Read Sangir AYUB 16 Bible Online

AYUB 16 - Sangir bible

AYUB 16

¹Arawe i Ayub simimbang, ”Masau takụ ikẹ̌karingihẹ̌ ěbạ kere ini; lahiboru e samatang sasigěsạ.

³Angerẹ bisara tạ gěsine ene e ědoěng i kamene? Kai apạ e namahansang si kamene waugu mẹ̌gěllịu sasimbange?

⁴Manga andene i kamene ini e iạ, mase iạ ute i kamene, iạ e mal᷊aing makapẹ̌bisara mẹ̌sul᷊ungu ene. Takụ ipělěbang pěnanuturẹ̌ e i kamene; těmbọku e takụ ipẹ̌tatadụ.

⁵Naungu e sarung takụ ipakatoghasẹ̌ dingangu kal᷊awọu laoro, manga waweraku e makaonggọ u lahiborẹ̌.

⁶Kereu iạ e mẹ̌bisara, sigěsạku e tawe mal᷊ěda; kụ mạengu iạ e mẹ̌těngkarěmasẹ̌ e ute apa wue pul᷊ise?

⁷Duata e napakariading iạ nělome; kal᷊awọu ral᷊ohom bal᷊eku e sen nipakawinasa.

⁸I Sie rụdokạ dingangu měnamẹ si siạ. Kụ ini e měngkai apạ e nahusụ badangku, kụ baugu taumata l᷊awọ e ute kai ene karal᷊ahẹ e u iạ e kai seng nẹ̌dosa.

⁹Dingangu mahasa Mawu Ruata e něnggaghehẹ badangku; kụ dingangu kawawěnsing tạ sihinge i Sie mạmanda si siạ.

¹⁰Taumata e měmpẹ̌lẹ̌heghesẹ̌ si siạ e ringangu mohongʼi sire ngụnganga mal᷊oang; iạ e pinẹ̌tatibuluang kụ pipịku e niperu.

¹¹Duata e něnarakangu iạ su taumata duruhaka; iạ e nipakanawo su l᷊iman taumata ral᷊akisẹ̌ e.

¹²Humotong pẹ̌bawiahẹ̌ku e mal᷊enehẹ̌ dingangu mal᷊unsemahẹ̌, kaiso Ruata e něngalo si siạ sěngkělěndịe. Děhụku e nitěngal᷊ẹ̌ dingangu iạ e nipahị e; iạ e nịkakoạ e taghunalange.

¹³Tawẹ pěndangu tatal᷊ěntụ e i Sie měngkate turusẹ̌ měmẹ̌mitị si siạ, hakịu nawal᷊ongkahẹ̌ lohon tiangku e.

¹⁴I Sie něngalo mẹ̌sul᷊ungu sěngkatau patebone, kụ nělesẹ si siạ masaun sul᷊ene.

¹⁵Iạ e něluheng karong tatialang nělutu, ringangu naiang su awul᷊ẹ̌ ual᷊ingu kinawatạ.

¹⁶Gatiku nahamụ ual᷊ingu kakiạku; kohabu mataku e simahěnụ dingangu nawirụ.

¹⁷Arawe iạ e tawe nẹ̌koạ kal᷊ahěgisẹ̌; kụ nal᷊ahẹ u matul᷊idẹ̌ bue kakal᷊iomanengku su MAWU e.

¹⁸Ei dunia, karal᷊akisẹ̌ waugu iạ e abe wuni; abe rěmmasẹ̌ kiaratagẹ̌ku e mědẹ̌dorong kạadilẹ̌.

¹⁹ Iạ masingkạ u Tumatatawangku e kai su sorga; i Sie něngonggọu sasahidi u iạ e tawẹ dosaku.

²⁰Iạ e lẹ̌heghesang u manga hapịku ringangu pẹ̌pahul᷊ẹ̌geěng; apidu kạkiạ e iạ tụtatěngo Ruata mědẹ̌dorong tatongka.

²¹Ah, mal᷊owọko Ruata e hala tumatawang si siạ su těngo-Ne, mẹ̌sul᷊ungu sěngkatau taumata kụ sadia tumatawang hapị e.

²²Taung-taungku e lěmbene sen tawẹ kal᷊awọe lai; měntěhang lai iạ dumal᷊eng kụ semben tawe mẹ̌bal᷊ị kapia.