Read Sangir SASĚBANG 9 Bible Online

SASĚBANG 9 - Sangir bible

SASĚBANG 9

¹MAWU e něhengetang si Musa, ”Dakọ e pẹ̌těngon datu, kụ pẹ̌berako si sie watụ u MAWU, Ruatan tau Ibrani e nẹ̌bera: ’Balạete umatẹ̌-Ku aparal᷊eng tadeạu i sire makapẹ̌kal᷊iomaneng si Siạ.

²Kereu i kau tawe mapulu měměllọ i sire,

³Iạ e sarung mapakarěntang sahindạ masaria su patikụ binatang pẹ̌piaraěng i kamene, kawal᷊o, kalide, onta, sapi, domba ringangu kambing.

⁴Iạ e sarung mapẹ̌dal᷊ahaeng binatang pẹ̌piaraěng u tau Israel dingangu binatang pẹ̌piaraěng u tau Misirẹ̌. Bọu binatang u tau Israel tawẹ u sarang sěmbaụ kụ deng mate.

⁵Iạ e kai MAWU, měnilakehu ěllo rịěllo waugu mẹ̌koạ hal᷊ẹ̌ ene.’ ”

⁶Sěngkarịěllone MAWU e nẹ̌koạ kerẹewe seng piněhengetangʼE. Kal᷊awọu binatangu tau Misirẹ̌ e nate, arawe wọu binatang u tau Israelẹ̌ e tawẹu sarang sěmbaụ kụ deng nate.

⁷Datu e nakiwal᷊o měnsang kai apa seng nariadi, bọu e niwěke si sie u wọu binatang u tau Israelẹ̌ e tawe kạdiongeng sěmbaụ kụ nate. Arawe ratu e nẹ̌tungkětị u těmbọ kụ tawe mapulu měměllọu wansa ene aparal᷊eng.

⁸MAWU e nẹ̌bera si Musa ringangu si Harun, ”Pěngal᷊ạko awulẹ̌ pira hěngkung bọu tampạ u pẹ̌tatongkateng. Su těngon datu, i Musa harusẹ̌ měngaesu awulẹ̌ ene sol᷊ong binangaeng.

⁹Tangu awul᷊ẹ̌ ene sarung makeke sol᷊ong kạguwạu wanuang Misirẹ̌. Su taumata ringangu binatang awul᷊ẹ̌ ene sarung makariadi wisul᷊ẹ̌ kụ mạběse makoạ hempang piạ nanane.”

¹⁰ Mase i Musa ringangʼi Harun něngal᷊ạ e awul᷊ẹ̌ kụ nẹsombangken datu. I Musa e kai něnal᷊iawuhu awul᷊ẹ̌ su winangaeng. Su taumata ringangu su binatang kụ nakariadi wisul᷊ẹ̌ kụ mạběse makoạ hempang piạ nanane.

¹¹Apan tahatariang tawe makapẹ̌těngong Musa batụu kasěllahu wadang i sire napenẹ u wisul᷊ẹ̌ kere tau Misirẹ̌ bal᷊ine.

¹²Arawe MAWU e makạkariadin datu e mẹ̌tẹ̌tungkětịu těmbọ e, kụ kerẹewe lai seng nipěhengetangu MAWU, datu e madiri mẹ̌pandung bawerang Musa rẹ̌duang Harun.

¹³MAWU e něhengetang si Musa, ”Diěllo reng mal᷊uka-l᷊ukadẹ̌ e tamaiko pẹ̌těngon datu, kụ pěhabarẹ̌ko si sie, u MAWU, Ruatan tau Ibrani něhengetang: ’Apakawalako umatẹ̌-Ku tadeạu i sire reng makatamai mẹ̌kal᷊iomaneng si Siạ.

¹⁴Sěnsul᷊e ini Iạ sarung maparěntang hombang bal᷊inewe tumbạ u su manga mapapangkatẹ̌ dingangu kawanua samatang, kaiso lai si kamene, tadeạu i kau e masingkạ u tawẹ u makaal᷊ung si Siạ su kasěllahu dunia.

¹⁵Mangawe Iạ mapulu měhukung i kau ringangu kawanuanu ringangu sahindạ, nal᷊ahẹu i kamene seng nawihua marasai.

¹⁶ Kaiso i kamene Takụ pakawala wiahẹ̌, tadeạu Iạ makapělahẹ u kawasa-Ku si kamene, hakịu areng-Ku e tumeleng su kaguwạu dunia.

¹⁷Maningbe kerene, kai i kau mang bědang naungu marange dingangu mạdiri mapakawalang umatẹ̌-Ku aparal᷊eng.

