Read Sangir AYUB 17 Bible Online

AYUB 17 - Sangir bible

AYUB 17

¹Papateku e seng marani, seng masarạ maminsul᷊ẹ̌ singongoku; katewe kubul᷊ẹ̌ e matěntang si siạ.

²Taumata e mapakariading iạ e laheghesang; kakěllaku e seng ene e i sire měnindirẹ̌.

³Iạ ini e matul᷊idẹ̌, o Mawu Ruata. Pangimangke si siạ! I sai lai wědang makasumbalang sěgade waweraku e?

⁴Nịlahěpinge naung i sire e, hakịu tawe makaěnna; kumbahangbe sarang i sire mapẹ̌tumpěkuhu iạ e orasẹ̌ ini.

⁵Angkuěngu sasaili u, i saing měngalakẹ̌ u hapị e ual᷊ingu mědeạ untung, manga anạ e hala sarung měnarimạ u wawal᷊ise.[26]

⁶Ini iạ e ipạnungkeang u pěding bawera ene; i sire riměnta mědeạu měngědu su ghatiku.

⁷Mataku e masul᷊akọ ual᷊ingu susa naung; kasěllahu wadangku e nahusụ-husụ.

⁸Tau adilẹ̌ e, himěkosẹ̌ dingangu mạherang; taumata tạ sal᷊ane, mạngěnnau iạ kai tawẹ mawuku.

⁹Taumata mapia kụ tạ sal᷊ane e, mangkeng mạiakingu kakakoạu pẹ̌bawiahe nẹ̌tatahino su Mawu Ruata.

¹⁰Kaiso manga andene i kamene kěbị e ramahi mahunděnta e, tawẹ sarang sěngkatau pelesa e takụ kaěbakeng.

¹¹Kal᷊awọu ělloku e seng nal᷊iu, naghoghahe kal᷊awọu hingidẹ̌ku; naiangke lai kěbị apang karakin naungku e.

¹²Kai manga hapịku e němpẹ̌bera u, ’Hěbi ene e ěllo ringangu tualagẹ̌ e maraning marěnta.’ Kaiso iạ e masingkạ su ral᷊ungu naungku u těbewe marěndung kakakoạku.

¹³Kětạembeng duniang papate e takụ lẹ̌harapeng, kụ paị sene iạ e hědong mẹ̌tikị su ral᷊ungu kararěndung.

¹⁴Lěbingku e takụ nisěbạ ”si Amangku”, dingangu manga lěheng kụ kinạ badangku e takụ isěbạ ”si Ninangku” ringangu ”Wawineku”.

¹⁵Kai suapạ e pěharapengku; i saị e makasilo piạ karal᷊unsemahẹ̌ waugu iạ e?

¹⁶Kereu iạ[27] lumintụ sol᷊ong banuan tau nate e, iạ e sembeng tawẹ harapangku e lai.”