Read Sangir AYUB 15 Bible Online

AYUB 15 - Sangir bible

AYUB 15

¹Tangú i Elifas e simimbang, ”Bisara tạ gěsine, Ayub, dudatonu e mamben tạ mangal᷊ene! Tawẹ apa taumata matahuěnna kụ sumimbang kere i kau ini e, i sie tawe sarung mẹ̌tahutěndạ u watangenge ringangu kal᷊awọu wawera tạ mangal᷊ene.

⁴Manga andene wisaranu ene tuhukang, ute tawẹ u sarang sěngkatau e matakụ arau mẹ̌kal᷊iomaneng su Mawu Ruata e lai.

⁵Kal᷊awọu waweranu e mělẹ̌lahẹu i kau e nẹ̌sal᷊a, arawe karal᷊akisu e nitakạ u ringangu kotarila.

⁶Tawahal᷊uasu i kau e takụ tokeěng dingangu ipẹ̌sal᷊a, watụ u ual᷊ingu kal᷊awọu manga waweranu hala e i kau nikalakẹ̌.

⁷Su naungu tangu, i kau e kai taumata nipěhanạ kakal᷊imonaěng e? Simongo tangu i kau e piạ manga wul᷊ude niriadi?

⁸Unụe i kau nakaringihẹ̌ Duata e nẹ̌koạ karakine tangú? Kai tumbạeng i kau mạnaghuang kapelesan taumata tangú?

⁹Kal᷊awọu apang kasingkạ u e, i kami e masingkạ l᷊ai, kal᷊awọu sabarang nikahěnganengu e, mal᷊ahẹ lai waugi kami.

¹⁰Kapelesa ini e kinatarimạ i kami wọu taumata piạ owange; i sire seng ene kal᷊amonang amangu e piněhanạ!

¹¹Unụe lahiboru Mawu Ruata e masạgang i kau e měnarimạ? I kami e mẹ̌bisarawe ringangu masabarẹ̌ dingangu masikome su arenge.

¹²Arawe i kau e kawe natakahẹ̌ kụ matanu e měngkawe riměllị;

¹³i kau e limangehẹ̌ su Mawu Ruata, ringangu rụl᷊ewang si Sie.

¹⁴ Mariadi ngae taumata kụ tawẹ apa sal᷊ane? Botonge i sie ipakatěngadẹ̌ su těngon Duata tangú?

¹⁵Saral᷊aing su malạekatẹ̌ e Mawu Ruata e mal᷊aing tawe mangimang; i sire wal᷊inewe susi su mata-Ne.

¹⁶Něngalembo kate taumata mahasa ringangu piạ turạ e, kụ seng něnehọ karal᷊akisẹ̌ e kere akẹ samatang.

¹⁷Dingangi Ayub, i kau e sarung takụ pěnualagengu apa,

¹⁸nạung nitěntiron taumata matahuěnna e si siạ. Těntiro ini e nitarimạ e wọu i upunge, ringangu nitěpasẹ̌ su kasasukụ sol᷊ong manga hitene.

¹⁹Su tempo ene tawẹ apa taumata raghị su wanuan sire; tawẹ apa kụ makapal᷊idẹ̌ si sire wọu anun Duata.

²⁰Taumata ral᷊akisẹ̌ kụ měnahida sěndinganenge, sarung makapěndang su kaghaghěngganeng kanandung pẹ̌bawiahe.

²¹Tingihẹ̌ mal᷊aihạ makasěmbeng tul᷊ine; su tempong mal᷊enehẹ̌ e mělahampasẹ̌ e ruměnta měhěgạ.

²²Tawẹ apa harapang si sie waugu mělisung kararěndung, u pedang tahapate měnẹ̌nahusu kanandung tempo suapang piạ loahe.

²³Manga manụ sahedẹ̌ e mạngampal᷊ẹ̌ tempong papatene, i sire mạngampal᷊ẹ̌ měnelohẹ̌ kinaěnge. Tangú nakahěngangke i sie u kawe seng mal᷊uẹ̌ ěllone ramahi.

²⁴Hombange kai tabidạu ratu mahasa, kụ seng sadia měhěgạ.

²⁵Seng kerene pal᷊edu taumata kụ dụdokạ Mawu, ringangu wahani lumawang Limembong Kawasa.

²⁶Dingangu kal᷊aobotẹ̌ i sie něngalo ringangu rimokạ Duata; nitědene kěllunge, kụ i sie tawe kạdiongeng sumohọ.

²⁸I sie něngindunụ natanạ suapan soa kụ seng nẹ̌kal᷊iaesẹ̌, su apam bal᷊e kụ tawẹ apa tumatanạ e. Manga soa ene seng nitantu waugu tatapẹ̌ makoạ l᷊ěnạu opehẹ̌.

²⁹Kakakalạu tau ene sarung mailang tawẹ ěnnạe; arětạ e sarung masue mapuạ.

³⁰I sie tawe mal᷊iu wọu kararěndung nělakubẹ̌; putung sarung měhěngisẹ̌ manga hětị e. I sie sarung mahěpa ual᷊ingu sasopạ u mohongu Mawu Ruata.

³¹Mạengu i sie mangimang si sain tawẹ kěhase apa, i sie sarung kaakal᷊eng, kụ tatendenge apang ikẹ̌katarimạ e, mal᷊aing tawẹ kěhase lai.

³²Těntal᷊ang tawẹ nạděnta tempone, i sie sarung mate,[25] kere lelangu kalu nahěgu kụ sen tawe saụ lai maelong.

³³I sie mẹ̌sul᷊ungu kalung anggorẹ̌ kụ natontong buane, mẹ̌sul᷊ungu kalung zaitun kụ nahondosẹ̌ burạ e.

³⁴Taumata ral᷊akisẹ̌ e sen tawe sarung měhite; tangú natutungke wal᷊e kụ nipětị e wọu ual᷊ing sasorokẹ̌.

³⁵Seng i sire kụ něhingidẹ̌ karal᷊akisẹ̌ e ringangu mẹ̌kakoạ e, tahuakal᷊ẹ̌ e sěntiniạ mang kạl᷊aunidẹ̌ su ral᷊ungu naunge.”