¹kụ MAWU e rumaringihẹ̌ kakal᷊iomaneng i Musa. Manga l᷊ango ene nahuntěllạ naněntangu ratu, mapapangkatẹ̌ dingangu kawanua. Kụ tawẹ u sarang sěmbaụ delaing nal᷊ěmbe.

³²Arawe orasẹ̌ ini e ratu e mal᷊aing bědang mẹ̌tẹ̌tungkětị u těmbọ e kụ tawe mapakawalang bansa ene rumal᷊eng.