Read Sangir AYUB 14 Bible Online

AYUB 14 - Sangir bible

AYUB 14

¹Dongkeng bọu piněhanạ taumata e lome, tawe makakoạ apa; pẹ̌bawiahe manimbụ napenẹ u kasasigěsạ.

²I sie piạ tempone ringangu mạlolang kere bungang; mapuạ kere kěngkau, apidu matạdise.

³O Ruata, unụe i Kau e mang mapulu měmanda si siạ, dingangu měnoghelu iạ su pěngadilangʼU e!

⁴Makakoạ tau marosa e makakarěntang hal᷊ẹ̌ masukụ tangú?

⁵Kal᷊awọu umburu taumata e seng nitilakehu; kal᷊awọu wul᷊ange seng nitantu. Selaing nịpědal᷊ahaedu pẹ̌bawiahe; kụ tawe mariadi i sie lumampa ene.

⁶Balạekere i sie apěngirol᷊o, abe sahaghei i sie; tadeạu i sie makatemangbe pẹ̌bawiahe sarang masue munarane.

⁷Bědang piạ kapěharapeng baugu kalu sem bọu nituwang; i sie sarung humětị kapia, kụ bọu ene mělelang.

⁸Manilaing su ral᷊ungu ěntana hamụ e sarung mahenẹ, dingangu wanggile mate ual᷊ingu nahenẹ,

⁹kaiso kamagengu senggehangu akẹ, i sie tumuwo kapia, mẹ̌sul᷊ungu sasuang buhu, kụ manga hětị e suměpụ kapia.

¹⁰Kai kamagengu taumata mate, ute seng masue wěkene; i sie maněntangu dunia, mase sol᷊ong apa i sie?

¹¹Mẹ̌sul᷊ungu akẹ nẹ̌singangu wọu ral᷊ungu talagạ, mẹ̌sul᷊ungu sal᷊ụ nohọ sol᷊ong akene nal᷊ẹ̌sa,

¹²kerene lai taumata apan seng nate: i sie sen tawe saụ makapẹ̌pẹ̌tị kapia. I sie tawe mapuko karěngụu langị e wědang ene, selain tawe makapẹ̌bangung bọu katatikilange.

¹³Buniko iạ su ral᷊ungu wanuan tau nate; těntanureko iạ sarang i Kau e tawe lai mẹ̌pědu kapia. Kaiso pěnantuko tempo waugu mẹ̌tahěndung batangengku.

¹⁴U kamagengu taumata e mate, botonge i sie mẹ̌biahẹ̌ kapia? Ěllo mẹ̌gẹ̌gaghanti ěllo e iạ mạngampal᷊ẹ̌, sarang tempong sunsaraku ini e mapaghohẹ̌.

¹⁵Tangu i Kau e sarung mẹ̌kui siạ, dingangu iạ e sarung mẹ̌gěllịu sasimbange; i Kau e sarung lai tumal᷊ěntụ u iạ, diadikang niriadinʼU e.

¹⁶Mase sarung titikangu apan dal᷊empangku, kaiso sen tawe lai kẹ̌kakěllaěng dosaku e.

¹⁷Dosaku e sarung ampungang u ringangu suhudangu; sal᷊aku nạung kal᷊imona e sarung dẹ̌dasengʼU.

¹⁸Manga wul᷊ude sarung matěnehẹ̌ kụ mẹ̌sal᷊iawuhẹ̌, ringangu wul᷊udu watu e matoghasẹ̌ e maweho wọu tampạ e.

¹⁹Manga watu e sarung maghinggihẹ̌ kahiang akẹ e nělěba maihạ; ěntana e sarung ionode kahiang tahiti mal᷊awọ. Kerene ghaghoghahengʼU e pělěharapu taumata e.

²⁰Niapakawatạ u i sie sarang karěngụ e; nirolohu i sie niparal᷊eng dingangu niwal᷊uinu ghahị e.

²¹Manga anạ e nakoạ taumata mawantugẹ̌, kaiso i sie wěga wue. Dingangu kamagengu i sire makoạ mahina, tawẹu maul᷊ị si sie.

²²Kětạeng giadu wadange kapěndangeng e; kětạeng naunge masusa e mang kẹ̌kapěndangenge.”