Read Sangir AYUB 2 Bible Online

AYUB 2 - Sangir bible

AYUB 2

¹Manga riadikang masorga e nẹ̌sul᷊e kapia nẹ̌těngon MAWU, kụ i Měnanal᷊ukạ e mal᷊aing ene su tal᷊oaran sire.

²Tangú MAWU e nakiwal᷊o si sie, ”Kai wọu a i kau?” I Mananal᷊ukạ simimbang, ”Bọu raral᷊engangu měpẹ̌papalilị tamai ramahi ringangu mạmẹ̌pidẹ̌ dunia.”

³MAWU e nakiwal᷊o, ”I kau e seng timingang su ěllang-Ku i Ayub? Su kasěllahu dunia e tawẹ apa taumata kereng kasatiane ringangu naunge mapia kere i sie. I sie mạněmba si Siạ dingangu mamben těngadẹ̌ tawe mẹ̌kakoạ karal᷊akisẹ̌. I sie měngkate těbe satia si Siạ, manimbe i kau e seng něngologẹ̌ si Siạ apěnilakạ si sie manimbe tawẹ banggilu pẹ̌sasal᷊ane.”

⁴Kaiso i Měnanal᷊ukạ e simimbang, ”Niawa ringangu kal᷊ahuweka e limembong maarěga wọu rarotong. Taumata e mal᷊uasẹ̌ měnarakangu kal᷊awọu arětạ e asal᷊u i sie měngkate těbe wiahẹ̌.

⁵Manga andene wadange kawe tědukangu e, ute nal᷊ahẹ u i sie apidu měngane si Kau!”

⁶Tangú něhengetangke MAWU e Si Měnanal᷊ukạ, ”Kerene e, měngkate walạ e i kau mẹ̌koạ si sie, asal᷊u i kau kumbahang měmate si sie.”

⁷Tangú i Měnanal᷊ukạ e němeho wọu těngom MAWU, kụ nakasongkahẹ̌be hempang su kasěllahu wadang i Ayub bọu pal᷊edu laedẹ̌ sarang pusige.

⁸Mase i Ayub naiang su rěduhu niěndukangu onasẹ̌, kụ něngal᷊ạ běkang kaca pinẹ̌ngahụ badange.

⁹Kawinge nẹ̌bera si sie, ”Unụe i kau měngkate těbe satia su Mawu Ruata? Hotede, anẹ e i Sie wọu e walạ e kakapatene!”

¹⁰Sasimbang i Ayub, ”I kau e nẹ̌bisara kere taumata longong! Unụe wue i kitẹ kětạeng mapulu měnarimạ apang mapia wọu anun Duata, arawe ral᷊akisẹ̌ e kawe suhudang?” Kụ manimbe i Ayub nikahombangengu kal᷊awọu sigěllạ ene, i sie tawẹ apawe wawerane apa ipěndokạ Mawu Ruata.

¹¹Sigěllạ kụ nawuạ si Ayub seng kinaringihʼu hapị e i sire těllu kụ i Elifas bọu soan Téman, i Bildad tau Suah ringangu i Zofar tau Naama. I sire nẹ̌kakire rumal᷊inge apidu měhiborẹ̌.

¹²Kaiso piạ e i sire wọu maraune nakasilọ e, i sire seng maranin tawe makakiral᷊a lai. I sire nahungkiạ mal᷊aihạ mase němpěnggehẹ pakeang i sire ringangu němpěngaesu awul᷊ẹ̌ sol᷊ong binangaeng dingangu su těmbọ.

¹³Pitu ěllo pitu hěbi i sire němpẹ̌kaiang su ěntana su sěndihang i Ayub, tawe manga němpẹ̌bera sarang sěngkamohong ual᷊ingu i sire nakasilo u kai enẹ e kawěhạ e sigěsạ e.