Read Sangir AYUB 10 Bible Online

AYUB 10 - Sangir bible

AYUB 10

¹Iạ e nasahe ringangu tahamutang pẹ̌bawiahẹ̌ku e, tangú takụ bosoěng kal᷊awọu paị u himukudẹ̌ku.

²O Ruata, kumbahangbe měngěnsilu sal᷊a si siạ; tualageko unụe i Kau rumokạ si siạ.

³Apa untune si Kau mělinda kirini, ringangu měnděmmẹu ual᷊ing liaghang gatinu hala? Apa untune kereu i Kau e mẹ̌sěngkanaung su karaki, ringangu hingidu apang iral᷊akisẹ̌ e?

⁴Silong mata-Nu e nẹ̌tatěntangu silong matan taumata,

⁵ringangu umburʼU e wal᷊inewe kere kanibụ u umbure.

⁶Mạeng kerene unụ e nisẹ̌suiangu kal᷊awọu rosaku tangu? Unụe sẹ̌sahusuangu kal᷊awọu sal᷊aku?

⁷Tumuhụ dal᷊enge i Kau e masingkạ dingangu makaěnna, u iạ e tawe nẹ̌sal᷊a, kaiso kahěngang. I Kau masingkạ u sarang sěngkatau tawe makatohạ měngambang siạ bọu l᷊ima-Nu.

⁸Iạ ini e nikoạ u l᷊ima-Nu, unụ e wue orasẹ̌ ini[21] e kawe winasaěngu e iạ?

⁹Tahěndungeko u kawe wọu ěntana masipul᷊ụ e[22] i Kau takụ kinoạ! Hal᷊ẹ̌be kereapa kawe nikoạ u kere awu kapia iạ e?

¹⁰Kawe pinakawala i amangku e něndiadi si siạ dingangu nipakasariane iạ e su ral᷊ungu pal᷊ahuanakeng i ninangku.

¹¹Badangku e kinoạ u ringangu ruhine ringangu ihạ e; ruhiku e nighěllirangu ghẹ̌sine ringangu pisine piněměkisẹ̌.

¹²Niapẹ̌biahu iạ e; i Kau e kụkěndagu iạ, niawaku e lẹ̌lukadengu ringangu papadul᷊i-Nu.

¹³Arawe ini e iạ masingkạ u karěngụ u ene, dingangu marěmasẹ̌ e kai seng nihingidu kasasilakạku.

¹⁴Tẹ̌titikangu iạ e kamagengu mẹ̌koạ pẹ̌sasal᷊a mědeạu ikasuhudu mẹ̌gěllịu kal᷊aampung.

¹⁵Kereu iạ e nẹ̌dosa, pẹ̌bawiahẹ̌ku e enẹ e nasilaka! Kai kereu kakanoạku e tawẹ turạ e, kai mang těbe iạ ikẹ̌koạ kere nẹ̌baradosa! Tawe wahani iạ e měhengkẹ u těmbọku, batụu makạpěndang masusa ringangu nahina.[23]

¹⁶Mạengu makaual᷊i e, manimbe tawe tumanịe, i Kau e měnẹ̌nahusu si siạ kere singa. Ringangu nilahẹ kapia kawasa-Nu, kětạembeng baugu měmatakụ si siạ.

¹⁷Měngkate hanesẹ̌ isẹ̌saudu sahidi ipěndokạ si siạ; dingangu mangkeng kakạsariane ral᷊angehu e si siạ. Mang niapasěbangu kal᷊awọu wuntuangu wuhu e ipěngalo ringangu ipěnekẹ si siạ.

¹⁸Unụe niwalanu iạ nawantelẹ̌ su dunia? Mapiawe lai iạ mate, kal᷊amonang iạ makasilo taumata!

¹⁹Tangú tabidạu iạ tawẹ běke niwantelẹ̌, u pal᷊ahuanakeng apidu nilěbing.

²⁰Ah, tạ kararěngụ e lai iạ sarung mate, tangu balạekere iạ sẹ̌saku, tadeạu iạ makateěng bue tempoku l᷊ěmbene ini e.

²¹Tạ kararěnnane lai iạ e rumal᷊eng kụ semben tawe mẹ̌sul᷊e, měndol᷊ong banua marěndung dingangu malělu-lělubẹ̌,

²²banua e marěndung maělị, napenẹ u kěngkau ringangu silontahẹ̌, kụ suapan tualagẹ̌ e mẹ̌sul᷊ung dingangu kararěndung.”