Read Sangir AYUB 18 Bible Online

AYUB 18 - Sangir bible

AYUB 18

¹Tangú sasimbang i Bildad, ”Ei Ayub, angerẹ bue i kau e masuen bisanu? Karěmase, ringangu raringihẹ̌ko, u i kami e reng mẹ̌bisara.

³Unụ e i kau mạngěnna u i kami e longong, kụ i kami e nisul᷊ungu su sapi?

⁴Dal᷊angehu e kětạeng nakasakị batangengu. Hinong mariadi tangú waugu pandungangu e matagẹ̌? kụ dunia e kailangengu tumanạ e, ringangu manga wul᷊ude al᷊ingang bọu tampạ e?

⁵ Sol᷊on taumata ral᷊akisẹ̌ e nal᷊ahẹ u mang pateěng; putunge selain tawe apararěllị.

⁶Tualagẹ̌ e su ral᷊ungu tentane e seng nal᷊uẹ̌; sol᷊o tatualage selain tawe siměnnang.

⁷Lempange mal᷊epatẹ̌ e seng nakoạ sụsadongkong; hingide sěsane e makạsangkong si sie.

⁸I sie rụdal᷊eng su ral᷊ungu somạ, hakịu laede maehọ.

⁹Pakele mạkětingu sedẹ, hakịu i sie ikẹ̌kasamẹ.

¹⁰Su ral᷊ungu ěntana e kạbawuni tal᷊in sedẹ; sural᷊eng, kạsasangẹ lahěgạ dingangu pul᷊ụ.

¹¹Tau ral᷊akisẹ̌ e lěhẹ̌kosangu huagatẹ̌ e wọu patikụ tampạ; katatakụ e tụtol᷊e apang lempange.

¹²Kal᷊imona e i sie matoghasẹ̌, arawe ini e i sie lụhumpinausang u tatungul᷊ẹ̌; hombange tụtaking si sie su apan tampạ.

¹³Pisine nikinạ u sakị matědụ; takiahe ringangu laede nawuhụ něnana.

¹⁴I sie nihěngkasẹ̌ bọu tentane, tampạ suapang i sie makạpěndang mal᷊enehẹ̌, mase nisuhude mẹ̌deạu ipẹ̌těngom papate.

¹⁵Kụ ini e walạ e měnsang i sai wotonge matanạ su ral᷊ungu tentane, kụ sene pěnawuhang malelang, papate sakị e.[28]

¹⁶Kal᷊awọu hamụ e nẹ̌kěllisẹ̌ dingangu nẹ̌kokohẹ̌; manga hakondane e něngkahěgu ringangu němpẹ̌kaigẹ̌.

¹⁷I sie selain tawe ikakakiral᷊a baẹ su ral᷊ungu soa ore lai sul᷊ikude; tawẹu sarang sěngkatau reng bědang makạtahěndung arenge.

¹⁸Bọu tualagẹ̌ e i sie nitokol᷊ẹ̌ sol᷊ong dal᷊ungu kararěndung; bọu runian taumata wiahẹ̌ e i sie nipakatạdise.

¹⁹Anạ dingangu pal᷊ahite, tawẹ apa si sie; su soane piněmitingang puide tawẹ u nal᷊ěmbe sarang sěngkatau.

²⁰Nakaringihẹ̌ kakakoạ u pẹ̌bawiahe pamanuane su sěmběkam bahẹ himěkosẹ̌, arawe pamanuane su sěmběkan daki e němpẹ̌kenden takụ.

²¹Kerene pal᷊edu taumata duruhaka, i sire e apan tawe měndarekengu Mawu Ruata.”