¹⁸Diěllo mal᷊ukadẹ̌, su tempo kere ini, Iạ sarung maparěntang tahiti watu mal᷊awọ-l᷊awọ, mẹ̌sul᷊ungu wědang tawẹ nạdiadi su Misirẹ̌ deng dokeng-dokeng sarang orasẹ̌ ini.

¹⁹Tangu oroiko tadeạu kěbị binatang dingangu kal᷊awọu tataghuanengu kụ ene su l᷊ikude pakịpěllọko su tampạ mal᷊ěmpị. Kěbị taumata ringangu binatang kụ ene su likude kụ tawe makapẹ̌kěllung sarung mate kahinoěngu tahiti watu.’ ”

²⁰Pirang katau wọu tal᷊oarang mapapangkatẹ̌ mạtakụ u hengetangu MAWU. I sire němaringang manga ěllang dingangu manga binatang i sire niapasuẹ̌ sol᷊ong dal᷊ungu wal᷊e tadeạu i sire mal᷊indung.

²¹Arawe wal᷊ine e tawe nẹ̌diang pal᷊aul᷊ị ene kụ dingangu naněntangu manga ěllang ene ringangkeweng manga binatang i sire su wimbaenge.

²²Bọu e MAWU něhengetang si Musa, ”Hengkẹko l᷊imanu pakarangẹ, kụ tahiti watu e sarung mahondosẹ̌ su kaguwạu wanuang Misirẹ̌. Tahiti ene sarung mihino su taumata, binatang dingangu patikụ sasuang su rahami.”

²³I Musa němětẹen těkinge taraị, kụ MAWU e naparěntạen děllụ dingangu tahiti watu, kụ kilạ e něnahedẹ̌ banua. MAWU e naparasehen,

²⁴ tahiti watu marehe nitol᷊eěngu kilạ mẹ̌dẹ̌darạ e. Kụ seng ene e tahiti watu kasariaěnge su kanandung pẹ̌bawiahu tau Misirẹ̌ e.

²⁵Su kaguwạu wanua ene tahiti watu e napakagholọ u patikụ sạbarang su kěhu, nasowa l᷊ai taumata ringangu manga binatang. Kal᷊awọu sasuang su kěhu dingangu manga kakaluang pinakahaka.

²⁶Kětạembeng su Gosyen, tampạ katatanakengu tau Israel tawe nikahinoěngu tahiti watu.

²⁷Bọu e ratu nẹ̌kui si Musa rẹ̌duang Harun kụ nẹ̌bera, ”Iạ e seng nẹ̌dosa. Seng MAWU e nihino, iạ dingangu kawanuaku e seng nẹ̌sal᷊a.

²⁸Pẹ̌kal᷊iomanengko su MAWU; i kami e měngkawe apạ e nasigěsạ kahian děllụ dingangu tahiti watu ini. Iạ e sarung mapakawalang kamene pasěbang. Kụ i kamene semben tawe wotonge relaing mẹ̌tanạ sini.”

²⁹Angkuěng i Musa su ratu, ”Tawẹ kararěngụ e sarang iạ nahumpạeng likudu soa, iạ sarung měhengkẹ lima kụ mẹ̌kal᷊iomaneng su MAWU. Děllụ e sarung měngědo ringangu tahiti watu e sarung mapurạ, tadeạu i Tuangku e masingkạ u wanua ini e kai tataghuanengu MAWU.

³⁰Arawe iạ masingkạ u i Tuangku ringangu manga mapapangkatẹ̌ e bědangbe lai tawe nạtakụ u MAWU Ruata.”

³¹Sasuang rami ringangu wakị e nasue nagholọ, batụu rami e kạpẹ̌bẹ̌burạ e, ringangu watune kạpělẹ̌hětị e.

³²Arawe gandung dingangu manga sasuang batune tawe nagholọ batụu wědangbe wal᷊ine musunge.

³³Bọu e i Musa naněntangu ratu kụ siměbang sol᷊ong likudu soa. Kụ sene i sie něhengkẹ l᷊imane mědeạu mẹ̌kal᷊iomaneng su MAWU. Su tempo ene lai něngědo e rěllụ, tahiti watu ringangu tahiti.

³⁴Su tempo e ratu nakasilo apa nariadi, i sie saụewe nẹ̌dosa kapia. I sie ringangu manga mapapangkatẹ̌ e měngkate těbe mẹ̌tẹ̌tungkětị u těmbọ i sire.

³⁵Kerẹewe seng nipěhengetangu MAWU si Musa, datu e tawe mapakawalan tau Israel pasěbang.