Read Sangir AYUB 19 Bible Online

AYUB 19 - Sangir bible

AYUB 19

¹Arawe i Ayub simimbahẹ̌ u, ”Kawe unụe iạ turusẹ̌ sẹ̌sẹ̌ngkul᷊ang i kamene, mase i kamene mẹ̌tẹ̌tingkaị dingangu wawerang kamene?

³I kamene masaun sul᷊ene mělẹ̌hinakang si siạ, ringangu wěgaweng mamea měnilakạ si siạ e.

⁴Kereu andene nẹ̌sal᷊a kakanoạku e, ene kai tawe makarugi si kamene.

⁵Su tiněnnang kamene e tangú watangeng i kamene e kai limembong kapiane wọu iạ e; susaku e kai nikoạ i kamene karal᷊ahẹ u pẹ̌sasal᷊aku.

⁶Kasingkạko u iạ e kai sẹ̌sigẹ̌sakengu Ruata ini e, kụ nisamẹ su ral᷊ungu sasamẹ e.

⁷Iạ e mẹ̌kẹ̌kal᷊umpiring kareạu katatingkaị e, kai tawẹu sarang sěngkatau nẹ̌pandung si siạ. ”Kai suapa kạadilẹ̌ e,” kakahiorọku, kaiso tawẹ u rumaringihẹ̌ si siạ.

⁸Duata e něhěping dal᷊engku, iạ e tawe makal᷊iu, ral᷊eng mananintạ dẹ̌dal᷊engangku e nipẹ̌kětungu kararěndung.

⁹I Sie něhampasẹ̌ patikụ darotongku e, dingangu arengku mapia e nipakaral᷊aị e.

¹⁰I Sie nanịgěsạ siạ e wọu patikụ lěsabe, mẹ̌sul᷊ungu taumata e něngěbụ hamụu sasuang, kụ bọu ene niwala nipakatal᷊iahu mase nahěgu, kerene i Sie něhěngkasẹ̌ kal᷊awọu pěngangumbalaku.

¹¹Dal᷊angehu Ruata e si siạ rụděllị mapia; kụ iạ e niěnna-Ne kere sědụʼE.

¹²BuntuangʼE něngalo tawe kinasahagheěng; dal᷊engku e nitěndakeng, dingangu tentaku e nilikutang.

¹³Anạu sěngkatauku e i sie niapakarau wọu anuku; iạ e nakoạ tau raghị su tal᷊oarang manga kal᷊awọu hapịku.

¹⁴Kal᷊awọu ěgẹku e kěbị e seng nẹ̌těngkaraung batangeng i sire; manga hapịku e seng tawe nẹ̌tahěndung kapia si siạ e.

¹⁵Ěllangku wawine e seng niwul᷊e měnsang i sai iạ e, kawe mawun sire; nikoạ e kere wěgaweng iạ e.

¹⁶Ěllangku e takụ nikuiang, kaiso i sie e tawe simimbang, maningbe i sie takụ lẹ̌ologang pakasikome.

¹⁷Kawingku e nitahamuta nakaimbu darurun singongoku, tuariku e tawe mapulu ruměduhẹ̌ si siạ.

¹⁸Iạ e lẹ̌hinakaneng u manga rariọ su ral᷊eng; kereu iạ dụdarisị, iạ lělẹ̌geěng.

¹⁹Makasilo si siạ, hapịku kantalẹ̌ e makapěndang matědụ; iạ e nitěntang i sire takụ ikẹ̌kěndagẹ̌ e.

²⁰Badangku e kate pisị namikung duhi; kụ seng maraning mate iạ e kụ niawaku e timěllạ marangẹ.

²¹Ei manga hapịku, tal᷊ěntukeko iạ e, watụ u takiahu Ruata e namahesẹ̌ si siạ.

²²Duata e měngkate sěntiniạ mạnědạ si siạ; unụe i kamene mẹ̌těno si Sie? Kai tanạsahe i kamene mẹ̌tingkai tangú?

²³Ah, mal᷊owọko manga waweraku e wohekang, hakịu hanesẹ̌ kẹ̌katahěndungang;

²⁴mal᷊owọko ual᷊ingu uase pakaneng su watu e, tadeạu i kamene mauwuhẹ̌ su kanandụ u tempo.[29]

²⁵Iạ masingkạ u su sorga e piạbe Tumatatawangku; kasamuriange i Sie sarung duměnta mẹ̌tul᷊ungu iạ.

²⁶Manimbe pisiku e maral᷊esẹ dingangu mawawẹ̌se, kaiso karěngụ u iạ e piạ badangku,[30] takụbe pandang Mawu Ruata e.

²⁷Dingangu mataku hala e i Sie sarung takụ ikasilo, kụ i Sie si siạ e makoạ hapị. Naungku e napěndụ u i kamene mẹ̌bera,

²⁸’Kereapa kakakoạ e i kitẹ e měngalakẹ̌ i sie?’ I kamene e mědẹ̌deạ alasangu mẹ̌koạ pěrkara.

²⁹Arawe ini e, katakụbeng peda! Batụu Mawu Ruata e limangehẹ̌ dingangu měhukungu taumata warạdosa; tangú nasingkạ e i kamene, u kai piạ Duata kụ měngguta[31] taumata.”