Read Sangir AYUB 12 Bible Online

AYUB 12 - Sangir bible

AYUB 12

¹I Ayub simimbahẹ̌, ”Kahěngang, i kamene ini e kawe něngal᷊uang kal᷊awọu umatẹ̌ e. Kereu i kamene mate, kapelesa e mal᷊aing sarung mate.

³Iạ e mal᷊aing taumata matahuěnna kěbị e apan niwerang kamene e sen takụ kinaěnnaěng. Bọu e i sai wue wěgang kěbị tamai ene? Kụ abe pěngěnnau i kamene kawe limembo wọu iạ!

⁴Iạ e lẹ̌lěgeěng u hapị dingangu manga ringang, sumbal᷊iau iạ ini e matul᷊idẹ̌ bue tawẹ turạ e. Nạung kal᷊imona e Mawu Ruata e sụsimbahẹ̌ kakal᷊iomanengku, kereu iạ kụkakindoạ u mẹ̌dorong tul᷊umang.

⁵I kamene e měnẹ̌nahumea taumata masilakạ, arawe pẹ̌bawiahu e tawẹ konsange apa; taumata maraning manawo e wẹ̌baheng i kamene.

⁶Arawe pẹ̌bawiahu tahapěhampasẹ̌ e tawe ikatakụ; taumata wahani lumawang Duata e biahe tạ konsange apa. Sumbal᷊iau mahan duata pạngumbalaěng i sire e, tumbạengbeng katoghasu watangeng hala e.

⁷Pakiwal᷊ọ e su manụ u kinoaěng dingangu binatang bal᷊ine, tangu i kamene e sarungbe ghělirangu těntiro kahian sire.

⁸Pẹ̌gausẹ̌ko tatualage su riadikang su dunia dingangu su l᷊audẹ̌ mal᷊oang, tangu i kamene sarung makatarimạ u tatualagẹ̌.

⁹I sai wue wọu tal᷊oarang kěbị e tawe makapěndang, u měndariadi si sire ute kai Ruata sẹ̌sane?

¹⁰I Sie něngatorẹ̌ pẹ̌bawiahu kal᷊awọu riadikang apang ene; kụ i Sie kawasa su niawang kal᷊awọu taumata.

¹¹Kerẹewe lilaku e puluang mẹ̌temang biahẹ̌ masědapẹ̌ e, kerene lai tul᷊iku e puluang dumaringihẹ̌ bawera.

¹²Uade pelesa e kai tẹ̌taghuaneng u taumata umbure mararangẹ, arawe pelesa e ringangu katoghasẹ̌ e ute kai kětạeng tẹ̌taghuaneng u Mawu Ruata samatang. Uade katatahuěnna e kai kaěbakeng su taumata mal᷊aumburẹ̌, kaiso katatahuěnna e ringangu kawasa e kai kaěbakeng su Ruata samatang!

¹⁴Apan sen nighohahe sen tawe saụ ikawangung kapia, i sain seng kinataweng sen tawe saụ masul᷊e kapia.

¹⁵I Sie něhěping akẹ, hakịu namara ringangu nasue něngkahěgu; i Sie něnawụ simbul᷊ẹ̌ e, tangú lěba e rimal᷊engke!

¹⁶Duata e kai matoghasẹ̌, matahang dingangu matul᷊ende! I tahapěngakal᷊ẹ̌ e dingangu apang kẹ̌kaakal᷊enge kai su al᷊ungu kawasa-Ne.

¹⁷Nisawụ e pelesang manga měngangawasang kararatuangu dunia e, ringangu manga těmbonange nikoaʼE pal᷊ahul᷊ěgeěng.

¹⁸NiapakawatangʼE ratu ringangu nitawengʼE i sire;

¹⁹nipakasanạ e manga imang dingangu apang těmbonange.

²⁰Nipẹ̌kěmminge apang tahawisaraěng, nisawụ e kapelesang taumata maghaghurange.

²¹Nitahumea-Ne taumata apang su horone; nial᷊ạʼE kararehọ u kawasan sire e.

²²Niapakatualage kal᷊awọu tampạ apang marěndung; niapasěnnange apang kěngkau mitung pal᷊usẹ̌ e.

²³Kal᷊awọu wansa e niapakatendangʼE ringangu niapakasombọ e, wọu e nipakawinasanʼE sarang naghagholọ.

²⁴Apan těmbonange nipẹ̌bingọ e hakịu i sire mẹ̌pẹ̌papalilị tawẹ timonane.

²⁵I sire mẹ̌sẹ̌sasaghipo su ral᷊ungu kararěndung, kụ měngkate apa sụsadongkong kere tau niwukangu inumang.