Read Sangir AYUB 11 Bible Online

AYUB 11 - Sangir bible

AYUB 11

¹Bọu ene, i Zofar nẹ̌bera, ”Bal᷊inewe wisara tạ gěsine ene nighěllirangu sasimbahe? Botonge taumata kụ l᷊awọ mohonge ene tawe ipẹ̌sal᷊a tangu?

³Ayub, katihokangu i kami e tawe makasimbahẹ̌ tangu? Su naungu i kami e tawẹ kěndị e ual᷊ingu pẹ̌bawaheaunu?

⁴Katihọ u kal᷊awọu waweranu e tawẹ sal᷊ane; su naungu i kau e wurẹ̌si su těngom Mawu.

⁵Kaiso, mal᷊owọko Mawu Ruata e hala mẹ̌bisara!

⁶Dingangu mal᷊owọko i kau e paul᷊ikange, u kapelesa e kai lawọ akal᷊e mapia, kụ tawe kaěnnaěngu taumata. Tangú nakahěngangke i kau e watụ u sigěsạu e tawe sěngapa, iwanding su hukumang kụ hinong ikatarimạ u e.

⁷Mariadi kereapa kụ kakakoạ u Ruata e ikasẹ̌suinu? Mariadi kereapa kawasa-Ne e kawe kahěnganengu?

⁸Kawasa-Ne e kai limembong karangẹ e wọu winangaeng; tawe makaringkau i kau e ringangu tawe makaěbạ ene. Kawasa-Ne limembong karal᷊unge wọu wanuan taumata nate, mamben tawe kaěnnaěngu marihutu.

⁹Kawasan Duata e limembong kal᷊oahe wọu sarul᷊uang, ringangu limembong kawěhạ e wọu laudẹ̌ mal᷊oang.

¹⁰Kereu i Sie měnamẹ dingangu měnuẹ̌ i kau sol᷊ong pěnggaghutaěngʼE tangú i sai wahani makapetọ kakanoạʼE?

¹¹Duata e makakiral᷊ạ taumata kụ mapulu mẹ̌konti; karal᷊akisẹ̌ i sire e tawe mal᷊iu wọu matanʼE.

¹²Kereu iněngeng kalide maghaěnge měhanạ u kalide maharo e, wuhụewe taumata wodo e matahuěnna.

¹³Ayub, burẹ̌siko naungu e, pẹ̌sasěsilẹ̌ko! Pẹ̌kal᷊iomanengko su Mawu Ruata!

¹⁴Punasẹ̌ko rosa wọu naungu e dingangu pakarauko karal᷊akisẹ̌ e wọu wal᷊enu!

¹⁵Tangú i kau e wotonge tumatěngo pẹ̌bawiahu e ringangu makěhagẹ̌ ore lai matoghasẹ̌; i kau e sarung dumarisị matoghasẹ̌ dingangu ta wahal᷊uasu rěnděnganeng,

¹⁶ore lai wěhạ u e tawe katahěndungangu; tabidạu lěba naohọ, pinakawul᷊en taumata.

¹⁷Pẹ̌bawiahu e sarung limembong katualage wọu ěllo, ringangu tempong kararěndung su ral᷊ungu pẹ̌bawiahu e katilange kere sěnnangu matangěllo mal᷊ukadẹ̌.

¹⁸I kau e sarung matoghasẹ̌ dingangu napenẹ u pělaharapẹ̌; Duata e sarung maněntanudẹ̌ si kau hakịu i kau e sen tawe mẹ̌kapura.

¹⁹I kau sarung tawe matakụ u rokạ; lawọ taumata sarung mẹ̌dorong tul᷊ung si kau.

²⁰Arawe taumata ral᷊akisẹ̌ e sarung kal᷊inso měmanda, batụu si sire e tawẹ apa tul᷊umang. Harapang i sire humotong-motong ute tadeạu papaten sire lighạ marěnta.”