Read Sangir AYUB 1 Bible Online

AYUB 1 - Sangir bible

AYUB 1

¹Su ěntanang Us[1] sěngkianụ e nẹ̌tanạ sěngkatau esẹ arenge i Ayub. I sie maněmba Ruata ringangu satia si Sie. I sie taumata wudine mapia ringangu tawe nẹ̌kẹ̌koạ kararal᷊akisẹ̌ sarang kadodọ-dodọ.

²I sie piạ anạ e esẹ pitung katau, ringangu wawine těllung katau.

³Su l᷊iung ene i sie piạ ěllange mal᷊awọ, domba pitu hiwu su waụ e, onta těllu hiwu su waụ e, sapi sěhiwu su waụ e, ringangu kalide lima hasụ su waụ e. Nimbụ e, i sie ute kai taumata kakalakenge su tal᷊oarang pamanuane su sěmběkan Daki.

⁴I sire pitu manga anạ i Ayub piạ tundune mẹ̌kẹ̌koạ sal᷊iwang su wal᷊en sire sěmbaụ-sěmbaụ mẹ̌bẹ̌bawihing. Su sal᷊iwang ene tangú i sire manga anạ i Ayub bawine e mal᷊aing ninotẹ̌, kụ i sire kěbị e kumaěng dingangu manginung sěngkakaiang.

⁵Apạeweng sal᷊iwang mal᷊iu e, i Ayub měngkate hanesẹ̌ mẹ̌bẹ̌bangung maral᷊ukadẹ̌ dingangu měmpẹ̌narakangu sasěmba waugu manga anạ e tadeạu i sire e ampungang bem MAWU. Batụu i Ayub mạngěnna u, botongewe mariadi manga anạ e seng nẹ̌dosa ringangu nẹ̌hinakang Duata kụ nipẹ̌tatudẹ.

⁶ Piạ su sahěllo manga riadikang masorga[2] e nẹ̌těngom MAWU, kụ i Měnanal᷊ukạ[3] e ene lai su tal᷊oaran sire.

⁷MAWU e nakiwal᷊o si sie, ”Kai wọu a i kau e?” Sasimbang i Měnanal᷊ukạ, ”Ěllange buhụewe mẹ̌pẹ̌palilị tamai ramahi ringangu měmẹ̌měpidẹ̌ kasěllahu dunia.”

⁸Bọu e MAWU nakiwal᷊o, ”Apa i kau e seng nakatitị su ěllang-Ku e i Ayub? Su kasěllahu dunia tawẹ apa taumata kereng kasatiane ringangu kapiane naunge kere i sie. I sie mạněmba si Siạ dingangu mamben těngadẹ̌ tawe mẹ̌kakoạ karal᷊akisẹ̌ e.”

⁹ Arawe i Měnanal᷊ukạ e simimbang, ”Semben tantu i Ayub mạněmba si Kau batụu i sie mẹ̌narimạ bawal᷊ise.

¹⁰I sie ringangu patikụ darotonge sěntiniạ lẹ̌ěllungangu. Hal᷊ẹ̌ e lẹ̌al᷊amatengu ringangu i sie gẹ̌gěllirangu binatang mal᷊awọ botonge mẹ̌tiudẹ̌ su kasěllahu wanua.

¹¹Arawe andene kal᷊awọu kakakalạ e ene al᷊akengu, ute nal᷊ahẹu i sie kai apidu měngane si Kau!”

¹²Tangú angkuěng u MAWU si Měnanal᷊ukạ, ”Kerenẹ e, koạ e walạewe měnsang apa wọu kakakalạ i Ayub, asal᷊u kumbahang i kau manědụ si sie!” Tangú němehọ e i Měnanal᷊ukạ bọu těngom MAWU.

¹³Tawe nararěnnạ wọu ene manga anạ i Ayub němpẹ̌sal᷊iwang su wal᷊eng tuhang i sire kaiakanenge.

¹⁴Sěngkělěndịu sěngkatau rarolohang e riměnta kạtal᷊ange sol᷊ong bal᷊eng Ayub dingangu nělaporu, ”Tuang! Tau Syeba[4] seng diměnta něngalo si kami piạ e manga sapi kapẹ̌ngẹ̌ngal᷊ine rahami e ringangu manga kalide kapẹ̌gěnggambul᷊e rěmpugẹ̌ su rẹ̌duhe. I sire seng něhampasẹ̌ manga binatang ene, ringangu němate manga ěllang i Tuang kụ ene sene. Kětạeng ěllang samatang mal᷊iwirẹ̌ e hakịu makakarěnta mělaporẹ̌ si Tuang.”

¹⁶Piạ i sie wědang měbẹ̌bisara, riměntạ e ěllang karuane ringangu nẹ̌bera, ”Manga domban Tuang dingangu manga mělal᷊ukadẹ̌ e seng nisahedu rěllụ hakịu něngkawihua kěbị. Sěmatang ěllang sẹ̌sane nal᷊iwirẹ̌ e hakịu nakapělaporẹ̌ si Tuang.”

¹⁷I sie ren tawe nạsuem berane, piạ e ěllang katěllune riměnta něhabarẹ̌ u, ”Těllum buntuangu mělahampasẹ̌ bọu Kasdim[5] seng něhampasẹ̌ manga ontan Tuang dingangu němate manga ěllang i Tuang. Kětạeng ěllang samatang nal᷊iwirẹ̌ hakịu nakapělaporẹ̌ si Tuang.”

¹⁸Piạ i sie wědang mẹ̌bẹ̌bisara, riměntạe ěllang bal᷊ine kụ nẹ̌bawa habarẹ̌, ”Manga anạ i Tuang e kai kapẹ̌sẹ̌sal᷊iwange su wal᷊eng anạ i Tuang kaiakanenge.

¹⁹Sěngkělěndịu anging maihạ e timiụ bọu sěmběkang banua l᷊inggi ringangu něngěma wal᷊e ene hakịu nahaka ringangu nakawihua kěbị anạ i Tuang. Kětạembeng iạ e nal᷊iwirẹ̌ hakịu nakapělaporẹ̌ si Tuang.”

²⁰Mase rimarisị e i Ayub kụ něnggehẹ pakeange tatialang naunge masusa. I sie nělungguhẹ̌ těmbọe mase nẹ̌tumpěkuhẹ̌

²¹dingangu nẹ̌bera, ”Iạ e niwantelẹ̌ tawẹ manga apa, kụ mairị mal᷊aing tawẹ manga apa l᷊ai. MAWU e něngonggọ, MAWU l᷊ai něngal᷊ạ. Karaloko arengʼE!”

²²Kụ manilaing i Ayub nihombangengu kal᷊awọu silakạ ene, kai i sie tawe nẹ̌koạ dosa ringangu tawe napẹ̌sal᷊ang Mawu Ruata.